រាជធានីភ្នំពេញ ៖ ខណៈពេលដែលជិតដល់ថ្ងៃចូលឆ្នាំថ្មីប្រពៃណីខ្មែទៅហើយនោះ ស្រាប់តែវត្តតាំងកសាងខាងត្បូងត្រូវបានអាជ្ញាធរបិទជាបណ្ដោះអាសន្ន ហើយព្រះសង្ឃព្រមទាំងគណៈកម្មការអាចារ្យសរុបចំនួន៤៧អង្គនិងនាក់ ត្រូវបានធ្វើចត្តាឡីស័កនៅក្នុងវត្តខាងរយៈពេល៤ថ្ងៃដើម្បីយកសំណាកធ្វើតេស្តផងដែរ។ ការបិទនេះបន្ទាប់ពីមានការសង្ស័យអំពីជម្ងឺCOVID-19 ក្រោយពីព្រះសង្ឃរួមនិងលោកតាអាចារ្យវត្តនេះមួយចំនួនត្រូវបាននិមន្តនិងអញ្ជើញឲ្យទៅធ្វើកិច្ចនៅក្នុងពិធីបុណ្យស.ពស្ត្រីចំណាស់ម្នាក់ដែលបានស្លា.ប់ដោយសារជម្ងឺកូវីដ១៩ កាលពីប៉ុន្មានថ្ងៃមុនថ្មីៗនេះ។
វត្តតាំងកសាងខាងត្បូងមានទីតាំងស្ថិតនៅក្នុងសង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ហើយត្រូវបាន បិទជាបណ្ដោះអាសន្នកាលពីថ្ងៃទី៨ ខែមេសា ឆ្នាំ២០២១ ។
មន្ត្រីសាលាខណ្ឌពោធិ៍សែនជ័យបាននិយាយថា កាលពី៤ទៅ៥ថ្ងៃមុនកន្លងមកនេះមានស្ត្រីម្នាក់ឈ្មោះប្រាជ្ញ ទូច អាយុ៧២ឆ្នាំ រស់នៅក្នុងភូមិកាកាប សង្កាត់ចោមចៅទី២ ខណ្ឌពោធិ៍សែនជ័យ បានស្លាប់ដោយជម្ងឺCOVID-19 ហើយព្រះសង្ឃនិងលោកតាអាចារ្យនៅក្នុងវត្តនេះត្រូវបានក្រុមគ្រួសារសពនិមន្តនិងអញ្ជើញធ្វើកិច្ចក្នុងពិធីបុណ្យស.ព។ ក្រោយមកកូនចៅរបស់ស្ត្រីចំណាស់ខាងលើចំនួន៥នាក់ទៀតត្រូវបានក្រុមគ្រូពេទ្យជំនាញរកឃើញថាមានវិជ្ជមានជម្ងឺCOVID-19 និងត្រូវបាននាំទៅព្យាបាល។
តាមប្រភពដដែលបានបន្តទៀតថា បន្ទាប់មកតាមការស្រាវជ្រាវរកអ្នកពាក់ព័ន្ធបានដឹងថា ព្រះសង្ឃដែលគង់នៅក្នុងវត្តតាំងកសាងខាងត្បូងរួមជាមួយលោកតាអាចារ្យធ្លាប់ត្រូវបានក្រុមគ្រួសារស.ពនិមន្តនិងអញ្ជើញទៅធ្វើកិច្ចបុណ្យស.ពខាងលើបែបនេះពិតជាមានហានិភ័យខ្លាំងណាស់ ទើបអាជ្ញាធរសម្រេចបិទមិនឲ្យមានការចេញចូលវត្តឡើយដម្បីទប់ស្កាត់ការឆ្លងរាលដាលជម្ងឺCOVID-19 ។ មិនតែប៉ុណ្ណោះតម្រូវឲ្យព្រះសង្ឃនិងគណៈកម្មការអាចារ្យវត្តផងសរុបទាំងអស់ចំនួន៤៧អង្គនិងនាក់ ធ្វើចត្តាឡីស័ក១៤ថ្ងៃនៅក្នុងវត្តមិនឲ្យចេញទៅធ្វើកិច្ចផ្សេងនៅខាងក្រៅឬអ្នកពីខាងក្រៅចូលទៅក្នុងវត្តនោះឡើយដើម្បីយកសំណាកទៅធ្វើតេស្តរកមេរោគនេះ។
ប្រជាពលរដ្ឋបាននិយាយថា កន្លងមកវត្តខាងលើមានអ្នកដំណើរពីចម្ងាយ អ្នកលក់ដូរសម្ភារៈតាមម៉ូតូសណ្ដោងរ៉ឺម៉កផ្សេងៗចូលទៅសម្រាកហូបបាយថ្ងៃត្រង់នៅក្រោមដើមឈើ និងជិតចេតិយជាដើម ជាប់មិនដាច់ ប៉ុន្តែកន្លែងដែលអ្នកទាំងនោះសម្រាកបានស្ថិតនៅដាច់ឆ្ងាយពីកុដិព្រះសង្ឃមិននៅជិតឡើយ ។ ដោយឡែករយៈពេល២ថ្ងៃកន្លមកនេះវត្តខាងលើបិទទ្វារមានសភាពស្ងាត់ជ្រងំ ហើយខណៈនេះក៏ជិតដល់ថ្ងៃចូលឆ្នាំថ្មីប្រពៃណីជាតិថែមទៀតផងទោះជាចង់ទៅវត្តធ្វើបុណ្យទានក៏លំបាកដែរ។
ដោយឡែកនៅជាប់ទ្វារខ្លោងទ្វារវត្តនៅទិសខាងកើតនិងខាងជើងត្រូវបានព្រះសង្ឃដាក់ស្លាកោយសរសេរថា«សូមអធ្យាស្រ័យចំពោះញាតិញោម ជាពុទ្ធបរិស័ទចំណុះជើងវត្ត វត្តតាំងកសាងខាងត្បូង ត្រូវការបិទរយៈពេល១៤ថ្ងៃ បើញាតិញោមមានការចាំបាច់ អាចទំនាក់ទំនងតាមលេខទូរស័ព្ទ 092 839 993/090 754 444/012 512 242»។
ចំណែកលោកស្រី សាយ សូនីតា ចៅសង្កាត់កាកាបទី២ បានបង្ហោះសារលើអាខោនហ្វេសប៊ុកឈ្មោះ Say Sonita ថា«សូមជម្រាបជូនដំណឹងដល់បងប្អូន ចាប់ពីថ្ងែទី០៨ខែមេសានេះ វត្តតាំងកសាងខាងត្បូងបានបិទជាបណ្ដោះអាសន្នរយៈពេល១៤ថ្ងៃ ដោយសារព្រះសង្ឃគង់ក្នុងវត្តត្រូវធ្វើចត្តាឡីស័ក១៤ថ្ងៃរងចាំលទ្ធផងធ្វើតេសរកមេរោគCovid-19 សង្ឃឹមលោកបង និងលោកប្អូនទាំង៣៨អង្គ ជៀសផុតពីជំងឺcovidចង្រៃនេះ ឆ្លៀតក្នុងឱកាសនេះនាងខ្ញុំចៅសង្កាត់កាកាបទី២សុំអំពាវនាវដល់បងប្អូនញាត្តិមិត្តជិតឆ្ងាយនិងសប្បុរសជនជួយឧបត្តម្ភជាគ្រឿងឧបភោគដល់ព្រះសង្ឃដែរធ្វើចត្តាឡីស័កតាមសធាជ្រះថ្លា តាមរយៈរដ្ឋបាលសង្កាត់កាកាបទី២បានសូមអរគុណ»។
ទោះបីជាបែបណា ក៏មានអ្នកយកចង្ហាន់ទៅប្រគេនដល់ព្រះសង្ឃដែរ ប៉ុន្តែជាការការពានិងអនុវត្តតាមវិធានការក្រសួងសុខាភិបាល ពួកគាត់មិនបានចូលទៅជិនោះទេ ដោយនៅមាត់ទ្វារចូលវត្តមានដាក់គ្រែ១នៅខាងក្រៅ ហើយអ្នកដែលយកចង្ហាន់ទៅប្រគេនព្រះសង្ឃបានយកចង្ហាន់ទៅទុកនៅលើគ្រែនោះ ។ ចំណែកព្រះសង្ឃអាចលូកព្រហស្ថយកបាន បន្ទាប់មកព្រះសង្ឃសូត្រធម៌ជូនពរជ័យពីក្នុងបរិវេណវត្ត រីឯពួកគាត់អង្គុយចោងហោងសំពះនៅខាងក្រៅ ដែលនេះស្ដែងចេញឲ្យឃើញអំពីការលំបាកក្នុងបរិបទនៃជម្ងឺកូវីដ៕
ចែករំលែកព័តមាននេះ