សំឡេងផ្ទុះ និងការបាញ់កាំភ្លើងប្រឆាំងយន្តហោះបានលាន់ឮពីលើទីក្រុងទ្រីប៉ូលី រដ្ឋធានីលីប៊ី កាលពីយប់ថ្ងៃទី២១ មីនា កន្លងមក ដែលនោះជាការវាយប្រហារតាមអាកាសរបស់ពួកលោកខាងលិចលើកទី៣ ប្រឆាំងមេដឹកនាំផ្តាច់ការលីប៊ី លោកមូអាម៉ា កាដាហ្វី ។ កាំភ្លើងប្រឆាំងយន្តហោះត្រូវបានបាញ់ចេញពីតំបន់ភាគខាងជើង និងភាគខាងកើតទីក្រុងទ្រីប៉ូលី ។
ប្រភពក្នុងស្រុកមួយបានប្រាប់ទីភ្នាក់ងារព័ត៌មានចិនស៊ីនហួថា បន្ទាយយោធាមួយមានចម្ងាយ៣០គីឡូម៉ែត្រ ភាគខាងលិចទីក្រុងទ្រីប៉ូលី ត្រូវបានទម្លាក់គ្រាប់បែកដាក់បណ្តាលឱ្យរងការខូចខាតយ៉ាងដំណំ ។ មូលដ្ឋានកងម៉ារីននៅក្បែរស្ថានីយវិទ្យុ និងទូរទស្សន៍ក្នុងទីក្រុងទ្រីប៉ូលីត្រូវបានយកធ្វើជាគោលដៅវាយប្រហារផងដែរ។
ក្រោយពីមានការផ្ទុះគ្រាប់ អ្នកនាំពាក្យរដ្ឋាភិបាល លោក Mussa Ibrahim បានធ្វើសន្និសីទកាសែតបន្ទាន់មួយ ដើម្បីរិះរកមធ្យោបាយប្រឆាំងការវាយប្រហាររបស់កងទ័ពសម្ព័ន្ធមិត្តបារាំង អង់គ្លេស និងសហរដ្ឋអាមេរិក ។ លោក Mussa Ibrahim និយាយថា ប្រទេសលោកខាងលិចបានបើកការវាយប្រហារពីលើអាកាសរយៈពេល៣ថ្ងៃជាប់ៗគ្នា ក្រោយពីកងកម្លាំងប្រដាប់អាវុធលីប៊ីប្រកាសពីបទឈប់បាញ់គ្នាទូទៅមួយ ។ ព្រលានយន្តហោះនិងកំពង់ផែជាច្រើនរបស់លីប៊ី រងការបំផ្លាញដោយការវាយប្រហារតាមអាកាសនេះ ។
កាលពីថ្ងៃទី២១ មីនា កន្លងមក កងទ័ពរបស់លោកកាដាហ្វី បានដកថយចម្ងាយ១០០គីឡូម៉ែត្រ ពីទីក្រុងបេនហ្គាហ្ស៊ី ក្រោយពីរងការវាយប្រហារដោយពួកសម្ព័ន្ធមិត្ត២លើកមក ។
ទីប្រឹក្សាជាន់ខ្ពស់របស់ប្រធានាធិបតីបារាំង លោកនីកូឡាស់ សាកូហ្ស៊ី បានប្រាប់វិទ្យុ RMC ថា ការវាយប្រហារលើកចុងក្រោយនេះ ជាការសំពងយ៉ាងដំណំចំពោះប្រព័ន្ធការពារដែនអាកាសរបស់លីប៊ី និងបន្លាចកងទ័ពរបស់លោកកាដាហ្វី ៕
ចែករំលែកព័តមាននេះ