ខេត្តសៀមរាប ៖ អាជ្ញាធរខេត្ត និងពលរដ្ឋចំនួន១.៦០០នាក់ បានយកដើមឫស្សីពូជទំពាំងផ្អែមចំនួន១ពាន់ដើម ដែលជាជំនួយរបស់អង្គការហាវែស មកពីសហរដ្ឋអាមេរិក ទៅដាំនៅលើខ្នងភ្នំគូលែន ដើម្បីអភិរក្សតំបន់នោះឱ្យកាន់តែស្រស់បំព្រង ។
ការដាំដើមឫស្សីពូជទំពាំងផ្អែមនេះ បានធ្វើឡើងកាលពីព្រឹកថ្ងៃទី២៤ កញ្ញា នៅក្នុងឧទ្យានជាតិព្រះបាទជ័យវរ្ម័ន-នរោត្តម ភ្នំគូលែន ស្ថិតនៅក្នុងភូមិអន្លង់ធំ ឃុំខ្នងភ្នំ ស្រុកស្វាយលើ ក្រោមអធិបតីភាពលោក គឹម ឆៃហៀង អភិបាលរងខេត្ត ។ ចូលរួមក្នុងឱកាសនោះដែរមាន លោក ភួង លីណា ប្រធានមន្ទីរបរិស្ថានខេត្ត លោក សំ សៅ អភិបាលរងស្រុកស្វាយលើ និងលោក លឹម ផេង នាយកឧទ្យានជាតិ ។
លោកអភិបាលរងខេត្ត គឹម ឆៃហៀង បានលើកឡើងពីសារប្រយោជន៍នៃការដាំឫស្សីនេះមាន៣ចំណុចគឺ ៖
១-ឫស្សីផ្តល់អត្ថប្រយោជន៍ច្រើនណាស់ដូចជា ដើមយកធ្វើសំណង់ផ្ទះ គ្រែ តុ កៅអី កញ្ជើ កញ្ច្រែង ចង្អេរ ឈ្នាង អង្រុត គ្រឿងសង្ហារិម វត្ថុអនុស្សាវរីយ៍ និងឧបករណ៍នេសាទជាច្រើនទៀតដូចជា ទ្រូ លប លាន់… ។ ២-ឫស្សីនេះផ្តល់ទំពាំងផ្អែមសម្រាប់ជាម្ហូបចំណីទាំងក្នុងលក្ខណៈគ្រួសារ សេវាកម្មទេសចរណ៍ និងពាណិជ្ជកម្ម ។
៣-ឫស្សីជាគម្របព្រៃឈើ ជួយទប់ស្កាត់ការហូរច្រោះដី ជួយបង្កើនភាពបៃតងនៃព្រៃឈើ និងដើម្បីជួយទប់ស្កាត់ការប្រែប្រួលអាកាសធាតុ ។
សូមបញ្ជាក់ថា ឫស្សីទំពាំងផ្អែមនេះ បន្ទាប់ពីដាំក្នុងរយៈពេល២ឆ្នាំនឹងទទួលផល ហើយក្នុង១ឆ្នាំៗបានផលទំពាំង២ដង ទំពាំងមួយៗមានទម្ងន់ចាប់ពី៤គីឡូក្រាមទៅ៥គីឡូក្រាម ។ ក្នុងឱកាសនោះ លោកអភិបាលរងខេត្ត ក៏បានណែនាំដល់មន្ត្រីជំនាញ និងអាជ្ញាធរមូលដ្ឋាន ត្រូវធ្វើការផ្សព្វផ្សាយនូវគោលការណ៍អភិរក្សធនធានធម្មជាតិដល់ប្រជាពលរដ្ឋ និងដឹកនាំមន្ត្រីជំនាញទប់ស្កាត់ បង្ក្រាបបទល្មើសព្រៃឈើ និងការពារជីវចម្រុះ ដើម្បីថែរក្សាការពារបេតិកភណ្ឌលើភ្នំគូលែននេះផង និងជួយថែរក្សាសន្តិសុខ សម្របសម្រួល និងសហការផ្តល់សេវាទេសចរណ៍នៅលើភ្នំឱ្យបានល្អជូនប្រជាពលរដ្ឋនិងភ្ញៀវទេសចរ ។
ម្យ៉ាងវិញទៀត សូមឱ្យបងប្អូនប្រជាពលរដ្ឋទាំងអស់ មេត្តាចូលរួមថែរក្សាការពារ និងអភិរក្សព្រៃឈើ អភិរក្សធនធានធម្មជាតិ និងជីវចម្រុះឱ្យបានគង់វង្ស ចៀសវាងឱ្យខាងតែបាននូវការកាប់បំផ្លាញព្រៃឈើ និងបំផ្លាញធនធានធម្មជាតិ ។
សូមបញ្ជាក់ថា ការដាំឫស្សីពូជទំពាំងផ្អែមចំនួន១.០០០ដើមនៅលើភ្នំគូលែន ដោយមានការចូលរួមពីសំណាក់អាជ្ញាធរខេត្ត មន្ត្រីជំនាញ និងប្រជាពលរដ្ឋនេះ ក៏ទទួលបាននូវការសាទរពីមជ្ឈដ្ឋាននានា ហើយក៏ស្នើឱ្យបន្តដាំនៅតាមតំបន់ទេសចរណ៍ផ្សេងៗទៀតផងដែរ ៕
ចែករំលែកព័តមាននេះ