រាជធានីភ្នំពេញ ៖ កម្លាំងមន្ទីរប្រឆាំងគ្រឿងញៀន នៃក្រសួងមហាផ្ទៃ បានបើកប្រតិបត្តិការបង្ក្រាបករណីជួញដូរគ្រឿងញៀនមួយករណី ក្នុងតំបន់បឹងកក់ ដោយឃាត់ខ្លួនជនសង្ស័យ ៣នាក់ និងថ្នាំញៀនជិត២គីឡូក្រាម ក្នុងចំណោមនោះ មានជនសង្ស័យម្នាក់ ជាស្នងការរងនគរបាលខេត្តកំពត គឺលោកឧត្តមសេនីយ៍ត្រី (ផ្កាយ១) អ៊ឹម ឈួន ។
បើតាមអធិការរងខណ្ឌដូនពេញម្នាក់បាន បញ្ជាក់ថា ការឃាត់ខ្លួននេះបានធ្វើឡើងនៅវេលាម៉ោងប្រមាណ០៨ និង៣០នាទីយប់ថ្ងៃទី៦ ខែមេសា ឆ្នាំ២០២១ នៅចំណុចចំណតរថយន្តផ្សារ ខាលែនឌែល ម៉ល ក្នុងតំបន់បឹងកក់ ស្ថិតក្នុងសង្កាត់ស្រះចក ខណ្ឌដូនពេញ ដោយដកហូតសារធាតុញៀន ប្រភេទម៉េតំហ្វេតាមីន (ICE) ទម្ងន់ ១៧៣៨.៣៣ក្រាម (ជិត២គីឡូក្រាម) ។
ប្រភពព័ត៌មានដដែល បានបន្តឲ្យដឹងថា ជនសង្ស័យទាំង៣នាក់ ដែលពាក់ព័ន្ធបទល្មើសជួញដូរគ្រឿងញៀន រួមមាន ៖ ស្នងការរងខេត្តកំពត ឋានន្តរស័ក្តិឧត្តមសេនីយ៍ត្រី (កាលពីឆ្នាំ២០១៩ ទទួលបន្ទុកផ្នែកសណ្ដាប់ធ្នាប់) ឈ្មោះ អ៊ឹម ឈួន អាយុ៥១ឆ្នាំ (រូបអាវពណ៌ក្រហម) និងបក្ខពួក ២នាក់ទៀតឈ្មោះ កែវ ទិត្យមេសា ភេទប្រុស អាយុ២១ឆ្នាំ និងឈ្មោះ ហុង គា ភេទប្រុស អាយុ៦១ឆ្នាំ ត្រូវបានឃាត់ខ្លួន ពាក់ព័ន្ធគ្រឿងជិត ២គីឡូក្រាម ។
បច្ចុប្បន្ន ជនសង្ស័យទាំង ០៣នាក់ រួមទាំងវត្ថុតាង ត្រូវបានបញ្ជូនទៅមន្ទីរប្រឆាំងគ្រឿងញៀន និងកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ដើម្បីផ្តន្ទាទោសតាមច្បាប់ ៕
ចែករំលែកព័តមាននេះ