ខេត្តបន្ទាយមានជ័យ ៖ បុរសម្នាក់បានបាត់បង់ជីវិតភ្លាមៗ ខណៈដឹកស្រូវពេញគោយន្តបាក់សាក់ស៊ីរ៉ឺម៉ក បណ្តាលឲ្យការុងស្រូវរអិលសង្កត់ខ្ទប់កៀបនឹងដែកទទឹងដៃចង្កូតគោយន្តកន្ត្រៃស្លាប់ភ្លាមៗមួយរំពេច ។ ហេតុការណ៍នេះកើតឡើងនៅវេលាម៉ោង០៤និង២០នាទីល្ងាចថ្ងៃទី០៦ខែមេសា ឆ្នាំ២០២១ នៅចំណុចអូតាតោ ស្ថិតក្នុងភូមិសាស្ត្រភូមិក្របៅ ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ ។
ប្រភពព័ត៌មានពីនគរបាលរដ្ឋបាលឃុំភ្នំលៀបបានឲ្យដឹងថា ជនរងគ្រោះឈ្មោះ សែម មុំ អាយុ៤៨ឆ្នាំ ភេទប្រុស នៅភូមិ ក្បាលក្របី ឃុំសំបួរ ស្រុកមង្គលបូរី ខេត្តបន្ទាយមានជ័យ ។
នៅមុនពេលកើតហេតុ ជនរងគ្រោះបានស៊ីឈ្នួលដឹកស្រូវឲ្យគេ បន្ទាប់ពីច្រូតកាត់បោកបែនរួចដោយមានគោយន្តជាច្រើនគ្រឿងផងដែរ ដោយបើកគម្លាតពីប្រហែលជា១០០ម៉ែត្រ ។ ចំណែកគោយន្តជនរងគ្រោះ បើកនៅកណ្តាលគេពេលបើកមកចំណុចអូរតាតោ ម្តុំវាលកន្ចូន ប្រហែល៣គ.ម នៅខាងកើតភូមិសាស្ត្រភូមិ ក្របៅ ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ រ៉ឺម៉កគោយន្តកន្ត្រៃបាក់សាក់ស៊ី បណ្តាលឲ្យការុងស្រូវរអិលមកមុខខ្ទប់កៀបអ្នកបើកបរទៅនឹងដែកទទឹងដៃចង្កូតត្រូវត្រង់ដើមទ្រូងស្លាប់ភ្លាមៗ ។
ប្រភពដដែលបានបញ្ជាក់ថា ហេតុដែលបង្កឲ្យគ្រោះថ្នាក់នេះសង្ស័យដែកសាក់ស៊ីរ៉ឺម៉កគោយន្តមានសភាពចាស់នៅពេលដឹកស្រូវធ្ងន់បានបាក់ ហើយកការុងស្រូវរអិលសង្កត់អ្នកបើកបរកៀបខ្ទប់នឹងដែកទទឹងដៃចង្កូតគោយន្តស្លាប់តែម្តង ។ សពជនរងគ្រោះត្រូវបានក្រុមគ្រួសារយកទៅចាត់ចែងធ្វើបុណ្យតាមប្រពៃណី ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ