លោកសៃអ៊ីហ្វអាល់ អ៊ីស្លាម កូនប្រុសម្នាក់ ក្នុងចំណោមកូនប្រុសរបស់លោកមូអាម៉ា កាដាហ្វី ថ្លែងកាលពីថ្ងៃទី១០ មីនា ថា ពេលនៃការវាយលុកទ្រង់ទ្រាយធំមួយប្រឆាំងពួកបះបោរលីប៊ីបានមកដល់ហើយ ។ ក្នុងបទសម្ភាសន៍មួយជាមួយរ៉យទ័រលោកសៃអ៊ីហ្វ អាល់អ៊ីស្លាម ថ្លែងថា ពេលវេលានៃការរំដោះមកដល់ហើយ ។ ពេលវេលាគឺការបញ្ចេញសកម្មភាព ។ ពេលនេះយើងកំពុងតែរុលទៅមុខ។
ពេលសួរថា តើរដ្ឋាភិបាលនឹងបង្កើនប្រតិបត្តិការយោធា ឬយ៉ាងណា? កូនប្រុសលោកកាដាហ្វី រូបនេះ ឆ្លើយតបថា ពេលវេលាឥឡូវបានមកដល់ហើយ ។ ពេលវេលានៃការធ្វើសកម្មភាពមកដល់ហើយ ។ យើងបានទុកពេលឱ្យពួកបះបោរ២សប្តាហ៍រួចហើយដើម្បីធ្វើការចរចា ។
ដោយប្រកាន់យកភាសាធ្ងន់ៗជាងធម្មតា លោកសៃអ៊ីហ្វអាល់អ៊ីស្លាម អះអាងថា ពួកកាដាហ្វីមានទំនុកចិត្តចំពោះជោគជ័យរបស់ពួកគេ ។ យើងនឹងមិនចុះញ៉មដាច់ខាត ។ យើងនឹងមិនចុះចាញ់ឡើយ ។ នេះជាប្រទេសរបស់យើង យើងប្រយុទ្ធនៅលីប៊ី ។
លោកសៃអ៊ីហ្វអាល់អ៊ីស្លាម អាយុ៣៨ឆ្នាំ បន្តទៀតថា ពួកប្រឆាំង និងពួកអឺរ៉ុបត្រូវនិយាយចំពោះប្រជាជនលីប៊ី ។ ប្រសិនបើពួកគេជួយគាំទ្រពួកជីវពល នោះពួកគេធ្វើចុះ ។ ក៏ប៉ុន្តែខ្ញុំសូមនិយាយប្រាប់ពួកគេថា ពួកគេនឹងត្រូវខាតបង់ ។ យើងនឹងឈ្នះ ហើយយើងនឹងមិនខ្លាចកងនាវាចម្បាំងអាមេរិក របស់អូតង់ បារាំង និងអឺរ៉ុប ឡើយ ។ យើងស្ថិតនៅក្នុងប្រទេសលីប៊ី យើងសុខចិត្តស្លាប់នៅទីនេះ ។
អំពើហិង្សានៅលីប៊ីជាអំពើហិង្សាធ្ងន់ធ្ងរបំផុតនៃរលកបះបោរដែលកើតមានក្នុងពិភពអារ៉ាប់ចាប់តាំងពីដើមឆ្នាំមក ។ លោកសៃអ៊ីហ្វ អាល់អ៊ីស្លាម និយាយដែរថា ពួកអ្នកស្ម័គ្រចិត្តជាច្រើនពាន់នាក់ត្រៀមកាន់អាវុធប្រឆាំងកងកម្លាំងប្រឆាំងរដ្ឋាភិបាល ដែលលោកបានប្រៀបធៀបទៅនឹងពួកជីវពលអ៊ិស្លាម ដែលមានវត្តមាននៅសូម៉ាលី ។
ទូរទស្សន៍រដ្ឋលីប៊ីនិយាយថា ក្រោយវាយដណ្តើមយកបានទីក្រុងប្រេង RAS LANOUF កងទ័ពលីប៊ី កំពុងលើកឆ្ពោះទៅកាន់ក្រុងបេនហ្គាហ្ស៊ី ទីតាំងធំរបស់ពួកបះបោរ ។ ប្រឈមមុខនឹងការវាយលុកប្រមុខក្រុមប្រឹក្សាជាតិរបស់ពួកបះបោរបានអំពាវនាវរកជំនួយអន្តរជាតិ ដោយអះអាងថា បើគ្មានជំនួយទេ នោះលោកកាដាហ្វី នឹងកម្ទេចប្រទេស ៕
ចែករំលែកព័តមាននេះ