ខេត្តកំពង់ធំ ៖ ដោយទទួលបានបញ្ជាពីលោកព្រះរាជអាជ្ញា កាលពីយប់ថ្ងៃទី៤ មីនា ឆ្នាំ២០១១ សមត្ថកិច្ចនគរបាលសេដ្ឋកិច្ចនៃស្នងការដ្ឋាននគរបាលខេត្តកំពង់ធំសហការជាមួយសមត្ថកិច្ចជំនាញមេព្រៃសង្កាត់ និងផ្នែករដ្ឋបាលព្រៃឈើកំពង់ថ្មបានចាប់រថយន្តកាមរីដឹកឈើគ្រញូងមួយគ្រឿង ខណៈដែលជនល្មើសព្យាយាម បើគេចនៅចំណុចខាងលិចភូមិតាព្រាច ឃុំទីពោធិ ស្រុកសន្ទុក ខេត្តកំពង់ធំ ។
សមត្ថកិច្ចជំនាញ និងនគរបាលស្រុកសន្ទុក ឱ្យដឹងថា កាលពីវេលាម៉ោង២៤ថ្ងៃទី៤ ឈានចូលថ្ងៃទី៥ មីនា ឆ្នាំ២០១១ ដោយសហការជាមួយជំនាញមេព្រៃ និងដោយមានបញ្ជាពីលោកព្រះរាជអាជ្ញាប៉ែន សារ៉ាត កំលាំងសមត្ថកិច្ចនគរបាលស្រុកសន្ទុកបានឃាត់រថយន្តកាមរីពណ៌ឈាមជ្រូកគ្មានស្លាកលេខមួយគ្រឿងដែលបើកបរដោយឈ្មោះចាន់ បៀន អាយុ៣៧ឆ្នាំ ទីលំនៅក្នុងភូមិសាលាវិស័យ ឃុំសាលាវិស័យ ស្រុកប្រាសាទបល្ល័ង ខេត្ត កំពង់ធំ ជាមន្ត្រីកងរាជអាវុធហត្ថស្រុកប្រាសាទសំបូរឋានៈជាមេបញ្ជាការរងស្រុក ។ ការឃាត់ខ្លួនខ្លួននោះត្រូវបានសមត្ថកិច្ចរកឃើញឈើគ្រញូងចំនួន២២៦ដុំ ស្មើនិង១.៥១០គីឡូក្រាម ។
ក្រោយមានបញ្ជាពីលោកព្រះរាជអាជ្ញាជនសង្ស័យជាឈ្មួញរកស៊ីឈើឈ្មោះចាន់ បៀន ត្រូវបានវាយខ្នោះនិងបញ្ជូនទៅសាលាដំបូងភ្លាមៗ បន្ទាប់ពីជនរូបនេះព្យាយាមតដៃជាមួយសមត្ថកិច្ចដោយចចេសរឹងរូសបំផុត ។ នៅថ្ងៃទី៥ មីនា ត្រូវលោកព្រះរាជអាជ្ញាចោទប្រកាន់ និងចេញដីកាឃុំខ្លួនជាបណ្ដោះអាសន្ន ។ ការឃាត់រថយន្ត និងឈ្មោះចាន់ បៀនគេរកឃើញប័ណ្ណសំគាល់រថយន្តដែលសរសេរ
ថា អ.ហ និង ចេញឱ្យលោកវរសេនីយ៍ម្នាក់ប្រើប្រាស់ ប៉ុន្តែមិនដឹងថា លោកវរសេនីយ៍រូបនោះ និងជនដៃដល់ម្នាក់នេះមានពាក់ព័ន្ធអ្វីនឹងគ្នាឡើយ ។
នេះជាលើកទីពីរហើយដែលសមត្ថកិច្ចជំនាញឃាត់ខ្លួន និងរឹបអូសវត្ថុតាងមានឈើគ្រញូងជាច្រើនរយដុំដែលជនពាក់ព័ន្ធគឺជាមេបញ្ជាការរងកងរាជអាវុធហត្ថខេត្តកំពង់ធំ ។ ដោយឡែកនៅវេលាម៉ោង១៤ និង៣០នាទី និងម៉ោង១៦ និង៣០នាទីថ្ងៃទី៤ មីនា ឆ្នាំ២០១១ នៅចំណុចដោយឡែកពីគ្នា ក្នុងស្រុកបារាយណ៍ ខេត្តកំពង់ធំ សមត្ថកិច្ចនគរបាល សហការជាមួយនគរបាលស្រុកបានឃាត់រថយន្តកាមរីពណ៌ស ស្លាកលេខភ្នំពេញ2E5544 ដឹកសត្វព្រៃខុសច្បាប់ (សត្វ កាំប្រមា)ចំនួន៥ក្បាល ទំងន់៣៩គីឡូក្រាម និងរថយន្តកាមរីពណ៌សស្លាកលេខក៧៣០៣ ភព២ដឹកសត្វព្រៃខុសច្បាប់(សត្វប្រមា)ចំនួន៤ក្បាលទំងន់៣៧គីឡូក្រាម ដែលពួកជនល្មើសឆ្លៀតឱកាសដឹកចេញដោយខុសច្បាប់ ។ ដោយឡែកម្ចាស់រថយន្តបានរត់គេចខ្លួនបាត់ ។ ក្រោយឃាត់ខ្លួនវត្ថុតាងទាំងអស់ ត្រូវបានប្រគល់ឱ្យសមត្ថកិច្ចផ្នែករដ្ឋបាល ព្រៃឈើកំពង់ថ្មរក្សាទុក ៕
ចែករំលែកព័តមាននេះ