ខេត្តព្រៃវែង ៖ ដោយមិនបង្អង់យូរឡើយ ក្រោយពីរាជរដ្ឋាភិបាលបានចេញចរាចរណ៌ណែនាំអោយធ្វើការបិទចរាចរណ៌ឆ្លងពីខេត្តមួយទៅខេត្តមួយភ្លាម នៅវេលាម៉ោង០០យប់ ថ្ងៃទី៦ ឈានចូលព្រឹកថ្ងៃទី៧ មេសា អាជ្ញាធរខេត្តព្រៃវែងបានបង្កើតគណៈកម្មការដឹកនាំកំលាំងចុះដាក់បារ៉ាស់នៅតាមដងផ្លូវសំខាន់ៗ ត្រង់ចំណុចព្រំព្រទល់ខេត្តភ្លាមៗ…
ខេត្តព្រៃវែង ៖ ដោយមិនបង្អង់យូរឡើយ ក្រោយពីរាជរដ្ឋាភិបាលបានចេញចរាចរណ៌ណែនាំអោយធ្វើការបិទចរាចរណ៌ឆ្លងពីខេត្តមួយទៅខេត្តមួយភ្លាម នៅវេលាម៉ោង០០យប់ ថ្ងៃទី៦ ឈានចូលព្រឹកថ្ងៃទី៧ មេសា អាជ្ញាធរខេត្តព្រៃវែងបានបង្កើតគណៈកម្មការដឹកនាំកំលាំងចុះដាក់បារ៉ាស់នៅតាមដងផ្លូវសំខាន់ៗ ត្រង់ចំណុចព្រំព្រទល់ខេត្តភ្លាមៗ ។
យោងតាមការអោយដឹងពីរដ្ឋបាលខេត្តព្រៃវែងដងផ្លូវសំខាន់ៗដែលត្រូវបានដាក់បារ៉ាស់បិទមិនអោយមានការចរាចរណ៌ឆ្លងកាត់បាននោះរួមមាន កំណាត់ផ្លូវជាតិលេខ១ ត្រូវបានបិទនៅចំណុចគល់ស្ពានត្សឹបាសា ហៅស្ពានអ្នកលឿង ក្នុងស្រុកពាមរក៌ និងនៅគល់ស្ពានព្រៃឈរ ស្រុកកំពង់ត្របែក ព្រំព្រទល់ព្រៃវែងស្វាយរៀង ។
ចំណែកកំណាត់ផ្លូវជាតិលេខ៨អា ត្រូវបានបិទនៅចំណុចគល់ស្ពានកំពង់ពពិល ស្រុកពារាំង ព្រំព្រទល់ព្រៃវែងកណ្តាល និងនៅចំណុចផ្លូវកែងផ្សារក្របៅ ក្នុងស្រុកកំចាយមារ ព្រំប្រទល់ខេត្តព្រៃវែងត្បូងឃ្មុំ ។
ដោយឡែកកំណាត់ផ្លូវជាតិលេខ១១ ត្រូវបានបិទនៅចំណុចឃុំអំពិលក្រៅ ព្រំព្រទល់ខេត្តព្រៃវែងកំពង់ចាម ។ ក្រៅពីដងផ្លូវសំខាន់ៗទាំងនេះក៏មានបិទនៅតាមផ្លូវលំមួយចំនួនទៀត ដែលនៅជាប់ព្រំព្រទល់ខេត្តដូចគ្នា គឺបិទនៅចំណុចគល់ស្ពានជាច ក្នុងឃុំជាច ស្រុកកំចាយមារ និងនៅឃុំបឹងផ្សោត ឃុំពាមមានជ័យ ព្រំព្រទល់ស្រុកពាមរក៌ ខេត្តព្រៃវែង ជាមួយ និងស្រុកល្វាឯម ខេត្តកណ្តាល ។
អាជ្ញាធរខេត្តព្រៃវែង បានបញ្ជាក់ថា ការដាក់បារ៉ាស់បិទផ្លូវនេះ គឺបិទតែប្រជាពលរដ្ឋមិនអោយធ្វើចរាចរណ៌ឆ្លងពីខេត្តមួយទៅខេត្តមួយប៉ុណ្ណោះ ដោយឡែកសំរាប់រថយន្តដឹកទំនិញតូចធំផ្សេងៗ គឺនៅបើកអោយធ្វើចរាចរណ៌ឆ្លងកាត់បានជាធម្មតា ប៉ុន្តែក៏មានករណីលើកលែងផងដែរ សំរាប់មន្ត្រីរាជការដែលជាប់បេសកកម្ម និងអ្នកជម្ងឺដែលត្រូវការព្យាបាលបន្ទាន់ផងដែរ ។
គួរបញ្ជាក់ផងដែរថា នៅព្រឹកថ្ងៃទី៧ មេសានេះ បើទោះបីជាមានសមត្ថកិច្ចដាក់បារ៉ាស់ បិទមិនអោយឆ្លងកាត់ខេត្តបែបនេះក្តី ប៉ុន្តែគេឃើញនៅតែមានប្រជាពលរដ្ឋជាច្រើន នៅតែបន្តនាំគ្នាធ្វើដំណើរមកក្នុងបំណងចង់ឆ្លងចូលខេត្តព្រៃវែង និងខ្លះហួសទៅខេត្តស្វាយរៀងក៏មាន ហើយពេលត្រូវសមត្ថកិច្ចឃាត់មិនអោយទៅ ពួកគាត់នៅទ្រឹងមិនព្រមត្រឡប់ក្រោយ រហូតធ្វើអោយមានការកកស្ទះពេញដងផ្លូវ តែទោះជាយ៉ាងណា ដើម្បីការពារសុខភាព និងអាយុជីវិតរបស់បងប្អូនប្រជាពលរដ្ឋ និងអនុវត្តតាមសារាចរណ៌ណែនាំរបស់រាជរដ្ឋាភិបាល អាជ្ញាធរខេត្ត និងកំលាំងសមត្ថកិច្ចនៅតែមិនអនុញ្ញាតិអោយមានការឆ្លងកាត់ចេញ ឬចូលក្នុងខេត្តព្រៃវែងនោះទេ ៕
ចែករំលែកព័តមាននេះ