រាជធានីភ្នំពេញ ៖ ក្រុមហ៊ុនហ្វដ និងក្រុមហ៊ុន អ អឹម អេ កម្ពុជា នៅតែបន្តជួយដល់សហគមន៍នៅតំបន់ដាច់ស្រយាលនៃប្រទេសកម្ពុជា ជាក់ស្ដែងកាលពីថ្ងៃទី២៤ កញ្ញា ២០១៥ ក្រុមហ៊ុនហ្វដ និងអ អិម អេ កម្ពុជា បានសម្ពោធដាក់ឱ្យប្រើប្រាស់នូវសាលារៀនមួយខ្នងនៃសាលាបឋមសិក្សាអូរសោម និងអណ្ដូងទឹកស្អាត ព្រមទាំងដាំដើមឈើជូនសហគមន៍ដែលខ្វះខាតនៅភូមិវាល់វង់ ឃុំរកាត ស្រុកភ្នំក្រវាញ ខេត្តពោធិ៍សាត់ ។ គម្រោងនេះ បានអនុវត្តដោយសមាគមពាណិជ្ជករអន្តរជាតិ (JCI) ដែលប្រើប្រាស់អស់ថវិកាចំនួន២ម៉ឺនដុល្លារអាមេរិក ទទួលបានពីមូលនិធិសម្រាប់ការសាងសង់សាលារៀន និងក្លោងទ្វារ ។
លោកដេវីដ ឡហ្វលីន នាយកគ្រប់គ្រងផ្នែកលក់ប្រចាំតំបន់អាស៊ីប៉ាស៊ីហ្វិចរបស់ក្រុមហ៊ុនហ្វដម៉ូទ័រ បានមានប្រសាសន៍ថា កម្មវិធីនេះ គឺជាមធ្យោបាយមួយក្នុងចំណោមមធ្យោបាយទាំងឡាយដែលក្រុមហ៊ុនហ្វដ អាចរួមចំណែកក្នុងការការពារបរិស្ថាន និងលើកកម្ពស់សុខុមាលភាព និងជីវភាពរស់នៅរបស់ប្រជាជនតាមសហគមន៍។ យើងសង្ឃឹម និងជឿជាក់យ៉ាងមុតមាំថា សាលារៀនថ្មីនេះ នឹងអាចបម្រើនូវសេចក្តីត្រូវការដល់កុមារដែលរស់នៅក្នុងសហគមន៍នេះ ហើយជាគោលដៅតែមួយគត់ដែលអាចផ្ដល់នូវអនាគតដ៏ភ្លឺស្វាងសម្រាប់ពួកគាត់នាថ្ងៃអនាគត ។
លោកថា ប្រទេសកម្ពុជាជាប្រទេសទី១ ដែលបានចូលរួមក្នុងមូលនិធិអភិរក្ស និងការពារបរិស្ថាន និងមូលនិធិ និងមូលនិធិគាំពារសហគមន៍ជាសកល ។ នេះជាគម្រោងប្រចាំឆ្នាំទី១២ហើយ ដែលហ្វដនៅតែបន្តរហូតមកដល់បច្ចុប្បន្ន ក្នុងការអភិវឌ្ឍន៍សហគមន៍ ។
លោកសេង វឹង ប្រធានគ្រប់គ្រងផ្នែករថយន្តហ្វដនៃក្រុមហ៊ុន អ អិម អេ បានមានប្រសាសន៍ថា យើងពិតជាជាមានសេចក្តីសោមនស្សជាពន់ពេក ដែលយើងមានលទ្ធភាពក្នុងការសាងសង់សាលារៀន និងអណ្ដូងទឹកស្អាតក្នុងខេត្តពោធិ៍សាត់នេះ ដែលជាការសាងសង់ហេដ្ឋារចនាសម្ព័ន្ធទ្រង់ទ្រាយតូចសម្រាប់សហគមន៍មួយចំនួនដែលមានការខ្វះខាតនូវសាលារៀន ក៏ដូចជាអណ្ដូងទឹកស្អាតនៅក្នុងប្រទេសកម្ពុជា ហើយបេសកកម្មរបស់យើងនៅតែបន្តទៅកាន់ទីជនបទដាច់ស្រយាលផ្សេងទៀត ដែលជួបនឹងការខ្វះខាត ។ ហើយវាមិនមែនជាគម្រោងទី១ទេ ដែលហ្វដ និងអ អិម អេ ផ្ដល់ជូនដល់សហគមន៍តែជាលើកទី១ ដែលយើងបានសហការជាមួយ JCI ហើយសង្ឃឹមថា យើងនឹងបន្តសហការគ្នា ដើម្បីជួយដល់សហគមន៍ដែលខ្វះខាតនៅតំបន់នានាទៀត ។
លោកម៉ក់ រ៉ា អភិបាលរងខេត្តពោធិ៍សាត់ បានមានប្រសាសន៍ដែរថា ដូចដែលបងប្អូនឃើញស្រាប់ ក្រុមហ៊ុនហ្វដតែងតែជួយដល់សហគមន៍នានា ដូចជាសាលារៀន ដណ្ដូងទឹក ដើម្បីចូលរួមកាត់បន្ថយភាពក្រីក្រ របស់ប្រជាជននៅតាមបណ្ដាខេត្តនានា ។ ជាក់ស្ដែងសមិទ្ធផលសាលារៀន និងអណ្ដូងទឹកដែលដាក់ឱ្យប្រើប្រាស់នាពេលនេះ គឺជាសមិទ្ធផលថ្មីស្រឡាងរបស់ក្រុមហ៊ុន ហ្វដ និង អ អិម អេ កម្ពុជា ផ្ដល់ជូនប្រជាជននៅភូមិវាល់វង់ ឃុំរកាត ស្រុកភ្នំក្រវាញ តាមតម្រូវការរបស់ប្រជាជននៅទីនេះ ហើយក៏សូមឱ្យប្រជាជននៅមូលដ្ឋាននេះ ជួយរក្សាការពារសមិទ្ធផលទាំងនេះឱ្យគង់វង្សសម្រាប់ប្រើប្រាស់តកូនតចៅ ។
គួរបញ្ជាក់ថា ហ្វដ បានធ្វើការអនុវត្តគម្រោងមូលនិធិអភិរក្ស និងការពារ បរិស្ថានក្នុងប្រទេសកម្ពុជា និងមូលនិធិគាំពារសហគមន៍ ជាសកលនេះឡើងជារៀងរាល់ឆ្នាំនៅក្នុងប្រទេសម៉ាឡេស៊ី ហុងកុង កម្ពុជា ឡាវ មីយ៉ាន់ម៉ា ម៉ុងហ្គូលី តាហីទី និងហ្វីជី ជាដើម។ ក្រុមហ៊ុនក៏បានបរិច្ចាគមូលនិធិរបស់ខ្លួន ក្នុងគោលបំណងជួយគាំទ្រនូវសេដ្ឋកិច្ចនៅក្នុងតំបន់ក៏ដូចជាអភិរក្សបរិស្ថានសម្រាប់អនាគត ៕
ចែករំលែកព័តមាននេះ