កំពង់ស្ពឺ៖ ករណីបង្ក្រាបបទល្មើសនេះ បានធ្វើឡើង កាលពីថ្ងៃទី០៥ ខែមេសា ឆ្នាំ២០២១ នៅចំណុចមុខរោងចក្រ ផាកហែនប៊ែក ស្ថិតនៅភូមិព្រីង ឃុំរលាំងចក ស្រុកសំរោងទង ខេត្តកំពង់ស្ពឺ។
ប្រតិបត្តិការនេះ ធ្វើឡើងដោយកម្លាំងមូលដ្ឋានកងរាជអាវុធហត្ថស្រុកសំរោងទង និងកម្លាំងមន្ទីរស្រាវជ្រាវ និងបង្ក្រាបបទល្មើស ដឹកនាំកម្លាំងដោយលោកវរសេនីយ៏ឯក ទិត្យ វណ្ណៈ មេបញ្ជាការរង ទទួលការងារស្រាវជ្រាវ និងបង្ក្រាបបទល្មើស ព្រមទាំងមានការសម្របសម្រួលពីលោកជំទាវ ចាតសូ រស្មី ព្រះរាជអាជ្ញាអមសាលាដំបូងខេត្តកំពង់ស្ពឺ។
កម្លាំងសមត្ថកិច្ច បានឃាត់ខ្លួនជនសង្ស័យ ម្នាក់ ឈ្មោះ កែវ ស៊ីថា ភេទស្រី អាយុ ២០ឆ្នាំ មុខរបរធ្វើការរោងចក្រ មានទីលំនៅភូមិបាក់ធ្មេញ ឃុំរលាំងចក ស្រុកសំរោងទង ខេត្តកំពង់ស្ពឺ ពីបទលួចម៉ូតូ និងឃាត់ខ្លួនជនសង្ស័យ ចំនួន ០២នាក់បន្ថែមទៀត ពីបទទទួលផលចោរកម្ម៖ ១-ឈ្មោះ ជា ភា ភេទប្រុស អាយុ ៣៤ឆ្នាំមុខរបរទិញលក់ម៉ូតូ មានទីលំនៅភូមិមហាទំពាំងទី១ ឃុំសែនដី ស្រុកសំរោងទង ខេត្តកំពង់ស្ពឺ។ ២-ឈ្មោះ ស៊ិន រិន្ទដេត ភេទប្រុស អាយុ ៤២ឆ្នាំ មុខរបរទិញលក់ម៉ូតូ មានទីលំនៅភូមិឃុំជាមួយគ្នា។
កម្លាំងសមត្ថកិច្ចចម្រុះ ក៏បានដកហូតម៉ូតូចំនួន ១៦គ្រឿង ដែលមានការសង្ស័យពីបទលួច និងទទួលផលចោរកម្ម។
ជនសង្ស័យ និងម៉ូតូ ត្រូវបានបញ្ជូនទៅបញ្ជាការដ្ឋានកងរាជអាវុធហត្ថ ខេត្តកំពង់ស្ពឺ ដើម្បីអនុវត្តតាមនីតិវិធីច្បាប់៕ ដោយ៖ វង្ស សន
ចែករំលែកព័តមាននេះ