ស្ថានភាពមិនអំណោយផល! ឆ្លងច្រើនពេក សម្រេចត្រៀមបំរុងបង្កើតគ្រូពេទ្យថែទាំនិងព្យាបាលនៅតាមផ្ទះសម្រាប់អ្នកជំងឺកូវីដ-១៩
- ភ្នំពេញ
រាជធានីភ្នំពេញ ៖ រដ្ឋមន្ត្រីក្រសួងសុខាភិបាល ឯកឧត្តម ម៉ម ប៊ុនហេង នារសៀលថ្ងៃទី ៦ ខែមេសា ឆ្នាំ២០២១…
រាជធានីភ្នំពេញ ៖ រដ្ឋមន្ត្រីក្រសួងសុខាភិបាល ឯកឧត្តម ម៉ម ប៊ុនហេង នារសៀលថ្ងៃទី ៦ ខែមេសា ឆ្នាំ២០២១…
រាជធានីភ្នំពេញ ៖ រដ្ឋមន្ត្រីក្រសួងសុខាភិបាល ឯកឧត្តម ម៉ម ប៊ុនហេង នារសៀលថ្ងៃទី ៦ ខែមេសា ឆ្នាំ២០២១ បានផ្ញើលិខិតជូនដល់អភិបាលនៃគណៈអភិបាលរាជធានី-ខេត្ត ឱ្យត្រៀមបំរុងបង្កើតក្រុមគ្រូពេទ្យថែទាំ និងព្យាបាលនៅតាមផ្ទះ សម្រាប់អ្នកជំងឺកូវីដ-១៩ ដែលការសម្រេចនេះ គឺដើម្បីជួយសម្រាលបន្ទុកមន្ទីរពេទ្យរដ្ឋនានា ក្នុងរាជធានី-ខេត្ត ដោយសារតែការរកឃើញករណីវិជ្ជមានកូវីដ-១៩ បន្តរកឃើញមានចំនួនច្រើនជារៀងរាល់ថ្ងៃ ។
នៅក្នុងលិខិត ឯកឧត្តម ម៉ម ប៊ុនហេង បានបញ្ជាក់ជូនអភិបាលនៃគណៈអភិបាលរាជធានី-ខេត្ត ថា «ក្រសួងស្នើឱ្យត្រៀមបំរុងបង្កើតក្រុមគ្រូពេទ្យថែទាំង និងព្យាបាលនៅតាមផ្ទះ សម្រាប់អ្នកជំងឺកូវីដ-១៩ ដែលគ្មានរោគសញ្ញា និងករណីជំងឺស្រាល ក្នុងលក្ខខណ្ឌដែលមានការរាតត្បាតធ្ងន់ធ្ងរជាយថាហេតុ ដែលហួសពីចំណុះនៃមន្ទីរពេទ្យរដ្ឋ ឬកន្លែងព្យាបាល ដែលឯកឧត្តម លោកជំទាវ បានរៀបចំរួចជាស្រេចហើយ ។ ការត្រៀមបំរុងនេះ ត្រូវយកក្រុមគ្រូពេទ្យនៅតាមមូលដ្ឋានសុខាភិបាលផ្ទាល់របស់ខ្លួន ដោយរៀបចំជាក្រុម និងដឹកនាំដោយប្រធានការិយាល័យសុខាភិបាលស្រុកប្រតិបត្តិ»។ រដ្ឋមន្ត្រីក្រសួងសុខាភិបាលបានបន្តថា ក្រសួងនឹងធ្វើការបណ្តុះបណ្តាលក្រុមគ្រូពេទ្យទាំងអស់ ដោយអនុវត្តតាមនីតិវិធីប្រតិបត្តិស្តង់ដា (SOP) ដែលក្រសួងនឹងរៀបចំជូន ។
សូមរម្លឹកថា នៅក្នុងសារសម្លេងពិសេសរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជានៅព្រឹកថ្ងៃទី ៦ ខែមេសា ឆ្នាំ ២០២១ សម្តេចបានបញ្ជាក់ថា ការត្រៀមបំរុងឱ្យព្យាបាលអ្នកជំងឺកូវីដ-១៩ កំរិតស្រាលនៅតាមផ្ទះ ចាំបាច់ត្រូវត្រៀមឱ្យរួចរាល់ បើសិនជាការឆ្លងក្នុងស្រុកបន្តមានសញ្ញាមិនធូរស្បើយ ។ សម្តេចតេជោ មានប្រសាសន៍បញ្ជាក់ថា «ឥឡូវនេះគឺ យើងត្រូវព្យាករណ៍សភាពការណ៍ជាមុន អំពីសមត្ថភាពទ្រទ្រង់បាននៃមន្ទីរពេទ្យ របស់យើង ។ បើសិនជាជំងឺមិនថមថយទេនោះ គឺមន្ទីរពេទ្យរបស់យើងនឹងពេញហៀរ ជោរជន់ទៅដោយអ្នកជំងឺ ទាំងស្រាល ទាំងធ្ងន់ ។ ដូច្នេះ គឺយើងត្រូវមានការរៀបចំមួយ ដោយយកវិធីសាស្ត្រតាមបណ្តាប្រទេសដែលមានអ្នកជំងឺច្រើន រាបទាំងអ្នកដែលនៅអាមេរិក បារាំង អឺរ៉ុប និងប្រទេសមួយចំនួនទៀត ដែលមានអ្នកជំងឺលើសពីចំនួន ពេទ្យ ដែលអាចទទួលបាន» ។ សម្តេចលោកមានប្រសាសន៍បន្តថា កន្លងមក ដូចជាករណីមន្ត្រីការទូតរបស់យើងពីរនាក់ ឆ្លងកូវីដ នៅប្រទេសបារាំង មន្ទីរពេទ្យគេមិនទទួលឱ្យការព្យាបាលទេ គឺគេឱ្យត្រឡប់មកព្យាបាលតាមផ្ទះវិញ ។
សម្តេចតេជោ នាយករដ្ឋមន្ត្រីបានបន្ថែមថា «ដូច្នេះខ្ញុំសុំស្នើឱ្យក្រុមការងាររបស់យើងរៀបចំ នូវក្រមប្រតិបត្តិ សម្រាប់ការព្យាបាលនៅតាមផ្ទះឱ្យហើយស្រេច ហើយដល់ពេលណាមួយ យើងត្រូវពិនិត្យអំពីលទ្ធភាពក្នុងការទទួលយក មកព្យាបាលនៅក្នុងមន្ទីរពេទ្យ និងទុកសម្រាប់ការព្យាបាលនៅតាមផ្ទះ យើងមិនអាចទទួលអស់ទេ ក្នុងករណីមានការកើនឡើងថែមទៀត អ្នកជាតិច អ្នកចូលច្រើន ទោះបីយើងរៀបចំមន្ទីរពេទ្យប៉ុន្មានទៀត ក៏វានៅតែមិនគ្រប់ដែរ ។ អ៊ីចឹងវិធីដោះស្រាយមានតែទុក អ្នកមានវិជ្ជមានកូវីដ ប៉ុន្តែស្រាល ទុកព្យាបាលនៅតាមផ្ទះទៅវិញ ប៉ុន្តែត្រូវតែមានការវិនិច្ឆ័យឱ្យបានច្បាស់ »។
សម្តេចតេជោ ក៏បានផ្តល់ជាយោបល់ថា គឺត្រូវទុកអ្នកជំងឺកូវីដ-១៩ ព្យាបាលនៅតាមផ្ទះ គឺ ត្រូវតែជាអ្នកដែលមានជំងឺស្រាល ហើយមានផ្ទះសមរម្យ ដែលអាចព្យាបាលបាន ចាំយើងទុកនៅតាមផ្ទះ ។ ប៉ុន្តែបើសិនជាអ្នកនោះ មានជំងឺធ្ងន់ យើងមិនអាចទុកនៅតាមផ្ទះទេ គឺត្រូវយកមកទុកនៅមន្ទីរពេទ្យ ។ មួយទៀតបើផ្ទះរបស់អ្នកជំងឺ មានទំហំតូច ដែលអាចឆ្លងរាលដាលដល់ទៅក្រុមគ្រួសារ ត្រូវតែយកគាត់មកកាន់មន្ទីរពេទ្យដែរ ។ សម្តេចក៏បានបញ្ជាក់ថា សម្តេចយល់ថាយ៉ាងហោចណាស់យើងមាន ៥០% នៃអ្នកជំងឺ ដែលមានលទ្ធភាពព្យាបាលនៅតាមផ្ទះ ហើយក៏ចង់ព្យាបាលនៅតាមផ្ទះដែរ ។
បន្ថែមពីលើនេះ អ្នកជំងឺកំរិតស្រាលដែលនឹងត្រូវទុកឱ្យសម្រាកព្យាបាលនៅតាមផ្ទះ សម្តេចនឹងផ្តល់ការឧបត្ថម្ភ ២ ម៉ឺនរៀលសម្រាប់ថ្លៃម្ហូបអាហារ ដូច្នេះអ្នកផ្ទះដែលមានអ្នកជំងឺសម្រាកព្យាបាល អាចបំប៉នអ្នកជំងឺបានល្អប្រសើរផងដែរ ។
សូមបញ្ជាក់ថា គិតត្រឹមព្រឹកថ្ងៃទី ៦ ខែមេសា កម្ពុជាមានករណីវិជ្ជមានកូវីដ ១៩ សរុប ២៨២៤ នាក់ អ្នកជាសះស្បើយចំនួន ១៧៩៤ នាក់ ស្លា.ប់ ២២ នាក់ និងកំពុងសម្រាលព្យាបាលមានចំនួន ១០០៣ នាក់ ៕
ចែករំលែកព័តមាននេះ