រាជធានីភ្នំពេញ ៖ ក្រសួងសុខាភិបាលបានប្រកាសនៅមុននេះបន្តិចថា មានបុរសជនជាតិខ្មែរម្នាក់ អាយុ៣៥ឆ្នាំ បានទទួលមរណភាព ដោយសារជំងឺកូវីដ – ១៩ មន្ទីរពេទ្យមិត្តភាពខ្មែរ-សូវៀត ។
ក្រសួងសុខាភិបាល បញ្ជាក់នៅថ្ងៃទី ៦ ខែមេសា នេះថា យោងតាមរបាយការណ៍ពីមន្ទីរពេទ្យមិត្តភាពខ្មែរ-សូវៀត បានឱ្យដឹងថា បុរសជនជាតិខ្មែរអាយុ ៣៥ឆ្នាំ ដែលរស់នៅភូមិឫស្សីចក ឃុំព្រៃគ្លេស ស្រុកមេសាង ខេត្តព្រៃវែង បានស្លាប់បាត់បង់ជីវិតមុនពេលមកដល់មន្ទីរពេទ្យមិត្តភាពខ្មែរ នាថ្ងៃទៅ ៥ ខែមេសា ឆ្នាំ២០២១ វេលាម៉ោង ១០:២០នាទីព្រឹក ។
អ្នកជំងឺចូលមកដល់មន្ទីរពេទ្យខ្មែរ សូវៀត នាថ្ងៃទី០៥ ខែមេសា ឆ្នាំ២០២១ វេលាម៉ោង១០:២០នាទីព្រឹក ក្នុងស្ថានភាពសន្លប់ បាត់បង់ស្មារតី និងគ្មានសញ្ញាជីវិត ប៉ុន្តែក្រុមគ្រូពេទ្យបានព្យាយាមជួយសង្គ្រោះតាមលក្ខណៈបច្ចេកទេស ដោយធ្វើចលនាបេះដូងអស់រយៈពេល២០នាទី ប៉ុន្តែនៅតែមិនអាចជួយសង្គ្រោះអ្នកជំងឺឱ្យរួចផុតពីសេចក្តីស្លាប់បាន ដោយមានការសង្ស័យក្រុមគ្រូពេទ្យបានយកសំណាករបស់សព ដើម្បីធ្វើការវិភាគរកវីរុសកូវីដ-១៩ ជាលទ្ធផលបានបញ្ជាក់ វិជ្ជមានវីសេកូដ -១៩ ។
ការសន្និដ្ឋានរបស់ក្រុមគ្រូពេទ្យ ៖ បុរសជនជាតិខ្មែរអាយុ ៣៥ឆ្នាំ ខាងលើនេះបានស្លាប់បាត់បង់ជីវិតមុនពេលចូលមកដល់មន្ទីរពេទ្យដោយសារជំងឺកូវីដ-១៩ (Mourant eritrant avec COVID-19) ក្រសួងសុខាភិបាល សូមចូលរួមចំណែកសោកស្តាយជាពន់ពេក និងសូមចូលរួមមរណទុក្ខយ៉ាងក្រៀមក្រំជាទី បំផុតជាមួយក្រុមគ្រួសារសព្វ ។ អាស្រ័យហេតុដូចបានជម្រាបជូនខាងលើនេះ សូមសាធារណជន មេត្តាជ្រាបជាព័ត៌មាន។
សូមបញ្ជាក់៖ គិតត្រឹមព្រឹក ថ្ងៃទី០៦ ខែមេសា ឆ្នាំ២០២១ អ្នកឆ្លងសរុប ២៨២៤ នាក់ អ្នកជាសះស្បើយ១៧៩៤ នាក់ អ្នកកំពុងព្យាបាល១០០៣ នាក់ អ្នកស្លា.ប់ដោយកូវីដ ១៩ កើនឡើងដល់ ២២ នាក់ ៕
ចែករំលែកព័តមាននេះ