រាជធានីភ្នំពេញ ៖ រហូតមកទល់ពេលនេះ សញ្ញានៃការបែកបាក់សម្ព័ន្ធជាប្តីប្រពន្ធរបស់អ្នកនាង សឿ សុធារ៉ា និងលោក សាពូន មីដាដា កាន់តែបើកចំហរជាសាធាណៈ ក្នុងពេលតារារូបនេះ បានប្រកាសបើកបេះដូងទទួលយកស្នេហាថ្មី និងលើកចុងក្រោយ។
ទាំង សឿ សុធារ៉ា និងលោក សាពូន មីដាដា មិនបានបង្ហើបឱ្យដឹងទេថា ស្នេហារបស់របស់ពួកគេបានឈានដល់ផ្លូវបំបែក។ កន្លងមក កោះសន្តិភាពក៏បានសាកសួរទៅកាន់អ្នកនាង សឿ សុធារ៉ា ពាក់ព័ន្ធពីបញ្ហាបែកបាក់គ្រួសារនេះផងដែរ ប៉ុន្តែតារារូបនេះនៅតែលាក់លៀមមិនបានបញ្ជាក់ឱ្យបានច្បាស់ឡើយ។
យ៉ាងណា ក្រដាសមិនអាចខ្ចប់ភ្លើងបានឡើយ ពោលគឺសញ្ញានៃការបែកបាក់រវាងនាង និងលោក សាពូន មីដាដា បានទម្លាយឱ្យមហាជនកាន់តែដឹង បន្ទាប់ពីអ្នកនាង សឿ សុធារ៉ា បានបង្ហោះសារពីការបើកបេះដូងទទួលយកស្នេហាថ្មី។
ជាថ្មីម្តងទៀត តារារូបនេះបានបង្ហោះសារតាមគណនេយ្យហ្វេសប៊ុករបស់ខ្លួនថា ក្នុងមួយជីវិតនេះ ខ្ញុំសុំរៀបការតែ២ដងទេបងប្អូនទាំងអស់គ្នា តែបើសិនជាការរៀបការលើកទីពីររបស់ខ្ញុំនៅតែទទួលបានភាពបរាជ័យទៀត បេះដូងខ្ញុំអាចគ្មានប្រអប់ចំពោះរឿងស្នេហាទៀតឡើយ។
នាងបញ្ជាក់ថា ស្នេហាថ្មីដែលនាងត្រូវការនោះ គឺនាងប្រាថ្នាតែបុរសដែលនៅកំលោះ ប៉ុណ្ណោះ។
គួរបញ្ជាក់ថា អ្នកនាង សឿ សុធារ៉ា និងលោក សាពូន មីដាដា បានភ្ជាប់ទំនាក់ទំនងស្នេហាជាប្តីប្រពន្ធអស់ជាច្រើនឆ្នាំ ដែលមកទល់បច្ចុប្បន្នអ្នកទាំងពីរទទួលបានចំណងដៃកូន២នាក់ហើយ ដោយកូនស្រីច្បងមានអាយុ១០ឆ្នាំ និងកូនប្រុសពៅទើបមានអាយុ៣ឆ្នាំប៉ុណ្ណោះ។
យ៉ាងណា គេនឹងរង់ចាំមើលថា អ្នកនាង សឿ សុធារ៉ា នឹងអាចស្វែងរកបុរសដែលនាងត្រូវចិត្តនឹងអាចស្អំបេះដូងរបស់នាងកុំឱ្យកំព្រាឯកាដូចមុនឬយ៉ាងណា?
ចែករំលែកព័តមាននេះ