ខេត្តព្រះសីហនុ ៖ បើតាមសេចក្តីរាយការណ៍បឋមឲ្យដឹងថា មានមន្ត្រីយោធាមូលដ្ឋានសមុទ្ររាម ចំនួន៤នាក់បានរងរបួសធ្ងន់-ស្រាល និង២នាក់ទៀតបាត់ខ្លួន ដោយសារតែការឆាបឆេះអូរប័រមួយគ្រឿងនៅលើផ្ទៃសមុទ្រ (រាម) ស្ថិតក្នុងក្រុង-ខេត្តព្រះសីហនុ កាលពីវេលាម៉ោង១និង២០នាទី ថ្ងៃទី៥ ខែមេសា ឆ្នាំ២០២១ នេះ ។
សេចក្តីរាយការណ៍បន្តទៀតថា មន្ត្រីយោធាមូលដ្ឋានសមុទ្ររាមទាំង៤នាក់ដែលរងរបួសមាន ៖ ១-ឈ្មោះ យស់ ផាន់ណារ៉ា ប្រធានបច្ចេកទេស (របួសធ្ងន់) ២-ឈ្មោះ កែវ វណ្ណារ៉ា (រងរបួសស្រាល) ៣-ឈ្មោះ ហោ ភ័ក្ត្រា (រងរបួសស្រាល) និង៤-ឈ្មោះ ជួន រឹទ្ធី (រងរបួសស្រាល) ។ ចំណែកមន្ត្រីយោធា២នាក់ទៀត ដែលបាត់ខ្លួននោះ ម្នាក់ឈ្មោះ សុខ រស្មី និងម្នាក់ទៀតឈ្មោះ កែវ ចាន់ដារ៉ា ។
ទាក់ទិនករណីខាងលើនេះ បើតាមប្រភពព័ត៌មានបឋមបានឲ្យដឹងថា នៅវេលាម៉ោងខាងលើ មន្ត្រីយោធាមូលដ្ឋានសមុទ្ររាមចំនួន៦នាក់ បានចេញប្រតិបត្តិការល្បាតលើផ្ទៃសមុទ្រ ដោយមធ្យោបាយជិះអូរប័រមួយគ្រឿង ។ លុះបើកទៅដល់ចំណុចទល់មុខទីបញ្ជាការសន្តិសុខលំហសមុទ្ររាម ចម្ងាយពីច្រាំងប្រហែ៤ ម៉ៃ ជិតកោះស្រមោច ក៏ស្រាប់តែមានករណីផ្ទុះឆេះអូរប័រនោះតែម្តង បណ្តាលឲ្យមនុស្សចំនួន៦នាក់ ដែលសុទ្ធតែជាយោធាមូលដ្ឋានរាម រងរបួស និងបាត់ខ្លួន ។
ប្រភពដដែលបន្តថា ពេលនេះ ជនរងគ្រោះដែលរលាកភ្លើងធ្ងន់-ស្រាលចំនួន៤នាក់ ត្រូវបានអង្គភាព ដឹកបញ្ជូនមកសង្គ្រោះនៅមន្ទីរពេទ្យរាជធានីភ្នំពេញ ដោយឡែកជនរងគ្រោះចំនួន២នាក់ទៀតកំពុងតែបាត់ខ្លួននៅក្នុងសមុទ្រ ក៏ត្រូវបានអង្គភាពកំពុងតែបន្តស្វែងរកដែរ ។
ចំណែករឿងហេតុពាក់ព័ន្ធនឹងអូប័រ១គ្រឿងត្រូវឆាបឆេះខូចខាតស្ទើទាំងស្រុង ដែលករណី នេះ អង្គភាពបាននិងកំពុងធ្វើការស្រាវជ្រាវរកមូលហេតុ ។ ហើយមកដល់ពេលនេះ ក្រុមការងារទីបញ្ជារការជួរមុខសន្តិសុខលំហរសមុទ្រ និងមូលដ្ឋានកងទ័ពជើងទឹករាម បាននិងកំពុងបន្តចេញស្វែងរកមន្ត្រីយោធា២នាក់ដែលបាត់ខ្លួននោះផងដែរ ៕
ចែករំលែកព័តមាននេះ