អ្នកបើកបរ និងអ្នកធ្វើដំណើរក្នុងក្រុងភ្នំពេញ នឹងបានទស្សនារូបភាពតារាភាពយន្តថៃល្បីៗមួយចំនួននៅតាមដងផ្លូវ នៅក្នុងកម្មវិធីយុទ្ធនាការផ្សព្វផ្សាយចល័តរបស់ទូរទស្សន៍PNN ។
រូបភាពកំពូលតារាល្បីៗដែលរួមមាន លោកណាដេត (Nadech) កញ្ញា យ៉ាយ៉ា(Yaya) និង លោកជេមស៍ (James) ត្រូវបានបិទបង្ហាញលើរថយន្ត ដើម្បីផ្សព្វផ្សាយខ្សែភាពយន្តភាគថៃថ្មីរបស់ទូរទស្សន៍ PNN មានដូចជារឿងចិត្តស្អប់បង្កប់ស្នេហ៍, ព្យុះជីវិតក្នុងភ្លើងសង្គ្រាម និងរឿងម្ចាស់គ្រងធរណី។
រថយន្តផ្សព្វផ្សាយខ្សែភាពយន្តនេះ នឹងធ្វើដំណើរជុំវិញទីក្រុងភ្នំពេញ ដែលជាផ្នែកមួយនៃយុទ្ធនាការទីផ្សារ ហើយក្នុងនោះក៏មានការផ្សព្វផ្សាយនៅលើទំព័រកាសែត វិទ្យុ និងផ្ទាំងប៉ាណូផងដែរ។
លោកគិត ខេមរារិទ្ធ ប្រធានផ្នែកលក់ និងទីផ្សារទូរទស្សន៍ PNN បានមានប្រសាសន៍ថា «យើងសង្ឃឹមថា ការបង្ហាញរូបភាពតារាល្បីៗទូទាំងទីក្រុងភ្នំពេញនេះ នឹងធ្វើឲ្យប្រជាពលរដ្ឋមានអារម្មណ៍សប្បាយរីករាយ ហើយក៏ជាការកម្សាន្តមួយផងដែរ សម្រាប់អ្នកធ្វើដំណើរនៅតាមដងផ្លូវ។ បច្ចុប្បន្នយើងក៏កំពុងតែផ្សព្វផ្សាយខ្សែភាពយន្តភាគល្បីៗរបស់យើងជាបន្តបន្ទាប់ផងដែរ»។
ខ្សែភាពយន្តភាគដែលកំពុងចាក់បញ្ចាំងនៅលើទូរទស្សន៍ PNN ក្នុងម៉ោងពិសេស នាពេលបច្ចុប្បន្ន មានដូចជា រឿងស្រមោលឫស្យា, ចិត្តស្អប់បង្កប់ស្នេហ៍ និងព្យុះជីវិតក្នុងភ្លើងសង្គ្រាម។ រឿងស្រមោលឫស្យាចាក់ផ្សាយនៅម៉ោង៧ល្ងាចរៀងរាល់ថ្ងៃច័ន្ទ និងអង្គារ រឿងចិត្តស្អប់បង្កប់ស្នេហ៍ ចាក់ផ្សាយនៅម៉ោង៧ល្ងាចរៀងរាល់ថ្ងៃពុធ ព្រហស្បតិ៍ និងសុក្រ រឿងព្យុះជីវិតក្នុងភ្លើងសង្គ្រាមចាក់ផ្សាយរៀងរាល់ថ្ងៃសៅរ៍ និងអាទិត្យ និងរឿងម្ចាស់គ្រងធរណី ចាក់ផ្សាយនៅវេលាថ្ងៃត្រង់ម៉ោង១១:៣០-១២:៣០ រៀងរាល់ថ្ងៃច័ន្ទដល់សុក្រ។
រឿងស្រមោលឫស្យាគឺជាខ្សែភាពយន្តភាគគំនុំស្នេហាសងសឹក និងវិបត្តិគ្រួសារដែលកើតចេញពីការមិនខ្វាយខ្វល់យកទុកចិត្តទុកដាក់របស់ស្វាមីចំពោះក្រុមគ្រួសារ និងរឿងចិត្តស្អប់បង្កប់ស្នេហ៍ គឺជាខ្សែភាគយន្តភាគមនោសញ្ចេតនាស្នេហាដែលនិយាយអំពីការស្រឡាញ់ និងស្អប់រវាងកម្លោះសង្ហា James និងកញ្ញាដ៏ស្រស់ស្អាត Yaya ដែលជម្លោះរបស់ពួកគេក្រោយមកក៏ក្លាយទៅជាសេចក្តីសេ្នហា។ ចំណែកឯរឿងព្យុះជីវិតក្នុងភ្លើងសង្គ្រាម វិញ គឺជាខ្សែភាពយន្តភាគបែបបុរាណដែលអប់រំមនុស្សឲ្យចេះរូបរួមសាមគ្គីគ្នា ដើម្បីយកជ័យជំនះលើរាល់ឧបសគ្គ និងទុក្ខលំបាកទាំងអស់ និងខ្សែភាពយន្តភាគថ្ងៃត្រង់របស់ទូរទស្សន៍ PNN ដែលសម្តែងដោយលោក Nadech និងកញ្ញា Yaya នោះ គឺខ្សែរឿងដែលរៀបរាប់អំពីជីវិតអ្នកចំការដែលពួកគេមានកាតព្វកិច្ច និងភារកិច្ចទទួលថែរក្សាមរតកដីចំការពីលោកយាយរបស់ពួកគេ។ ខ្សែភាពយន្តនេះ ក៏ជារឿងពិតរបស់មនុស្សដែលមានទាំងសប្បាយ និងជួនកាលប្រែពីភាពសោកសៅទៅជារឿងរំភើបចិត្តមួយ រហូតដល់ស្រក់ទឹកភ្នែក ។ ប៉ុន្តែក្រោយមកពួកគេរីករាយជាមួយនឹងភាពជោគជ័យនេះ ហើយក៏ជារង្វាន់មួយសម្រាប់ការតស៊ូរបស់ពួកគេផងដែរ។
ប្រធានគ្រប់គ្រងកម្មវិធីទូរទស្សន៍ PNN កញ្ញា ទូច បុប្ផា បានមានប្រសាសន៍ថា «យើងមានខ្សែភាពយន្តភាគល្បីៗជាច្រើនសម្រាប់ចែកជូនដល់ទស្សនិកជនដូចជាភាពយន្តភាគសម័យបុរាណ ភាពយន្តភាគមនោសញ្ចេតនាស្នេហា និងភាពយន្តភាគបែបកំប្លុកកំប្លែងជាដើម»។
ខ្សែភាពយន្តភាគថៃល្បីៗរបស់ទូរទស្សន៍ PNN បានទាក់ទាញទស្សនិកជនជាច្រើនចាប់តាំងពីទូរទស្សន៍ធ្វើការចាក់ផ្សាយជាផ្លូវការរបស់ខ្លួនកាលពីថ្ងៃទី១១ ខែកក្កដា។
ចែករំលែកព័តមាននេះ