ព្រះបរមពោធិសត្វនៃយើងដែលបានត្រាស់ដឹងនូវអរិយសច្ចៈក្លាយជាព្រះសម្មាសម្ពុទ្ធប្រសើរផុតមនុស្សនិងទេវតាទាំងឡាយក៏ព្រោះព្រះអង្គបានកសាងបញ្ញាបារមីអស់រាប់សែនអសង្ខេយ្យនោះឯង បញ្ញាជាកម្លាំងដ៏ប្រសើរខ្ពង់ខ្ពស់ បញ្ញារមែងនាំមកនូវសេចក្តីចម្រើនគ្រប់ៗកាល ។
ដូចពុទ្ធភាសិតត្រាស់ថា តំ ពលានំ ពលំ សេដ្ឋំ អគ្គំ បញ្ញាពលំ បញ្ញាពលេនុបត្ថម្ភោ អត្ថំ វិន្ទតិ បណ្ឌិតោ » កម្លាំងបញ្ញាជាកម្លាំងដ៏ប្រសើរ ជាកម្លាំងខ្ពង់ខ្ពស់ជាងកម្លាំងទាំងឡាយ បណ្ឌិតដែលមានកម្លាំងបញ្ញាជ្រោមជ្រែងហើយ រមែងបាននូវសេចក្តីចម្រើនគ្រប់កាលទាំងពួង ។
ហេតុនេះចូរអ្នកទាំងឡាយធ្វើកិច្ចការអ្វីក៏ដោយ សូមធ្វើដោយបញ្ញា យកបញ្ញាជាធំ ត្រិះរិះពិចារណាឱ្យបានល្អិតល្អន់ដោយបញ្ញាមុននឹងសម្រេចកិច្ចការអ្វីៗ ៕ សាន សារិន
ចែករំលែកព័តមាននេះ