ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា យុវជនមួយក្រុមនាំគ្នាមកអង្គុយផឹកទឹកត្នោតជូរ ក៏ត្រូវយុវជន១ក្រុមទៀតដេញកាប់រត់ចែកជើងគ្នា ដោយសារតែគុំកួន លុះនៅយប់ស្អែកឡើងក្រុមយុវជនដែលត្រូវគេដេញកាប់នោះ ក៏បានយកកាំបិត ពូថៅ ទៅអង្គុយផឹកកន្លែងដដែល ដើម្បីរង់ចាំសងសឹកវិញ តែក៏ត្រូវសមត្ថកិច្ចឃាត់ខ្លួនបានទាំង៤នាក់តែម្តង បង្កឱ្យមានការភ្ញាក់ផ្អើលកាលពីវេលាម៉ោង១១និង៤០នាទី ថ្ងៃទី០៤ ខែមេសា ឆ្នាំ២០២១ នៅចំណុចជើងភ្នំដូងព្រះ ស្ថិតក្នុងភូមិ-សង្កាត់អូរអំបិល ក្រុងសិរីសោភ័ណ។
បើតាមលោកវរសេនីយ៍ត្រី យ៉ាន់ សុវណ្ណ មេបញ្ជាការកងរាជអាវុធហត្ថក្រុងសិរីសោភ័ណ បានប្រាប់ថា យុវជនទាំង៤នាក់ដែលត្រូវឃាត់ខ្លួនខាងលើមាន ១.ឈ្មោះ សំណាង ជ័យ ភេទប្រុស អាយុ២១ឆ្នាំ ២.ឈ្មោះ ពៀត ពឿយ ភេទប្រុស អាយុ២១ឆ្នាំ ៣.ឈ្មោះ ខ្លី ចូវ ភេទប្រុស អាយុ១៧ឆ្នាំ និង៤.ឈ្មោះ គា ដែន ភេទប្រុស អាយុ២៤ឆ្នាំ ក្រុមយុវជនទាំង៤នាក់នេះ រស់នៅភូមិបែកចាន សង្កាត់ម្កាក់ ក្រុងសិរីសោភ័ណ។
លោកបានបញ្ជាក់ថា នៅមុនពេលឃាត់ខ្លួនក្រុមយុវជនខាងលើ គឺកម្លាំងសមត្ថកិច្ចបានទទួលព័ត៌មានថា មានយុវជន១ក្រុមប្រដាប់ដោយដាវ និងកាំបិត ពូថៅ បានអង្គុយផឹកទឹកត្នោតជូរ រង់ចាំកាប់ទៅលើយុវជន១ក្រុមទៀតដែលដេញកាប់ពួកគេ ។ បន្ទាប់ពីទទួលបានព័ត៌មានភ្លាម កម្លាំងកងរាជអាវុធហត្ថក្រុងសិរីសោភ័ណ បានចុះទៅបង្ក្រាប ក៏ឃាត់ខ្លួនបានយុវជន៤នាក់ និងដកហូតបានដាវ១ កាំបិតឆ្នៃ១ ពូថៅ១ ចំពាមកៅស៊ូ១ផងដែរ ។
លោកវរសេនីយ៍ត្រី យ៉ាន់ សុវណ្ណ បានបញ្ជាក់ថា ក្រោយពេលឃាត់ខ្លួនទាំង៤នាក់ រួចនាំយកសាកសួរ តាមចម្លើយសារភាពថា មូលហេតុដែលពួកគេយកកាំបិត ពូថៅតាមជាប់ខ្លួន ព្រោះកាលយប់ថ្ងៃទី០៣ ខែមេសា ឆ្នាំ២០២១នោះ នៅចំណុចតូបលក់ទឹកត្នោតជូរជើងភ្នំដូងព្រះ ស្ថិតភូមិ-សង្កាត់អូរអំបិល ក្រុងសិរីសោភ័ណ មានយុវជន១ក្រុមផ្សេងទៀត បានជិះម៉ូតូ៣គ្រឿងដេញកាប់ពួកគេ ធ្វើឱ្យពួកគេរត់ចែកជើងគ្នាតែម្តង ។ ហើយដោយសារតែមានការគុំកួន ទើបពួកគេនាំគ្នាកាន់កាំបិត ពូថៅមកផឹកម្តងទៀត ដើម្បីរង់ចាំសងសឹកនឹងយុវជន១ក្រុមដែលកាប់ខ្លួនថ្ងៃមុននោះ តែក៏ត្រូវសមត្ថកិច្ចចាប់ខ្លួនតែម្តង។
ដោយយោងតាមចម្លើយសារភាពរបស់យុវជនទាំង៤នាក់នេះ ក៏ត្រូវបានសមត្ថកិច្ចកសាងសំណុំរឿង រួចបញ្ជូនទៅសាលាដំបូងខេត្ត ដើម្បីចាត់ការតាមច្បាប់៕
ចែករំលែកព័តមាននេះ