ខេត្តព្រះសីហនុ ៖ លោក ហ៊ឹន ត្រឹង ហៅវណ្ណា រួមជាមួយមេធាវី និងអ្នកពាក់ព័ន្ធម្នាក់ទៀត ត្រូវបានកម្លាំងសមត្ថកិច្ចកងរាជអាវុធហត្ថខេត្តព្រះសីហនុ ឃាត់ខ្លួនជាបន្តបន្ទាប់កាលពីថ្ងៃទី១ និងថ្ងៃទី២ ខែមេសា ឆ្នាំ២០២១ ដោយសង្ស័យពាក់ព័ន្ធនឹងទឹកប្រាក់រាប់លានដុល្លារ នេះបើយោងតាមការបង្ហើបព័ត៌មានបឋមពីលោកឧត្តមសេនីយ៍ត្រី ហេង ប៊ុន ទី មេបញ្ជាការកងរាជអាវុធហត្ថខេត្តព្រះសីហនុ បានប្រាប់បណ្តាញសារព័ត៌មានកាលពីរសៀលថ្ងៃទី៣ ខែមេសានេះ។
លោកឧត្តមសេនីយ៍ត្រី ហេង ប៊ុន ទី មេបញ្ជាការកងរាជអាវុធហត្ថខេត្តព្រះសីហនុ ប្រាប់បណ្តាញសារព័ត៌មានថា ជនសង្ស័យឈ្មោះ ហ៊ិន ត្រឹង ហៅវណ្ណា ភេទប្រុស អាយុ៤៥ឆ្នាំ មុខរបរអាជីវករ និងជាអ្នកបំរើការងារឱ្យឧកញ៉ាល្បីឈ្មោះម្នាក់ប្រចាំនៅខេត្តព្រះសីហនុ រួមជាមួយអ្នកពាក់ព័ន្ធចំនួន០២នាក់ផ្សេងទៀត បាននិងកំពុងឃាត់ខ្លួនសាកសួរទៅតាមនីតិវិធីនៅទីបញ្ជាការដ្ឋានកងរាជអាវុធខេត្ត តាមដីកាបញ្ជាឲ្យចូលខ្លួន លេខ ០៧ អ.យុង/២១ របស់អយ្យការអមសាលាដំបូងខេត្តព្រះសីហនុ ចុះថ្ងៃទី៣១ ខែមីនា ឆ្នាំ២០២១ ចេញដោយលោក ពេញ ពិសិដ្ឋ ព្រះរាជអាជ្ញារងអមសាលាដំបូងខេត្តព្រះសីហនុ ដោយជាប់ ពាក់ព័ន្ធករណី ឆបោករំលោ.ភលើទំនុកចិត្ត និងកំហែងយក ដោយឱ្យធ្វើចត្តាឡីស័ករយៈពេល១៤ថ្ងៃសិន មុននឹងបញ្ជូនទៅកាន់សាលាដំបូងខេត្ត ដើម្បីចាត់ការទៅតាមនីតិវិធី។
បើតាមប្រភពឱ្យដឹងពីអ្នកស្និទ្ធស្នាលនឹងលោកឧកញ៉ា លឹម ហ៊ុយឡេង បានប្រាប់ថា ជនសង្ស័យខាងលើ គឺជាអ្នកបំរើការងារឱ្យឧកញ៉ា លឹម ហ៊ុយឡេង ត្រូវបានសមត្ថកិច្ចកងរាជអាវុធហត្ថខេត្តឃាត់ខ្លួនបានហើយ ។
ប្រភពដដែលបានបន្តថា បុគ្គលម្នាក់នោះ តែងតែតាំងខ្លួនជា ឧកញ៉ា ដូរឡានគ្រប់សេរី និងទើបទិញឡាន០២១ថែមមួយគ្រឿងទៀត មិនទាន់តែបានជិះក្តៅគូទផង ឥឡូវត្រូវឃុំខ្លួននៅបន្ទាយ PM នេះហើយ លទ្ធផល កូនឆ្មាចង់ស៊ីមេខ្លា (ឆ្លងស្ពានរួច រុះស្ពានចោល)។
ដោយឡែក បើយោងតាមលិខិតមួយច្បាប់របស់កងរាជអាវុធហត្ថខេត្តព្រះសីហនុ បានដាក់ជូនលោកអភិបាលខេត្តព្រះសីហនុ ដោយគោរពស្នើទៅលោកអភិបាលខេត្តសុំពិនិត្យ និងយកសំណាកលើជនសង្ស័យ ដើម្បីបន្តនីតិវិធី បញ្ជូនទៅសាលាដំបូងខេត្តព្រះសីហនុ។
ព័ត៌មានពិស្តារមានផ្សាយនៅលើកាសែតកោះសន្តិភាព ។
ចែករំលែកព័តមាននេះ