ខេត្តស្វាយរៀង ៖ អាជ្ញាធរខេត្តស្វាយរៀងសម្រេចយកសណ្ឋាគារនៃកាស៊ីណូម៉ុកបាយក្រុងបាវិតជាកន្លែងព្យាបាលអ្នកជំងឺកូវីដ-១៩ ។ដោយមើលឃើញពីស្ថានភាពជំងឺកូវីដ-១៩ ក្នុងព្រឹត្តិការណ៍សហគមន៍ ២០កុម្ភៈ នៅខេត្តស្វាយរៀង មានចំនួនកើនឡើងជាបន្តបន្ទាប់នោះ នៅព្រឹកថ្ងៃទី៣ ខែមេសា…
ខេត្តស្វាយរៀង ៖ អាជ្ញាធរខេត្តស្វាយរៀងសម្រេចយកសណ្ឋាគារនៃកាស៊ីណូម៉ុកបាយក្រុងបាវិតជាកន្លែងព្យាបាលអ្នកជំងឺកូវីដ-១៩ ។
ដោយមើលឃើញពីស្ថានភាពជំងឺកូវីដ-១៩ ក្នុងព្រឹត្តិការណ៍សហគមន៍ ២០កុម្ភៈ នៅខេត្តស្វាយរៀង មានចំនួនកើនឡើងជាបន្តបន្ទាប់នោះ នៅព្រឹកថ្ងៃទី៣ ខែមេសា ឆ្នាំ២០២១នេះ លោកលឹម សៀងហេង អភិបាលក្រុងបាវិត លោកវណ្ណ សុមុន្នី អភិបាលរងក្រុង ដឹកនាំមន្ត្រីរាជការសាលាក្រុង កម្លាំងនគរបាល កម្លាំងអាវុធហត្ថ ចុះសំអាតកន្លែងបន្ទប់រៀបចំត្រៀមទុកសម្រាប់ព្យាបាលអ្នកជំងឺកូវីដ_19 ។
បើតាមលោកអភិបាលក្រុងបានឲ្យដឹងថា នៅទីតាំងកាស៊ីណូបាវិតម៉ុកបាយ ក្រុងបាវិត ខេត្តស្វាយរៀង មានចំនួន២៨៨បន្ទប់បន្ថែមទៀត ដើម្បីត្រៀមដាក់ព្យាបាលអ្នកជំងឺកូវីដ-១៩ ។ ក្នុងបេសកកម្មចុះជួយសម្អាត និងរៀបចំបន្ទប់សណ្ឋាគារបាវិតម៉ុកបាយបានប្រើប្រាស់កម្លាំងសរុបចំនួន៦៥នាក់ ក្នុងនោះកម្លាំងប្រចាំបញ្ជាស្នងការដ្ឋាននគរបាលខេត្តចំនួន៣០នាក់ កម្លាំងអធិការដ្ឋាននគរបាលក្រុងបាវិត១៥នាក់ និងកម្លាំងកងរាជអាវុធហត្ថចំនួន២០នាក់។
សូមបញ្ជាក់ថា គិតត្រឹមថ្ងៃទី០៣ ខែមេសា ឆ្នាំ២០២១នេះ មានអ្នកកើតជំងឺកូវីដ-១៩ នៅក្នុងព្រឹត្តិការណ៍សហគមន៍២០ កុម្ភៈ នៅខេត្តស្វាយរៀង កើនដល់១០០នាក់ និងមានអ្នកជាសះស្បើយតែ២នាក់ប៉ុណ្ណោះ និងមានមន្ទីរពេទ្យចំនួន០២ គឺ ៖ មន្ទីរពេទ្យបង្អែកស្រុកស្វាយជ្រំ និងមន្ទីរពេទ្យបង្អែកសាមគ្គីរំដួលស្រុករំដួល កំពុងដាក់អ្នកជំងឺសម្រាកព្យាបាលចំនួន៩៨នាក់ផងដែរ ៕
ចែករំលែកព័តមាននេះ