ខេត្តស្វាយរៀង ៖ គ្រោះធម្មជាតិភ្លៀងខ្យល់កន្ត្រាក់បានបោកបក់បំផ្លាញផ្ទះ លោកយាយ វ័យ៧៨ឆ្នាំ បាក់រលំរាបដល់ដី ខូចខាតទាំងស្រុង ។
បើតាមសមត្ថកិច្ចបានឲ្យដឹងថា នៅវេលាម៉ោង២យប់រំលងអធ្រាត្រ ឈានចូលថ្ងៃទី០៣ ខែមេសា ឆ្នាំ២០២១ មានភ្លៀងធ្លាក់មួយមេធំលាយឡំនឹងខ្យល់កន្ត្រាក់ ធ្វើឲ្យប៉ះពាល់ដល់ផ្ទះប្រជាពលរដ្ឋមួយខ្នង នៅភូមិទាហានក្រោម សង្កាត់ស្វាយតឿ ក្រុងស្វាយរៀង ។
ជនរងគ្រោះ ឈ្មោះ ម៉ា ចន ភេទស្រី អាយុ៧៨ឆ្នាំ មានសមាជិកគ្រួសារចំនួន៤នាក់ ស្រី២នាក់ ត្រូវខ្យល់កន្ត្រាក់រលំផ្ទះដួលរាបដល់ដី បង្កឲ្យខូចខាតទាំងស្រុង ។
ប្រភពបន្តថា នៅយប់រំលងអធ្រាត្រឈានចូលថ្ងៃទី៣ មេសា២០២១ មានភ្លៀងមួយមេធំលាយឡំខ្យល់កន្ត្រាក់បោកបក់យ៉ាងខ្លាំងបង្កឲ្យរលំផ្ទះសម្បែងរបស់ប្រជាពលរដ្ឋ និងបាក់ដើមឈើមួយចំនួនក្នុងក្រុងស្វាយរៀង ។ ហើយនៅសង្កាត់ស្វាយរៀង ក្រុងស្វាយរៀងខ្យល់កន្ត្រាក់បានបោកបក់យ៉ាងខ្លាំង ធ្វើអោយរលំស្លាកទទួលពាក្យបណ្ដឹងរបស់ទីស្នាក់ការរដ្ឋសភាមណ្ឌលស្វាយរៀង មួយផ្ទាំង ស្ថិតនៅកែងផ្លូវខាងកើតវិទ្យាល័យស្វាយរៀងផងដែរ។
លោកក្រុមប្រឹក្សា សង្កាត់បានជូនដំណឹងនេះដល់ទីស្នាក់ការរដ្ឋសភាមណ្ឌលស្វាយរៀងរួចហើយ ។ អាជ្ញាធរក៏បានអំពាវនាវសូមឲ្យប្រជាពលរដ្ឋមានការប្រុងប្រយត្ន័ខ្ពស់ចំពោះភ្លៀង ផ្គរ ខ្យល់កន្ត្រាក់នេះ៕
ចែករំលែកព័តមាននេះ