ប្រទេសឥណ្ឌូណេស៊ី ៖ ប្រភពផ្លូវការមួយឲ្យដឹងថា ដោយផ្អែកតាមការដាក់ចេញនូវផែនការគោលនយោបាយសេដ្ឋកិច្ចរបស់រដ្ឋាភិបាលកាលពីសប្តាហ៍មុន ក្រសួងពាណិជ្ជកម្មនឹងជួយសម្រួលដល់ការធ្វើនិយ័តកម្ម
ប្រទេសឥណ្ឌូណេស៊ី ៖ ប្រភពផ្លូវការមួយឲ្យដឹងថា ដោយផ្អែកតាមការដាក់ចេញនូវផែនការគោលនយោបាយសេដ្ឋកិច្ចរបស់រដ្ឋាភិបាលកាលពីសប្តាហ៍មុន ក្រសួងពាណិជ្ជកម្មនឹងជួយសម្រួលដល់ការធ្វើនិយ័តកម្មនៃការនាំចេញនាំចូលទំនិញ ដើម្បីធ្វើឲ្យប្រសើរឡើងដល់បរិយាកាសជំនួញ និងធានាបាននូវមុខទំនិញកសិផលដែលត្រូវការចាំបាច់ ឬជាមូលដ្ឋានរបស់ជាតិ ។
ក្រុមអនិយ័តកម្ម(ការបន្ថយការត្រួតពិនិត្យរបស់រដ្ឋាភិបាល)របស់ក្រសួងសាមីដែលដឹកនាំដោយលោកស្រី Arlinda Imbang Jaya បានថ្លែងថា យ៉ាងហោចក៏មានការធ្វើនិយ័តកម្មចំនួន៣២ដែរដែលភាគច្រើនគឺជាការធ្វើកម្រិតថ្នាក់រដ្ឋមន្ត្រីដែលនឹងត្រូវបានកែប្រែដោយក្រសួងនៅខែតុលាឆ្នាំនេះ ។
ក្រសួងក៏នឹងកាត់បន្ថយការផ្តល់អាជ្ញាប័ណ្ណនាំចេញនិងនាំចូលយ៉ាងតិចក៏៣៨ដែរពីអាជ្ញាប័ណ្ណសរុបទាំងអស់ចំនួន១២១ដែលស្ថិតក្រោមសមត្ថកិច្ចរបស់ខ្លួន រាប់បញ្ចូលអាជ្ញាប័ណ្ណអ្នកនាំចេញដែលបានចុះបញ្ជីចំនួន៤ អ្នកនាំចូលដែលបានចុះបញ្ជីចំនួន២១ និងអាជ្ញាប័ណ្ណអ្នកនាំចូលផលិតផលផលិតកម្មចំនួន១៣ ។
លោកស្រីArlindaបានថ្លែងនៅក្នុងសន្និសីទរយៈពេលខ្លីមួយកាលពីថ្ងៃសុក្រនេះថា « យើងមានក្តីរំពឹងលើវិធានការនេះ នឹងបង្កើនលំហូរនៃទំនិញសម្រាប់ពាណិជ្ជកម្មនាំចូល-នាំចេញនិងការជួញដូរក្នុងស្រុកជាដើម ក៏ដូចជាដើម្បីធានាបាននូវការផ្គត់ផ្គង់ទំនិញនានានៅលើទីផ្សារហើយក៏គួរផ្សំនឹងការធ្វើឲ្យមានស្ថិរភាពនៃតម្លៃផងដែរ » ។
ឥណ្ឌូណេស៊ីបានចុះបញ្ជីនូវផលលើសផ្នែកពាណិជ្ជកម្មចំនួន៦,២២ប៊ីលានដុល្លារផងដែរក្នុងអំឡុងពេល៨ខែដំបូងនៃឆ្នាំ២០១៥នេះដែលសរុបទាំងការនាំចេញ និងនាំចូលធ្លាក់ចុះ១២,៧%និង១៨,៩៦%ពីមួយឆ្នាំទៅមួយឆ្នាំ ។
ការធ្លាក់ចុះនៃការនាំចេញនិងនាំចូលបានបង្ហាញឲ្យឃើញថា ឧស្សាហកម្មជាច្រើននៅក្នុងប្រទេសគឺនៅតែកំពុងប្រឈមនឹងការធ្លាក់ចុះដដែល ។ ហេតុដូច្នេះហើយការជួយសម្រួលនៅក្នុងការនាំចេញនិងនាំចូល ក៏នឹងត្រូវបានដាក់ស្នើលើទំនិញយុទ្ធសាស្ត្រដូចជា ៖ អង្ករ ស្ករ អំបិល និងផលិតផលដំណាំដាំដុះជាច្រើនទៀតជាមួយនឹងការជម្រុះចេញនូវតម្រូវការដែលជាសេចក្តីណែនាំពីបណ្តាក្រសួងដទៃ និងទីភ្នាក់ងារនានាសម្រាប់ផលិតផលនាំចេញនិងនាំចូល ។
លោកស្រីបានថ្លែងថា « យើងបានបញ្ចប់ការចរចាជាមួយបណ្តាក្រសួងពាក់ព័ន្ធដែលតែងតែផ្តល់អនុសាសន៍ដូចជាក្រសួងឧស្សាហកម្ម ក្រសួងកសិកម្ម ក្រសួងរ៉ែនិងថាមពល និងក្រសួងដទៃទៀត ។ មានគោលនយោបាយមួយចំនួនដែលចាំបាច់ត្រូវធ្វើការកែសម្រួលពីផ្នែកផ្សេងៗ របស់ពួកគេដើម្បីផ្លាស់ប្តូរឬជម្រុះចេញនូវការផ្តល់នូវអនុសាសន៍នេះ » ។
លោកស្រីបានបន្ថែមថា តាមរយៈការកែសម្រួលការនាំចូលក្រសួងរំពឹងថា ផ្នែកឧស្សាហកម្មគួរតែអាចមានភាពប្រសើរឡើងវិញចំពោះការប្រើប្រាស់វត្ថុធាតុដើម ។
យោងតាមទិន្នន័យពីទីភ្នាក់ងារស្ថិតិកណ្តាលបង្ហាញថា ការនាំចូលវត្ថុធាតុដើមបានកើនឡើង១៨,៧%ពីមួយខែទៅមួយខែឬស្មើនឹងទំហំទឹកប្រាក់៩,១៥ពាន់លានដុល្លារក្នុងខែសីហាដែលផ្ទុយស្រឡះពីការធ្លាក់ចុះ២១,៤%នៃខែមុន ។
នៅក្រោមការធ្វើនិយ័តកម្មថ្មីនេះ រដ្ឋាភិបាលនឹងធ្វើការវិនិច្ឆ័យទៅលើផលិតកម្មក្នុងស្រុក តម្រូវការរបស់ជាតិ និងបរិមាណនៃទំនិញនាំចូលនៅក្នុងការកំណត់លក្ខខណ្ឌនៃជំនួប និងការសម្របសម្រួលជាមួយក្រសួងពាក់ព័ន្ធ ។
ទាក់ទិននឹងការនាំចូលអង្ករ ទីភ្នាក់ងារភស្តុភាររដ្ឋ(Bulog) បានលើកឡើងមុននេះថា អង្ករដែលបានទំនុកបម្រុងក្នុងស្តុករបស់ជាតិ នឹងខិតជិតដល់ការប្រើអស់នៅដំណាច់ឆ្នាំនេះស្របពេលដែលនៅក្នុងឃ្លាំងស្តុកទុកមានចំនួន៦២.០០០តោន ខណៈដែលវាត្រូវការ១,៥លានតោនទៅ២លានតោន ដើម្បីសម្រេចបានតាមតម្រូវការនៅឆ្នាំក្រោយ ។ រីឯផលប៉ះពាល់នៃគ្រោះធម្មជាតិ El Nino លើផលិតកម្មក៏បានលេចឡើង បើទោះជារដ្ឋមន្ត្រីកសិកម្មលោក Amran Sulaiman បានលើកឡើងពីភាពជឿជាក់របស់លោកនៅការមិននាំចូលអង្ករក្នុងឆ្នាំនេះក៏ដោយ ។
ទាក់ទិននឹងការនាំចូលអំបិល លោកស្រី Arlinda បានថ្លែងថា ក្រសួងនឹងបោះបង់ចោលនូវតម្រូវការចំពោះអាជ្ញាប័ណ្ណនាំចូលនិងអាជ្ញាប័ណ្ណនាំចូលផលិតផលផលិតកម្ម ដោយការលើកឡើងថា តម្រូវការទាំងនេះនឹងត្រឹមតែត្រូវបានដាក់ស្នើលេខសម្គាល់របស់បណ្តាអ្នកនាំចូលផលិតផលផលិតកម្មតែប៉ុណ្ណោះ ។
ប្រហាក់ប្រហែលនឹងការជួយសម្រួលលើការនាំចូលនេះដែរក៏នឹងត្រូវបានដាក់លើមុខទំនិញដទៃទៀតដូចជាដែកថែប ជាមួយនឹងការបោះបង់ចោលលេខសម្គាល់ពន្ធនិងតម្រូវការឯកសារស្នើសុំអាជ្ញាប័ណ្ណជាដើម ។
តាមការឲ្យដឹងពីលោកស្រី Arlinda នីតិវិធីនៃការនាំចូលនិងនាំចេញ ក៏នឹងអាចរកបាននៅតាមបណ្តាញអីុធើរណេតដែលនឹងចាប់ផ្តើមនៅខែតុលានេះផងដែរ ។
ជាមួយនឹងការសម្រួលនេះដែរ ក្រសួងក៏នឹងនៅតែគ្រប់គ្រងលំហូរចូលនៃទំនិញនាំចូលតាមរយៈការដាក់កាតព្វកិច្ចដល់បណ្តាអ្នកនាំចូលនានាដើម្បីជួយលើកកម្ពស់គោលនយោបាយនេះនៅសលាកបត្រផលិតផលនាំចូល មុននឹងឥណ្ឌូណេស៊ីលក់ចេញរបស់ទាំងនោះ ៕
ចែករំលែកព័តមាននេះ