ប្រទេសថៃ ៖ ធនាគារអភិវឌ្ឍន៍អាស៊ី (ADB) កាលពីថ្ងៃអង្គារនេះបានកាត់បន្ថយការព្យាករនៃកំណើនសេដ្ឋកិច្ចរយៈពេល២ឆ្នាំរបស់ខ្លួនសម្រាប់ក្របខ័ណ្ឌក្នុងតំបន់ នោះក៏ព្រោះតែការរើបឡើងវិញយឺតនៅក្នុងបណ្តាប្រទេស
ប្រទេសថៃ ៖ ធនាគារអភិវឌ្ឍន៍អាស៊ី (ADB) កាលពីថ្ងៃអង្គារនេះបានកាត់បន្ថយការព្យាករនៃកំណើនសេដ្ឋកិច្ចរយៈពេល២ឆ្នាំរបស់ខ្លួនសម្រាប់ក្របខ័ណ្ឌក្នុងតំបន់ នោះក៏ព្រោះតែការរើបឡើងវិញយឺតនៅក្នុងបណ្តាប្រទេសសេដ្ឋកិច្ចឧស្សាហកម្មនានា ក៏ដូចជាលទ្ធភាពខ្សោយជាងមុនសម្រាប់ប្រទេសចិន និងឥណ្ឌា ។
ធនាគារដែលមានមូលដ្ឋាននៅក្រុងម៉ានីលមួយនេះបានលើកឡើងថា ការអភិវឌ្ឍនៃកំណើនផលិតផលក្នុងស្រុកសរុប(GDP)របស់អាស៊ីត្រូវបានគេរំពឹងថា នឹងមានកម្រិតយឺតគឺ៥,៨%ក្នុងឆ្នាំ២០១៥ ធៀបនឹងអត្រា៦,២%ក្នុងឆ្នាំ២០១៤ ។
កំណើននេះដែរត្រូវបានគេរំពឹងថា នឹងរើបឡើងដល់៦%ក្នុងឆ្នាំ២០១៦ខាងមុខ ប៉ុន្តែការកែសម្រួលថ្មីនៃការប៉ាន់ប្រមាណគឺមានកម្រិតទាបជាងផែនការដើម ដែលវាយតម្លៃទុកថា កើន៦,៣%សម្រាប់រយៈពេលទាំងពីរឆ្នាំនេះ ។
លោក Shang-Jin Wei ប្រធានធនាគារអភិវឌ្ឍន៍អាស៊ី (ADB) បានថ្លែងថា « ការអភិវឌ្ឍនៅអាស៊ីត្រូវបានគេរំពឹងថានឹងបន្តនាំមកនូវកម្រិតធំជាងគេបំផុតក្នុងតំបន់ ធៀបនឹងកំណើនពិភពលោក បើទោះជាមានកម្រិតថ្នាក់កណ្តាលក្តី ប៉ុន្តែក៏មានឧបសគ្គខ្លះៗដែរនៅក្នុងប្រតិបត្តិការដូចជា សម្ពាធរូបិយប័ណ្ណ និងក្តីបារម្ភអំពីលំហូរចេញនៃមូលធនជាដើម »។
លោកបានបន្ថែមថា « តំបន់អាស៊ីចាំបាច់ត្រូវតែពង្រឹងស្ថិរភាពរបស់ខ្លួនដើម្បីឆ្លើយតបនឹងក្តីកង្វល់ខាងក្រៅ ។ ម្យ៉ាងទៀត ការរើបឡើងនៃទីផ្សារកំពុងតែប្រឈមនឹងដំណើរនៃការដើរថយក្រោយនៃលំហូរមូលធន និងការបន្ថោកថ្លៃរូបិយប័ណ្ណនានា ដែលជានិន្នាការមួយអាចធ្វើឲ្យរឹតតែធ្ងន់ធ្ងរឡើងតាមរយៈការដំឡើងអត្រាការប្រាក់របស់សហរដ្ឋអាមេរិកនៅពេលខាងមុខ »។
តាមរបាយការណ៍បង្ហាញថា កំណើនរបស់ចិនគេប៉ាន់ប្រមាណថា នឹងថយពីអត្រា៦,៨%ក្នុងឆ្នាំ២០១៥មក៦,៧%ក្នុងឆ្នាំ២០១៦ធៀបនឹង៧,៣%កាលពីឆ្នាំ២០១៤ ដោយសារតែការវិនិយោគយឺតជាងមុន គួបផ្សំនឹងភាពចុះខ្សោយនៃការនាំចេញ ។
កំណើននៅក្នុងប្រទេសចិនដែលបានព្យាករទុកកាលពីដើមឡើយរបស់ADB គឺ៧,២%ក្នុងឆ្នាំ២០១៥ និង៧%ក្នុងឆ្នាំ២០១៦ ។
ជាងនេះទៅទៀត ធនាគារក៏បានកែសម្រួលទម្លាក់ការព្យាករនៃចក្ខុវិស័យកំណើនរបស់ឥណ្ឌាផងដែរ ពោលគឺ៧,៤%ក្នុងឆ្នាំ២០១៥ ធៀបនឹងការវាយតម្លៃទុកកាលពីមុនគឺ៧,៨%។ កំណើននេះត្រូវបានគេរំពឹងថា នឹងរើបឡើង៧,៨%ក្នុងឆ្នាំ២០១៦ធៀបនឹងការព្យាករទុកកាលពីមុន៨,២% ។
ចំណែកការព្យាករទុកនៃGDPរបស់តំបន់អាស៊ីអាគ្នេយ៍បានចុះថយក្នុងអត្រា៤,៤%ក្នុងឆ្នាំ២០១៥និង៤,៩%នៅឆ្នាំ២០១៦ ដែលវាបានអូសទាញទម្លាក់ដោយតម្រូវការចុះខ្សោយពីសំណាក់ប្រទេសចិន និងប្រទេសឧស្សាហកម្មធំៗ ។
របាយការណ៍បានបង្ហើបឲ្យដឹងផងដែរថា « សេដ្ឋកិច្ចប្រទេសថៃនៅមិនទាន់ហក់លោតឡើងវិញនៅឡើយ ធៀបនឹងការធ្លាក់ចុះរបស់ខ្លួនកាលពីឆ្នាំ២០១៤ ខណៈការវិនិយោគលើហេដ្ឋារចនាសម្ព័ន្ធបានធ្លាក់ចុះក្រោមតួលេខនៅឥណ្ឌូណេស៊ីនិងហ្វ៊ីលីពីនទៅទៀត »។ គ្រោះរាំងស្ងួតនៅក្នុងបណ្តាប្រទេសមួយចំនួន និងគ្រោះទឹកជំនន់នៅមីយ៉ាន់ម៉ា បានបង្កផលប៉ះពាល់ដល់វិស័យកសិកម្មតែម្តង ៕
ចែករំលែកព័តមាននេះ