រាជធានីភ្នំពេញ ៖ យុវជនម្នាក់បានជិះម៉ូតូ១គ្រឿងចេញពីផ្ទះ ដើម្បីយកទៅឲ្យជាងជួសជុលហ្វ្រាំង លុះពេលទៅដល់ក្រោយពីផ្ដាំផ្ញើជាងរួចរាល់ ក៏បានទុកម៉ូតូនៅមុខតូបជាង រួចក៏ដើរត្រឡប់ទៅផ្ទះរបស់ខ្លួនវិញដែរ ដោយពុំបានដកសោចេញពីម៉ូតូឡើយ។ ខណៈនោះស្រាប់តែមានជនសង្ស័យម្នាក់ឆ្លងកាត់ទីនោះក៏ឃើញសោនៅជាប់ម៉ូតូ ក៏បានឡើងអង្គុយលើរួចបញ្ឆេះម៉ាស៊ីនបម្រុងជិះចេញគេចខ្លួន ប៉ុន្តែត្រូវបស្ត្រីជាប្រពន្ធជាងម៉ូតូឃើញទាន់ ក៏ស្ទុះទៅចាប់ទាញកន្ទុយម៉ូតូទាន់ រួចស្រែកឆោឡោបង្កការភ្ញាក់ផ្អើលដល់នគរបាលប៉ុស្តិ៍ពងទឹក ដែលកំពុងល្បាតជួយចាប់បានភ្លាមៗតែម្ដង។
ហេតុការណ៍ខាងលើនេះ បានកើតឡើង កាលពីវេលាម៉ោង២និង៣៥នាទីរសៀល ថ្ងៃទី០១ ខែមេសា ឆ្នាំ២០២១ នៅត្រង់ចំណុចតូបជួសជុលម៉ូតូ ស្ថិតនៅតាមផ្លូវបេតុងក្នុងភូមិត្រពាំងសាលា សង្កាត់ពងទឹកខណ្ឌដង្កោ រាជធានីភ្នំពេញ។
ជនសង្ស័យខាងលើនោះឈ្មោះ ម៉ន សុភា អាយុ១៨ឆ្នាំ មុខរបរមិនពិតប្រាកដ ស្នាក់នៅផ្ទះជួលក្នុងភូមិទួលសំបូរ សង្កាត់ព្រៃវែង ខណ្ឌដង្កោ រាជធានីភ្នំពេញ និងមានសារធាតុញៀននៅក្នុងខ្លួនផងដែរ។ ហើយនគរបាលក៏ដកហូតបានវត្ថុតាងមួយចំនួនរួមមាន ម៉ូតូ១គ្រឿង ,ដាវកែច្នៃប្រវែង ៥៤ សង់ទីម៉ែត្រ១ដើម , ដំបងឈើមូលប្រវែង៧៥ សង់ទីម៉ែត្រ១ដើម។ចំណែកម៉ូតូដែលជនសង្ស័យលួចយកមិនបានសម្រេចនោះម៉ាកស៊ុយហ្ស៊ុយគីនិច ពណ៌ស ពាក់ស្លាកលេខ ភ្នំពេញ 1CD-26 86 ជាកម្មសិទ្ធិរបស់យុវជនម្នាក់ឈ្មោះ ជុំ មករា អាយុ២៤ឆ្នាំ មុខរបរយោធា មានទីលំនៅក្នុងភូមិត្រពាំងសាលា សង្កាត់ពងទឹក ខណ្ឌដង្កោ។
តាមប្រភពព័ត៌មាននៅកន្លែងកើតហេតុបានឲ្យដឹងថា នៅមុនពេលកើតហេតុ មានមន្ត្រីយោធាខាងលើបានជិះម៉ូតូចេញពីផ្ទះទៅកាន់តូបជាងជួសជុលម៉ូតូឈ្មោះ ផែន មុំ ភេទប្រុស អាយុ៣១ឆ្នាំ ដែលជាអ្នកភូមិជាមួយគ្នា និងស្ថិតនៅចម្ងាយពីផ្ទះរបស់ខ្លួនប្រវែង ២០០ម៉ែត្រ ដើម្បីឲ្យជាងជួសជុលហ្វ្រាំងឲ្យ។ លុះពេលទៅដល់ ក្រោយពីផ្ដាំផ្ញើជាងរួចរាល់ ជនរងគ្រោះក៏បានដើរត្រឡប់ទៅផ្ទះវិញ ដោយទុកម៉ូតូនៅខាងមុខតូបជាង ហើយពុំបានដកសោចេញពីម៉ូតូឡើយ។
ប្រភពដដែលបានបន្តថា ក្រោយមក ក៏មានជនសង្ស័យម្នាក់បានធ្វើដំណើរឆ្លងកាត់ទីនោះ ក៏ប្រទះឃើញម៉ូតូមានសោនៅជាប់ស្រាប់ ក៏បានឡើងអង្គុយលើ និងបញ្ឆេះម៉ាស៊ីនបម្រុងជិះគេចខ្លួន តែត្រូវបានឈ្មោះភី ស្រីនឿន ភេទស្រី អាយុ២៥ឆ្នាំ (ត្រូវជាប្រពន្ធរបស់ឈ្មោះ ផែន មុំ ដែលជាជាងជួសជុលម៉ូតូ) ឃើញទាន់ ក៏ស្ទុះទៅចាប់ទាញកន្ទុយម៉ូតូជាប់ រួចស្រែកឲ្យអ្នកជិតខាងជួយ ហើយក៏បង្កការភ្ញាក់ផ្អើលតែម្តង ។
ភ្លាមៗនោះ កម្លាំងនគរបាលប៉ុស្តិ៍ពងទឹក ដែលកំពុងល្បាត ក៏ជួយចាប់បានភ្លាមៗតែម្ដង រួចក៏នាំទៅសាកសួរនៅប៉ុស្តិ៍ ហើយជនសង្ស័យបានសារភាពថា ខ្លួនពិតជាបានធ្វើសកម្មភាពលួចយកម៉តូខាងលើនេះប្រាកដមែន ប៉ុន្តែពុំបានសម្រេច ហើយកន្លងមកខ្លួនធ្លាប់ធ្វើសកម្មភាពលួចម៉ូតូបានសម្រេចជាច្រើនលើកមកហើយ។
ក្រោយពីទទួលបានចម្លើយសារភាពរបស់ជនសង្ស័យហើយ នគរបាលក៏បានកសាងសំណុំរឿង ដើម្បីបញ្ជូនជនសង្ស័យរូបនេះទៅកាន់សាលាដំបូងរាជធានីភ្នំពេញ ចាត់ការតាមច្បាប់ហើយ៕
ចែករំលែកព័តមាននេះ