ខេត្តបន្ទាយមានជ័យ ៖ បុរសជាជាងដែកឡើងធ្វើសំយ៉ាបដំបូលផ្ទះគេ ខណៈពេលលើកដែកក៏ប៉ះនឹងខ្សែភ្លើងស្រាលរបស់រដ្ឋ បណ្តាលឱ្យឆក់សន្លប់ស្តូកស្តឹង តែត្រូវនាំគ្នាជួយសង្គ្រោះគាត់បឋម ដើម្បីផុតពីគ្រោះថ្នាក់ ដែលហេតុការណ៍នេះ កើតឡើងកាលពីវេលាម៉ោង៧ និង៥០នាទីព្រឹកថ្ងៃទី០១ មេសា ឆ្នាំ២០២១ ស្ថិតភូមិខ្លាកូនចាស់ សង្កាត់កំពង់ស្វាយ ក្រុងសិរីសោភ័ណ។
មន្ត្រីអធិការដ្ឋាននគរបាលក្រុងសិរីសោភ័ណបានប្រាប់ថា ជនរងគ្រោះមានឈ្មោះ ឡែន ភ័ក្ត្រា ហៅប៉ែល ភេទប្រុស អាយុ៣៧ឆ្នាំ រស់នៅភូមិព្រហូត សង្កាត់អូរអំបិល ក្រុងសិរីសោភ័ណ។
មន្ត្រីនគរបាលបានបញ្ជាក់ថា នៅពេលគ្រោះថ្នាក់កើតឡើង គឺជនរងគ្រោះបានធ្វើសំយ៉ាបផ្ទះឱ្យឈ្មោះ សន វណ្ណៈ ភេទប្រុស អាយុ៣៤ឆ្នាំ (ជាម្ចាស់ផ្ទះ) ។ នៅពេលឡើងធ្វើសំយ៉ាបផ្ទះមានគ្នា២នាក់នៅលើ ហើយជនរងគ្រោះបានលើកដែកទៅប៉ះខ្សែភ្លើងស្រាលរបស់រដ្ឋបណ្តាលឆក់សន្លប់ ។ សំណាងរបូតចេញពីខ្សែរភ្លើងត្រូវអ្នកធ្វើការជាមួយគ្នាចាប់ជាប់លើដំបូលកម្ពស់ប្រមាណ៥ ទៅ៦ម៉ែត្របានចាប់ជាប់ ហើយយកខ្សែចងដៃស្តាំយោងទំលាក់ចុះត្រូវបានសង្គ្រោះភ្លាមៗផុតពីគ្រោះថ្នាក់ ។ ដោយ៖ ប៊ុនធឿន
ចែករំលែកព័តមាននេះ