ខេត្តកំពង់ស្ពឺ ៖ នៅពេលថ្មីៗនេះ បុគ្គលិក និងថ្នាក់គ្រប់គ្រងមកពីក្រុមហ៊ុនណាហ្គាវើល បានស្ម័គ្រចិត្តចំណាយពេលវេលា និងថវិការបស់ខ្លួនសាងសង់ថ្នាក់រៀនមួយបន្ទប់ជូនដល់សិស្សថ្នាក់ទី៦ នៃសាលាបឋមសិក្សាពាមឃ្លៃ
ខេត្តកំពង់ស្ពឺ ៖ នៅពេលថ្មីៗនេះ បុគ្គលិក និងថ្នាក់គ្រប់គ្រងមកពីក្រុមហ៊ុនណាហ្គាវើល បានស្ម័គ្រចិត្តចំណាយពេលវេលា និងថវិការបស់ខ្លួនសាងសង់ថ្នាក់រៀនមួយបន្ទប់ជូនដល់សិស្សថ្នាក់ទី៦ នៃសាលាបឋមសិក្សាពាមឃ្លៃ ក្នុងស្រុកសំរោងទង ខេត្តកំពង់ស្ពឺ ។ ដោយនៅពេលកន្លងមក សិស្សានុសិស្សបានរៀនក្នុងខ្ទមតូចចាស់ទ្រុឌទ្រោមគ្មានជញ្ជាំង និងក្រោមដើមឈើអស់រយៈពេល៥ឆ្នាំមកហើយ។
លោក James Ma នាយកផ្នែកទំនាក់ទំនងបុគ្គលិក និងការងារសង្គមណាហ្គាវើល បានមានប្រសាសន៍ថា នៅពេលបុគ្គលិកក្រុមហ៊ុនណាហ្គាវើល បានចុះទៅដល់សាលាដំបូងលោកគ្រូអ្នកគ្រូបង្រៀននៅទីនោះ បានស្នើសុំក្រុមហ៊ុនណាហ្គាវើល ឲ្យជួយកសាងថ្នាក់រៀនមួយបន្ទប់សម្រាប់សិស្សថ្នាក់ទី៦ ដើម្បីអាចឲ្យសិស្សានុសិស្សសិក្សាក្នុងបរិស្ថានល្អ។ ក្នុងការឆ្លើយតបតាមការស្នើសុំរបស់លោកគ្រូអ្នកគ្រូ និងមើលឃើញពីភាពលំបាករបស់សិស្សានុសិស្សនៅទីនោះ ណាហ្គាវើលបេះដូងសប្បុរស បានសម្រេចចិត្តកសាងថ្នាក់រៀនមួយបន្ទប់សម្រាប់សាលានេះ។
គាត់បានបន្ថែមទៀតថា «យើងប្តេជ្ញាចិត្តចូលរួមចំណែកជាមួយសហគមន៍ ដើម្បីធ្វើឲ្យជីវិតរបស់កុមារមានភាពប្រសើរ។ ណាហ្គាវើលបេះដូងសប្បុរស បានជុសជុសកែលម្អសាលារៀន និងផ្តល់ឲ្យពួកគេនូវបរិស្ថានរៀនសូត្រថ្មី ។ យើងបានជួសជុល និងកែលម្អសាលារៀនដែលមានស្រាប់ ដើម្បីការពារកុមារពីអាកាសធាតុអាក្រក់ និងធ្វើឲ្យផ្នែកខាងក្នុងថ្នាក់រៀនកាន់តែមានអំណោយផលសម្រាប់ការបង្រៀន និងការសិក្សារៀនសូត្រ។ ណាហ្គាវើលបេះដូងសប្បុរស មិនត្រឹមតែបានជួយកែលម្អបរិស្ថានរបស់សាលាប៉ុណ្ណោះទេ តែថែមទាំងបានចែកសម្ភារៈសិក្សាដល់កុមារនៅសាលានេះផងដែរ។ តាមរយៈការចូលរួមចំណែក និងកិច្ចខិតខំប្រឹងប្រែងរបស់យើង យើងសង្ឃឹមថា វានឹងអាចផ្តល់ឲ្យកុមារសិក្សានូវបរិស្ថានល្អប្រសើរមួយជាងមុន ហើយយើងក៏សង្ឃឹមផងដែរថា កុមារទាំងអស់នោះ នឹងព្យាយាមសិក្សារៀនសូត្រជាងមុន ដើម្បីអនាគតល្អប្រសើររបស់ពួកគេ ក៏ដូចជាអនាគតរបស់ប្រទេសកម្ពុជា»។
លោក សា សុធី នាយកសាលាបឋមសិក្សាពាមឃ្លៃ មានប្រសាសន៍ថា សិស្សថ្នាក់ទី៦ បានរៀនក្នុងខ្ទមតូចទ្រុឌទ្រោមដោយគ្មានជញ្ជាំងអស់រយៈពេល៥ឆ្នាំមកហើយ។ ឥឡូវយើងមានបន្ទប់រៀនល្អមួយ។ ណាហ្គាវើលបេះដូងសប្បុរស បានកសាង និងជួយជួសជុលកែលម្អសាលារៀនរបស់យើង។ ដូចនេះ កុមារគ្រប់រូបនៅក្នុងសាលារៀននេះ មានឱកាសដើម្បីទទួលបាននូវបរិយាកាសសិក្សាល្អប្រសើរ។ យើងសូមថ្លែងអំណរគុណយ៉ាងជ្រាលជ្រៅនូវអ្វីដែលណាហ្គាវើលបេះដូងសប្បុរស បានធ្វើសម្រាប់សហគមន៍របស់យើង។ ថ្នាក់រៀនមួយបន្ទប់នេះ បានសាងសង់ឡើងដោយណាហ្គាវើលបេះដូងសប្បុរស និងជាកន្លែងមានសុវត្ថិភាព និងការពារភ្លៀងខ្យល់សម្រាប់កុមារក្នុងអំឡុងពេលរៀនសូត្រនៅពេលអនាគត។ ក្រុមស្ម័គ្រចិត្តណាហ្គាវើលបេះដូងសប្បុរស បានមកពីចម្ងាយមកដល់សហគមន៍មូលដ្ឋានក្នុងគោលបំណង ដើម្បីលើកទឹកចិត្ត និងផ្តល់ជំនួយដែលចាំបាច់ទៅដល់ប្រជាពលរដ្ឋមូលដ្ឋានរបស់យើង។ យើងសូមធានាថា រាល់ជំនួយដែលអ្នកបានឧបត្ថម្ភ នឹងត្រូវបានប្រើប្រាស់ដើម្បីអនាគតភ្លឺស្វាងរបស់កុមារកម្ពុជាយ៉ាងពិតប្រាកដ និងសូមថ្លែងអំណរគុណយ៉ាងជ្រាលជ្រៅដល់បុគ្គលិកណាហ្គាវើលទាំងអស់ដែលបន្តគាំទ្រយើងក្នុងកិច្ចការងារនេះ»។
លោក ហែម រ៉ាវី បុគ្គលិកណាហ្គាវើលដែលបានចូលរួមក្នុងកម្មវិធីនេះ បាននិយាយថា «ខ្ញុំសប្បាយរីករាយខ្លាំងណាស់ ដែលបានចូលរួមជួយសហគមន៍កម្ពុជារបស់យើង។ ខ្ញុំសូមអរគុណដល់ក្រុមហ៊ុនណាហ្គាវើលរបស់ខ្ញុំសម្រាប់ការដាក់កម្មវិធីការងារសង្គមចំកន្លែងដែលមានតម្រូវការពិតប្រាកដ និងដើម្បីចូលរួមចំណែកក្នុងការអភិវឌ្ឍន៍សេដ្ឋកិច្ចសង្គមកម្ពុជា ជាពិសេសជួយកុមារ និងសាលាក្រីក្រនៅតាមបណ្តាខេត្តដូចជាតំបន់នេះ។ លុយមានសារសំខាន់ ប៉ុន្តែសន្តានចិត្តជួយសង្គ្រោះសហគមន៍ត្រូវមកជាមួយគ្នាផងដែរ។ ខ្ញុំពិតជាចូលចិត្តកម្មវិធីការងារសង្គមដែលបានផ្តួចផ្តើមបង្កើតឡើងដោយណាហ្គាវើលបេះដូងសប្បុរសនេះណាស់ ពីព្រោះវាផ្តល់ឱកាសឲ្យបុគ្គលិកណាហ្គាវើលទាំងអស់បានចូលរួមជួយជាមួយសហគមន៍មូលដ្ឋានរបស់យើង»៕
ចែករំលែកព័តមាននេះ