រាជធានីភ្នំពេញ ៖ លោក នុត ពុធដារ៉ា អភិបាលខណ្ឌ និងជាប្រធានកិត្តិយសអនុសាខាកាកបាទក្រហមកម្ពុជាខណ្ឌដង្កោ បាននាំយកអំណោយរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ចែកជូនដល់គ្រួសារក្រីក្រ និងជនចាស់ជរាចំនួន១៥គ្រួសារ កាលពីវេលាព្រឹកថ្ងៃទី២១ កញ្ញា ២០១៥ នៅក្នុងសង្កាត់រលួស ខណ្ឌដង្កោ ។
អំណោយដែលត្រូវយកទៅចែកជូនដល់ជនក្រីក្រខាងលើ ក្នុង១គ្រួសារៗទទួលបាន អង្ករ២៥គីឡូក្រាម មី១កេស ត្រីខ១០កំប៉ុង ឃីត១កញ្ចប់ (មុង១, សារុង១, ក្រមា១,ភួយ១ និងប្រាក់ចំនួន៣ម៉ឺនរៀល) ។
នៅក្នុងឱកាសនេះដែរ លោក នុត ពុធដារ៉ា ក្នុងនាមជាប្រធានកិត្តិយសអនុសាខាកាកបាទក្រហមកម្ពុជាខណ្ឌដង្កោ បានផ្តាំផ្ញើការសាកសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនដល់ប្រជាពលរដ្ឋក្រីក្រទាំងអស់ ដែលជានិច្ចកាលសម្តេចទាំង២ តែងបានគិតគូរអំពីការលំបាករបស់ប្រជាពលរដ្ឋទូទាំងប្រទេស ជាពិសេស ជនក្រីក្រ ជនងាយរងគ្រោះ ជនចាស់ជរា អ្នកផ្ទុកមេរោគអេដស៍ និងទុរគតជននានា មិនតែប៉ុណ្ណោះសម្ដេចបានណែនាំដល់មន្ត្រីក្រោមឱវាទគ្រប់ជាន់ថ្នាក់ធ្វើយ៉ាងណាខិតឲ្យជិតប្រជាពលរដ្ឋ ដើម្បីបានដឹងពីសុខទុក្ខរបស់បងប្អូន និងផ្ដល់ភាពកក់ក្ដៅជូនបងប្អូនផងដែរ ។
លោកអភិបាលខណ្ឌ ក៏បានផ្តាំផ្ញើការសាកសួរសុខទុក្ខពីសំណាក់ លោក ប៉ាសុជាតិវង្ស អភិបាលរាជធានីភ្នំពេញ និងជាប្រធានសាខាកាកបាទក្រហមកម្ពុជា រាជធានីភ្នំពេញ ជូនដល់ប្រជាពលរដ្ឋទាំងអស់ សូមថែរក្សាសុខភាព តាមរយៈការអនាម័យការរស់នៅ ហូបស្អាត ផឹកស្អាត រស់នៅស្អាត ដើម្បីមានសុខភាពល្អ និងរស់នៅបានយូរអង្វែងដើម្បីបន្តមើលការអភិវឌ្ឍន៍ រីកចម្រើនរបស់ប្រទេសជាតិបន្តទៀត ៕
ចែករំលែកព័តមាននេះ