សហរដ្ឋអាមេរិកប្រាប់បុគ្គលិកដែលមិនចាំបាច់ឱ្យចេញពីប្រទេសភូមា ខណៈការបង្ក្រាបឃោឃៅកាន់តែកើនឡើង
វ៉ាស៊ីនតោន៖ យោងតាមសារព័ត៌មាន VOA ចេញផ្សាយថ្ងៃទី ៣១ ខែ មីនា ឆ្នាំ២០២១ បានឱ្យដឹងថា ក្រសួងការបរទេសសហរដ្ឋអាមេរិក…
វ៉ាស៊ីនតោន៖ យោងតាមសារព័ត៌មាន VOA ចេញផ្សាយថ្ងៃទី ៣១ ខែ មីនា ឆ្នាំ២០២១ បានឱ្យដឹងថា ក្រសួងការបរទេសសហរដ្ឋអាមេរិក បានបញ្ជាឱ្យបុគ្គលិកខ្លួន និងសមាជិកគ្រួសាររបស់ពួកគេទាំងអស់ដែលមិនចាំបាច់ ត្រូវចាកចេញពីប្រទេសមីយ៉ាន់ម៉ា ខណៈដែលការបង្ក្រាបបង្ហូរឈាមពីពួករបបយោធារដ្ឋប្រហារ ទៅលើបាតុករដែលប្រឆាំងរដ្ឋប្រហារនៅតែបន្ត។
យោងតាមសេចក្តីថ្លែងការណ៍ជាលាយលក្ខណ៍អក្សរ ដែលប្រើឈ្មោះ ចាស់ របស់មីយ៉ាន់ម៉ា បានបញ្ជាឱ្យពួកគេជម្លៀសខ្លួនចេញប្រទេសភូមាថា៖ «យោធាភូមាបានឃុំខ្លួន និងទម្លាក់មន្ត្រីរដ្ឋាភិបាលជាប់ឆ្នោត ។ ក្រុមអ្នកតវ៉ា និងបាតុកម្មប្រឆាំងនឹងរបបយោធា ដែលបានធ្វើរដ្ឋប្រហារនោះ បានកើនឡើងជារៀងរាល់ថ្ងៃ ហើយវាអាចនឹងត្រូវបាន គេរំពឹងថានឹងនៅបន្តទៀត» ។ បទបញ្ជារបស់ក្រសួងការបរទេស បានធ្វើបច្ចុប្បន្នភាពការផ្តល់យោបល់ ដែលបានចេញកាលពីខែមុន ដែលអនុញ្ញាតឱ្យបុគ្គលិកមិនមានភារកិច្ចចាំបាច់ ត្រូវចាកចេញបន្ទាន់ ប្រសិនបើពួកគេចង់ចាកចេញ ។
យោងតាមសមាគមជំនួយខាងផ្នែកអ្នកទោសនយោបាយ (AAPP) បាននិយាយថា កងកម្លាំងសន្តិសុខមីយ៉ាន់ម៉ា បានសម្លាប់ជនស៊ីវិលយ៉ាងតិច ៥១២ នាក់ចាប់តាំងពីយោធានេះបានធ្វើរដ្ឋប្រហារ កាលថ្ងៃទី ១ ខែកុម្ភៈមក ។ ចំនួនអ្នកស្លាប់សរុបជាង ១០០ នាក់ កាលពីថ្ងៃសៅរ៍ ខណៈដែលរបបនេះបានបង្ហាញនូវកម្លាំងដ៏ធំមួយ ក្នុងទិវាកងកម្លាំងប្រដាប់អាវុធជាតិ ដែលរំលឹកដល់ការចាប់ផ្តើម នៃការតស៊ូ រើបំរាស់ពីការកាន់កាប់របស់ជប៉ុន នាសង្គ្រាមលោកលើកទី ២ ។ AAPP មានចំនួនអ្នកស្លាប់សរុប កាលពីថ្ងៃសៅរ៍ គឺ ១៤១ នាក់ទូទាំងប្រទេស។
អគ្គលេខាធិការអង្គការសហប្រជាជាតិ លោកអាន់តូនីញ៉ូ ហ្គូទែរេស បាននិយាយនៅក្នុងសន្និសីទកាសែតមួយកាលពីថ្ងៃច័ន្ទបាននិយាយថា៖ « អ្វីដែលបានកើតឡើងនៅថ្ងៃទិវាកងកម្លាំងប្រដាប់អាវុធជាតិ គឺគួរឱ្យរន្ធត់ណាស់»។ មនុស្សពីរនាក់ទៀតត្រូវបានសម្លាប់ នៅថ្ងៃអង្គារនេះ នៅពេលដែលក្រុមបាតុករគាំទ្រលទ្ធិប្រជាធិបតេយ្យរាប់ពាន់នាក់ បានធ្វើដំណើរតាមផ្លូវម្តងទៀត។ ចលនាមិនគោរពតាមរដ្ឋប្បវេណី ដែលរស់នៅទីក្រុងយ៉ាំងហ្គូន បានប្រើវិធីសាស្ត្រមួយផ្សេងទៀត ដោយពួកគេបានបោះសំរាម នៅតាមផ្លូវប្រសព្វមួយក្នុងទីក្រុង។
ក្រុមឧទ្ទាមប្រដាប់អាវុធជនជាតិដើមភាគតិច ៣ក្រុម ក្នុងប្រទេសមីយ៉ាន់ (ក្រុមទាំងនេះ មិនចំណុះរដ្ឋាភិបាលមីយ៉ាន់ម៉ានោះទេ) បានគំរាមយោធារដ្ឋប្រហារ កាលពីថ្ងៃអង្គារ ថា ពួកគេនឹងធ្វើការសងសឹក បើមិនបញ្ឈប់ការសម្លាប់លើបាតុករនោះ ។ ក្រុមឧទ្ទាមប្រដាប់អាវុធជនជាតិដើមភាគតិច ទាំង៣ក្រុមមានដូចជា the Ta’ang National Liberation Army, the Myanmar Nationalities Democratic Alliance Army and the Arakan Army បានចេញសេចក្តីប្រកាសរួមមួយថា ៖«ប្រសិនជាពួកគេយោធាសន្តិសុខ មិនបញ្ឈប់ការសម្លាប់លើប្រជាជន ពួកយើងនឹងរួមគ្នាជាមួយបាតុករដើម្បីប្រយុទ្ធប្រឆាំងទៅវិញ»។
យោធារដ្ឋប្រហារ បានពង្រីកការបង្ក្រាបរបស់ខ្លួន ដោយបើកការវាយប្រហារ តាមអាកាសប្រឆាំងនឹងក្រុមឧទ្ទាមជនជាតិដើមភាគតិចការ៉ែន ដែលមានទីតាំងនៅភាគខាងកើតនៃប្រទេសមីយ៉ាន់ម៉ា ដើម្បីឆ្លើយតបនឹងការវាយប្រហាររបស់ក្រុមឧទ្ទាម លើប៉ុស្តិ៍យោធា និងប៉ូលិស កាលពីប៉ុន្មានថ្ងៃមុនមក ។ ការវាយប្រហារតាមអាកាសបានធ្វើឱ្យមនុស្សរាប់ពាន់នាក់រត់ភៀសខ្លួន ឆ្លងកាត់ព្រៃ និងឆ្លងកាត់ព្រំដែន ចូលទៅក្នុងប្រទេសថៃ ដែលជាប្រទេសជិតខាង។
ជាមួយគ្នានេះដែរ ប្រទេសថៃក៏បានធ្វើការបដិសេធភ្លាមៗ បន្ទាប់ពីមានការចោទប្រកាន់ពីទីភ្នាក់ងារជំនួយមនុស្សធម៌ (Humanitarian Aid Agencies) ដែលថាទាហានរបស់ខ្លួនបានបង្ខំឱ្យជនភៀសខ្លួនជនជាតិភាគតិច ដែលបានរត់គេចខ្លួនពីការវាយប្រហារ ឱ្យវិលត្រឡប់ទៅប្រទេសមីយ៉ាន់ម៉ាវិញផងដែរ។ យោងតាមក្រុមប្រឹក្សាសន្តិសុខអង្គការសហប្រជាជាតិ នឹងបើកកិច្ចប្រជុំមួយជាសំងាត់ នៅថ្ងៃពុធនេះ ស្តីពីស្ថានភាពនៅក្នុងប្រទេសមីយ៉ាន់ម៉ា។
អ្នកនាំពាក្យអគ្គលេខាធិការលោក Guterres លោក Stephane Dujarric បានប្រាប់វីអូអេ VOA Margaret Besheer ថា៖ «អ្វីដែលយើងចង់ឃើញនោះ ពួកយើងនឹងរួមគ្នាធ្វើជាសារដ៏រឹងមាំមួយ ដើម្បីផ្ញើរទៅកាន់ក្រុមយោធាសន្តិសុខមីយ៉ាន់ម៉ា ឱ្យពួកគេត្រូវធ្វើការបង្រួបបង្រួម បញ្ឈប់អំពើហឹង្សា ដោះលែងអ្នកទោសនយោបាយ និងធ្វើយ៉ាងណាឱ្យប្រទេសមីយ៉ាន់ម៉ាត្រឡប់ទៅសភាពធម្មតា ហើយប្រគល់ប្រទេសមីយ៉ាន់ម៉ាឱ្យទៅប្រជាជនវិញ និងយើងនឹងសង្ឃឹមថា យើងអាចបញ្ចូនអ្នករាយការណ៍ពិសេសទៅកាន់ប្រទេសមីយ៉ាន់ម៉ា ក្នុងពេលឆាប់ៗនេះផងដែរ»។
មេដឹកនាំសម្ព័ន្ធភាពជាតិ ដើម្បីលទ្ធិប្រជាធិបតេយ្យ (NLD) លោកស្រីអ៊ុងសាន ស៊ូជី បានដឹកនាំប្រទេសមីយ៉ាន់ម៉ាចាប់តាំងពីការបោះឆ្នោត ប្រជាធិបតេយ្យបើកចំហលើកដំបូង របស់ខ្លួននៅឆ្នាំ ២០១៥មក ប៉ុន្តែរបបយោធាមីយ៉ាន់ម៉ា ដែលមានធ្វើការប្រកួតប្រជែងក្នុងការបោះឆ្នោតដែរនោះ បានចោទប្រកាន់ កាលពីខែវិច្ឆិកាឆ្នាំមុន ថាសន្លឹកឆ្នោតមិនប្រក្រតីហើយអះអាងថា មានការលួចបន្លំសន្លឹកឆ្នោតយ៉ាងច្រើន ដែលខណៈនោះរបបយោធានេះមិនមានភស្តុតាងនៅក្នុងដៃនោះទេ។
បន្ទាប់មករបបយោធាមីយ៉ាន់ម៉ា បានធ្វើរដ្ឋប្រហារទំលាក់រដ្ឋាភិបាលស្របច្បាប់ នៅថ្ងៃទី ១ ខែ កុម្ភៈ និងបានចាប់ខ្លួនលោកស្រីអ៊ុងសាន ស៊ូជី និងលោកប្រធានាធិបតី Win Myintរួមទាំងមនុស្សជាច្រើនទៀត ដែលនៅក្នុងបក្សលោកស្រី ។ ភ្លាមៗក្រោយរដ្ឋប្រហារមិនមានប៉ុន្មានផង របបយោធានិងក្រុមបក្សពួកបានរុះរើនិងបានផ្លាស់ប្តូរសមាសភាពមន្ត្រីជាច្រើននៅតាមក្រសួងនានា (សឹងតែគ្រប់ក្រសួងសូម្បីតែក្រសួងព័ត៌មាន) ហើយប្រកាសដាក់ប្រទេសក្នុងគ្រាអាសន្នរយៈពេលមួយឆ្នាំ និងប្រកាសប្រើច្បាប់របស់ពួកគេ៕
ចែករំលែកព័តមាននេះ