ផ្ទះកូនស្រីឧកញ៉ា ម៉ុង ឬទ្ធី ត្រូវក្រុមចោរចូលលួច អស់ជិត១០ម៉ឺនដុល្លារ
រាជធានីភ្នំពេញ ៖ ផ្ទះកូនស្រីរបស់លោកឧកញ៉ាបណ្ឌិត ម៉ុង ឬទ្ធី ត្រូវក្រុមចោរចូលលួច ប្រមូលយកលុយ, ទូរស័ព្ទ iPhone ដាំពេជ្រ…
រាជធានីភ្នំពេញ ៖ ផ្ទះកូនស្រីរបស់លោកឧកញ៉ាបណ្ឌិត ម៉ុង ឬទ្ធី ត្រូវក្រុមចោរចូលលួច ប្រមូលយកលុយ, ទូរស័ព្ទ iPhone ដាំពេជ្រ និង,គ្រឿងអលង្ការដាំពេជ្រ, សរុបគិតជាប្រាក់ ប្រមាណជិត១០ម៉ឺនដុល្លារ ហើយក្រុមចោរ បានគេចខ្លួនបាត់ដោយសុវត្តិភាព បន្សល់ទុកតែរូប តាមកាមេរ៉ាសុវត្តិភាព ។
ករណីចោរកម្មខាងលើនេះបានកើតឡើងកាលពីម៉ោងប្រមាណជាង៣ទៀបភ្លឺ ឈានចូលថ្ងៃ៣១ ខែមីនា ឆ្នាំ២០២១នេះ នៅចំណុចផ្ទះលេខ១១៥F ផ្លូវម៉ាស៊ីនទឹក ក្នុងភូមិទី៣ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ។
តាមព័ត៌មានអោយកោះសន្តិភាពដឹងថា ក្រុមចោរបានចូលធ្វើសកម្មភាព ឡើងផ្លោះរបងបន្លាលួស ចូលផ្ដាច់ខ្សែភ្លើងដែលភ្ជាប់កាមេរ៉ាសុវត្ថិភាពខាងមុខផ្ទះ ហើយចូលទៅដោះកញ្ចក់ទ្វារ បើកទ្វារចូលក្នុងធ្វើសកម្មភាពរើកកាយ យករបស់មានតម្លៃម៉ត់ ។
តាមព័ត៌មាន អោយដឹងបន្តថា ទ្រព្យសម្បត្តិដែលក្រុមចោរលួចយកទៅ រួមមានលុយដុល្លារប្រមាណ ៧ពាន់ដុល្លារ និងលុយខ្មែរ ជាង ៧លានរៀល, កាបូបតម្លៃ ជាង២ពាន់ដុល្លារ ចំនួន១, គ្រឿងអលង្ការ ខ្សែកពេជ្រចំនួន១ តម្លៃប្រហែល ០៦ម៉ឺនដុល្លារ, ទូរស័ព្ទដៃចំនួន២គ្រឿង (ម៉ាក iPhone X ១គ្រឿង និងម៉ាក iPhone ដាំពេជ្រ តម្លៃជាង១ម៉ឺនដុល្លារ ១គ្រឿង), ហើយទូរស័ព្ទដែលចោរលួចយកទៅមានគណនីយ ABA និង ACLEDA និងកាតធនាគារចំនួន ៣ទៀតផងដែរ ។
កូនស្រីបង្កើតរបស់លោកឧកញ៉ាបណ្ឌិត ម៉ុង ឬទ្ធី បានបង្ហោះលើហ្វេសប៊ុកផ្ទាល់ខ្លួន យ៉ាងដូច្នេះថា «យប់ម៉ិញចោរ បានចូលផ្ទះខ្ញុំយកកាបូបលុយ ទូរសព្ទ័ ២គ្រឿង ខ្សែ.ក បើឃើញចោរវាយកខ្សែ.ក កាបូប និងទូរស័ព្ទដូចរូបខាងក្រោមជួយរាយការណ៍ឲ្យជាបន្ទាន់ (នេះជារូបចោរដែលបានចូលផ្ទះសូមប្រយត្ន័ទាំងអស់គ្នា) សុំជួយស៊ែរតគ្នាផង ដើម្បីចែករំលែក និងមានការប្រុងប្រយ័ត្ន» ។
នៅក្នុងហ្វេសប៊ុកនោះ ក៏បានភ្ញាប់រូបភាព និងវីដេអូ ដែលជនសង្ស័យ ចូលធ្វើសកម្មភាព លួចផងដែរ ។
ទោះបីជាយ៉ាងណា សមត្ថកិច្ចមូលដ្ឋានខណ្ឌជ្រោយចង្វារ ពុំបានផ្តល់ព័ត៌មានលម្អិត ជុំវិញករណីជនសង្ស័យ ចូលគាសភូមិគ្រឹះចូលលួច នោះឡើយទេ ។
មហាជន ក៏ដូចជាម្ចាស់ផ្ទះ សំណូមពរ ដល់សមត្ថកិច្ច មេត្តាជួយស្រាវជ្រាវ ដើម្បីឈានទៅតាមជនសង្ស័យ មកកាតទោសតាមច្បាប់ ៕
ចែករំលែកព័តមាននេះ