រាជធានីភ្នំពេញ ៖ សភាយុវពាណិជ្ជករអន្តរជាតិ-កម្ពុជា នៅព្រឹកថ្ងៃទី២០ កញ្ញា នេះ បានរៀបចំសិក្ខាសាលាអប់រំមួយស្តីអំពី «សីលធម៌ និងសុជីវធម៌សង្គម» ដោយមានការអញ្ចើញចូលរួមពីលោកខៀវ កាញារីទ្ធ រដ្ឋមន្ត្រីក្រសួងព័ត៌មាន លោកគួច ផេង ប្រធានសភាយុវពាណិជ្ជករអន្តរជាតិ-កម្ពុជា លោកប៉ែន បុណ្ណា ប្រធានក្លិបអ្នកកាសែតកម្ពុជា រួមនឹងភ្ញៀវកិត្តិយស និងសិស្សានុសិស្សជាច្រើនផ្សេងទៀត។ ពិធីនេះ ប្រារព្ធធ្វើឡើងនៅសាលារៀនវ៉េស្ទឡាញន៍ សាខាដូនពេញ ដោយមានគោលបំណងដើម្បីអប់រំពីក្រមសីលធម៌ និងសុជីវធម៌ក្នុងការបញ្ចេញមតិជាសាធារណៈឲ្យបានត្រឹមត្រូវ និងប្រកបដោយចំណេះដឹងទូទៅទូលំទូលាយនៅក្នុងសង្គមនាពេលបច្ចុប្បន្ន។
លោកគួច ផេង ប្រធានសភាយុវពាណិជ្ជករអន្តរជាតិ កម្ពុជាមានប្រសាសន៍ថា «នៅក្នុងសង្គមយើងសព្វថ្ងៃការប្រើប្រាស់ប្រព័ន្ធទំនាក់ទំនងសង្គមនានា ដូចជាហ្វេសប៊ុក និងបណ្តាញសង្គមផ្សេងទៀត គឺមានការរីកចម្រើនយ៉ាងខ្លាំងនៅក្នុងប្រទេសកម្ពុជាយើង ។ ប៉ុន្តែអ្វីដែលជាចំណុចខ្វះខាតនោះ គឺយុវជនយើងមួយចំនួនគាត់បានប្រើប្រាស់បណ្តាញសង្គមនេះត្រូវតាមគោលដៅ ដោយគាត់បានសិក្សារៀនសូត្រអំពីអ្វីដែលអាចទាញយកបានពីបណ្តាញសង្គមនេះ ហើយម្យ៉ាងទៀតនៅមានក្រុមហ៊ុនរកស៊ីមួយចំនួនទៀតគាត់អាចទៅផ្សព្វផ្សាយផលិតផល និងសេវាកម្មរបស់ពួកគាត់បានផងដែរ»។
លោកបន្តទៀតថា «នៅក្នុងចំណោមយុវជនយើង យើងក៏ឃើញមានផងដែរថា ការដែលប្រើទំនាក់ទំនងសង្គមដូចជាហ្វេសប៊ុកនេះច្រើន ប៉ុន្តែមានមួយចំនួនគាត់ប្រើប្រាស់មិនត្រូវគោលដៅបានន័យថា គាត់យកបណ្តាញទំនាកទំនងសង្គមនេះ យកទៅរិះគន់ចំពោះជនណាម្នាក់ ឬកាត់តរួបភាពផ្សេងៗដែលធ្វើឲ្យខុសនូវក្រមសីលធម៌ក្នុងការប្រើប្រាស់ហួសព្រំដែននៃការប្រើប្រាស់ ហើយនេះជាចំណុចមួយដែលយើងទាំងអស់គ្នាគួយល់ដឹងឲ្យបានច្បាស់ពីការប្រើប្រាស់បណ្តាញសង្គមនេះ។ លោកថា ប្រសិនបើយើងប្រើប្រាស់បណ្តាញសង្គមនេះ ឲ្យត្រូវគោលដៅប្រើប្រាស់វាឲ្យមានសក្តានុពល ដើម្បីជាផ្នែកមួយជួយផ្សព្វផ្សាយពីប្រទេសកម្ពុជាយើង ពីព្រោះបណ្តាញសង្គមហ្វេសប៊ុកនេះ ប្រើប្រាស់ច្រើននៅលើពិភពលោក»។
លោកប៉ែន បុណ្ណា ប្រធានក្លិបអ្នកកាសែតកម្ពុជាមានប្រសាសន៍ថា «យើងសប្បាយចិត្តនៅពេលយើងឃើញថា សេរីភាពនៃការបញ្ចេញមតិនៅក្នុងស្រុកយើងចាប់ផ្តើមរីកលួតលាស់យ៉ាងខ្លាំងនៅតាមបណ្តាញសង្គមដែលជាបច្ចេកវិទ្យាថ្មីមួយសម្រាប់ប្រទេសយើងមានដូចជាហ្វេសប៊ុកដែលអាចឲ្យយើងបញ្ចេញមតិ បង្ហោះជាព័ត៌មាន និងរូបភាពជូនគ្នាទៅវិញទៅមកបានយ៉ាងច្រើន ។ តែទន្ទឹមហ្នឹងនោះ យើងមានការព្រួយបារម្ភខ្លាំងណាស់ដោយឃើញថា ទីលានសេរីភាពដែលយើងកំពុងតែប្រើប្រាស់ត្រូវបានមនុស្សជាច្រើនយកទៅប្រើប្រាស់ខុសច្បាប់ ខុសសីលធម៌ គ្មានសុជីវធម៌ ដែលធ្វើឲ្យទីលានសេរីភាពរបស់យើងក្លាយជាបរិយាកាសអាប់អួរ»។
លោកបន្តទៀតថា តើអ្វីទៅជាសារព័ត៌មាន0x017d7 ព្រោះនៅពេលខ្លះការផ្តល់ព័ត៌មានតាមហ្វេសប៊ុក ឬតាមបណ្តាញសង្គមផ្សេងៗយើងគិតថា វាជាព័ត៌មាន។ ព័ត៌មាននេះ បើខ្ញុំនិយាយនៅក្នុងក្របខណ្ឌអាជីពអ្វីដែលកើតឡើងនៅតាមបណ្តាញសង្គមទាំងឡាយ យើងខ្ញុំមិនចាត់ទុកជាព័ត៌មានទេ គឺពួកយើងខ្ញុំជាអ្នកអាជីពគ្រាន់ចាត់ទុកគ្រាន់ជាប្រភពមួយប៉ុណ្ណោះ ដែលយើងត្រូវយកមក ដែលពេលខ្លះប្រសិនបើមានរឿងអីសំខាន់មួយយើងអាចប្រភពពីហ្វេសប៊ុក ប៉ុន្តែយើងត្រូវការការងារជាច្រើនទៀត ដើម្បីផ្ទៀងផ្ទាត់មុននឹងយើងចុះផ្សាយ។ បញ្ហានៅក្នុងហ្វេសប៊ុក ដោយត្រង់ថាយើងមិនបានផ្ទៀងផ្ទាត់អីទាំងអស់ យើងយកមកផ្សាយជូនកាលទៀតយើងមិនបានដឹងរឿងដើមយ៉ាងម៉េចទេ ចែកចាយតៗគ្នា បញ្ចេញមតិតៗគ្នាកាន់តែខុសទៅៗដោយឥតមានយល់ពីប្រភពដើមនៃព័ត៌មានជាក់លាក់អ្វីទាំងអស់ ហើយនេះជាបញ្ហាដែលកំពុងតែកើតឡើងនៅក្នុងប្រទេសយើងសព្វថ្ងៃ»។
លោកខៀវ កាញារីទ្ធ រដ្ឋមន្ត្រីក្រសួងព័ត៌មានមានប្រសាសន៍ថា «សុជីវធម៌មានសារៈក្នុងការប្រើប្រាស់ប្រចាំថ្ងៃ វាបង្ហាញអំពីសង្គមយើងបង្ហាញអំពីប្រភេទក្រុមរបស់យើង។ ដូច្នេះការបង្ហាញនៅលើហ្វេសប៊ុក មិនថា គាត់មានអាយុប៉ុន្មានឆ្នាំនោះទេ តែរាល់ការបង្ហាញ និងការសរសេររបស់យើងអាចឲ្យគេដឹងពីកម្រិតនៃការយល់ដឹង និងអត្តចរិត តាមរយៈការប្រើប្រាស់នៅតាមបណ្តាញទំនាក់ទំនងសង្គមនេះ ហើយនៅថ្ងៃក្រោយបើគេចង់រកយើង ទោះបីយើងប្តូរឈ្មោះដើមក៏ដោយនៅតែគេរកយើងឃើញដែរ»៕
ចែករំលែកព័តមាននេះ