ប្រទេសមីយ៉ាន់ម៉ា ៖ ធនាគារពិភពលោក(WB)ប្រកាសថា ខ្លួនបានអនុម័តឥណទានឥតការប្រាក់ចំនួន៤០០លានដុល្លារដើម្បីផ្តល់ជាហិរញ្ញវត្ថុនិងជំនួយផ្នែកបច្ចេកទេសនៅក្នុងការនាំមកនូវថាមពលអគ្គិសនីសម្រាប់ផ្គត់ផ្គង់ដល់ប្រជាពលរដ្ឋប្រមាណ៦,២លាននាក់ក្នុងប្រទេសមីយ៉ាន់ម៉ា ។
ឥណទាននេះនឹងជួយគាំទ្រដល់ផែនការអគ្គិសនីជាតិរបស់មីយ៉ាន់ម៉ា(NEP) ហើយក៏ត្រូវបានផ្តល់ឲ្យដោយធនាគារពិភពលោកដែរ បន្ទាប់ពីអង្គការឃ្លាំងប្រាក់យក្សមួយនេះទទួលបានសំណើមួយពីក្រសួងថាមពលអគ្គិសនី(MOEP) កាលពីដើមឆ្នាំនេះ ។
ប៉ុន្តែកម្មវិធីឥណទាននេះដែរត្រឹមតែត្រូវបានអនុម័តដោយសភាកាលពីខែសីហាកន្លងមកប៉ុណ្ណោះ ក្រោយពីមានការពិចារណាអស់រយៈពេលបីបួនខែជំទាស់នឹងកម្មវិធីឥណទាននេះ ដែលស្នើឡើងពីក្រសួងដទៃ ។ មួយវិញទៀតឥណទានរយៈពេល៣២ឆ្នាំនេះ គឺពុំគិតការប្រាក់អ្វីឡើយ ប៉ុន្តែវាធ្វើឲ្យមានការចាប់អារម្មណ៍លើថ្លៃសេវាប្រមាណជា០,៧៥% ។
តាមសេចក្តីថ្លែងការណ៍មួយរបស់សាមីធនាគារបញ្ជាក់ថា ក្រុមហ៊ុនប្រឹក្សានាយកប្រតិបត្តិរបស់ខ្លួន(WB) បានអនុម័តនូវឥណទានពីសមាគមអភិវឌ្ឍន៍អន្តរជាតិដែលជាមូលនិធិជួយបណ្តាប្រទេសក្រីក្របំផុតរបស់ធនាគារយក្សនេះដើម្បីផ្តល់នូវជំនួយផ្នែកហិរញ្ញវត្ថុនិងបច្ចេកទេសដល់គម្រោងអគ្គិសនីរបស់មីយ៉ាន់ម៉ា (NEP) ។
គួរបញ្ជាក់ថា ជាង៧០%នៃអត្រាប្រជាជនរបស់មីយ៉ាន់ម៉ាពុំមានអគ្គិសនីប្រើប្រាស់ និងបណ្តាញភ្លើងតភ្ជាប់ទៅតាមបណ្តាទីប្រជុំជននិងភូមិឃុំនានាឡើយ ។ ទោះជាយ៉ាងណាមីយ៉ាន់ម៉ាត្រូវការការវិនិយោគដ៏ធំធេងនៅក្នុងការបង្កើតអគ្គិសនី ក៏ដូចជាការផ្ទេរថាមពលទៅក្នុងកំណើនសេដ្ឋកិច្ចរបស់ខ្លួនផងដែរ ។
អគ្គនាយកធនាគារពិភពលោកប្រចាំប្រទេសនេះលោក Ulrich Zachau បានថ្លែងថា«គម្រោងទឹកប្រាក់៤០០លានដុល្លារនេះ នឹងជួយតភ្ជាប់បណ្តាញអគ្គិសនីដោយប្រទាក់ក្រឡាគ្នាទៅតាមទីប្រជុំជននានា ហើយថែមទាំងជាការបើកភ្លើងបំភ្លឺដល់តាមបណ្តាសាលារៀន មន្ទីរពេទ្យ និងភូមិដាច់ស្រយាលនានាផងដែរ » ។ «យើងស្វាគមន៍ និងគាំទ្រទិសដៅរបស់មីយ៉ាន់ម៉ានៅក្នុងការសម្រេចបាននូវការប្រតិបត្តិអគ្គិសនីជាសកលនៅឆ្នាំ២០៣០»។
គម្រោងនេះដែរត្រូវបានគេរំពឹងថា នឹងនាំមកនូវថាមពលដល់លំនៅឋានប្រមាណជា១,២លានខ្នងផ្ទះនៅក្នុងប្រទេសមីយ៉ាន់ម៉ានៅឆ្នាំ២០២១ ។ ម្យ៉ាងទៀតវា[គម្រោង]មានទិសដៅពង្រីកនូវការប្រទាក់ក្រឡានៃបណ្តាញភ្លើងដែល មានស្រាប់តាមរយៈការបន្ថែមនូវបណ្តាញចែក ចាយនៃកម្រិតវ៉ុលមធ្យមនិងទាប ហើយវាក៏បានធ្វើអគ្គិសនីកម្មបែបក្រឡាអុកផងដែរជាមួយនឹងបណ្តាសូឡាខ្នាតតូចនៅតាមទីជនបទនានា ។ នេះបើតាមសេចក្តីថ្លែងការណ៍ព័ត៌មាន ។
ក្រសួងថាមពលអគ្គិសនី នឹងចំណាយប្រមាណជា៣១០លានដុល្លារដើម្បីពង្រីកបណ្តាញនៃការផ្ទេរថាមពលនោះ ហើយទឹកប្រាក់៩០លានដុល្លារផ្សេងទៀតនឹងត្រូវបានផ្តល់ជាប្រាក់វិភោជន៍ពីក្រសួងអភិវឌ្ឍន៍ជនបទ ។
លោក Maw Thar Htwe អនុរដ្ឋមន្ត្រីថាមពលអគ្គិសនីបានប្រាប់សារព័ត៌មាន Myanmar Times កាលពីប៉ុន្មានខែមុននេះថា ផែនការអគ្គិសនីកម្មនៅទីជនបទនឹងធ្វើឡើងជាបីដំណាក់កាលដូចជា បន្ថែមបណ្តាញទាំងនោះក្នុងរយៈចម្ងាយ៣,២គីឡូម៉ែត្រនៃបណ្តាញរបស់ជាតិ បន្ទាប់មកពង្រីក៥០គីឡូម៉ែត្រ និងចុងក្រោយបន្ថែមការតភ្ជាប់ឆ្ងាយជាងនេះ ។
តាមរបាយការណ៍របស់ធនាគារពិភពលោកកាលពីថ្ងៃ៥មិថុនា បង្ហាញថា ការប្រើប្រាស់ថាមពលរបស់មីយ៉ាន់ម៉ាគឺស្ថិតក្នុងចំណោមកម្រិតទាបជាងគេបំផុតនៅលើពិភពលោក ជាមួយនឹង៧០%នៃអត្រាប្រជាជន និង៨៤%នៃលំនៅឋានជនបទដែលពុំមានអគ្គិសនីប្រើប្រាស់ ។
ធនាគារបានបន្តទៀតថា «អគ្គិសនីកំពុងកើនឡើងលឿន ។ ក្នុងអំឡុងពេល៥ឆ្នាំមុន អគ្គិសនីដែលត្រូវបានផ្គត់ផ្គង់ដោយអាជ្ញាធរជាតិបានកើនឡើងជាមធ្យមប្រមាណជា១៥%ក្នុងមួយឆ្នាំ និងសម្រេចបាន៩,៦Terrawatt ម៉ោងកាលពីឆ្នាំ២០១៣ » ។
ការតភ្ជាប់ថ្មីប្រមាណជា៧,២លាននាក់ត្រូវតែបន្ថែមនៅឆ្នាំ២០៣០ដើម្បីសម្រេចនូវមហិច្ឆតាក្នុងទិសដៅអគ្គិសនីកម្ម១០០% របស់រដ្ឋាភិបាលដែលផ្តល់នូវការតភ្ជាប់ថ្មីជាមធ្យម៤៥០.០០០នាក់ក្នុងមួយឆ្នាំដែលច្រើនជាងអត្រាបច្ចុប្បន្នទ្វេដង ។
ជាងនេះទៅទៀត ខ្លួនបានវាយតម្លៃថា តម្លៃសរុបក្នុងអំឡុងពេល១៦ឆ្នាំគឺ៥,៨ប៊ីលានដុល្លារដែលបន្ថែមនៅក្នុងការវិនិយោគលើកការបង្កើតនិងផ្ទេរថាមពលអគ្គិសនីដែលផ្តល់នូវការសម្រេចបាននូវតម្រូវការ ។
ចំណែកក្រសួងថាមពលអគ្គិសនីលើកឡើងថា សមត្ថភាពដែលដំឡើងបាន៤២៥៥មេហ្គាវ៉ាត់របស់មីយ៉ាន់ម៉ា ភាគច្រើនត្រូវបានបង្កើតឡើងដោយរោងចក្រថាមពលវារីអគ្គិសនី(៧០%) និងឧស្ម័នធម្មជាតិ២៧% ។
តាមស្ថិតិរបស់ក្រសួងអភិវឌ្ឍន៍ជនបទបង្ហាញថា ក្រសួងបាននិងកំពុងស្ទង់មើលតាមបណ្តាភូមិនានានៅក្នុងរដ្ឋ Shan , Kachin , Chin និងរដ្ឋ Kayin ដែលនឹងត្រូវបានគេជ្រើសយកជាអាទិភាពស្ថិតក្រោមគម្រោងផែនការអគ្គិសនីកម្មរបស់ជាតិដែលទំនងជានឹងចាប់ផ្តើមនៅឆ្នាំសារពើពន្ធ២០១៦-២០១៧។ ជាងនេះទៅទៀត ក្រសួងបាននិងកំពុងជំរុញឲ្យមានការប្រើប្រាស់អគ្គិសនីនៅតាមទីជនបទឲ្យកាន់តែប្រសើរឡើងថែមទៀតចាប់តាំងពីឆ្នាំសារពើពន្ធ២០១៣-២០១៤ដោយប្រើប្រាស់ថវិការដ្ឋ ។
លោក Daw Soe Soe Ohn អ្នកគ្រប់គ្រងគម្រោងកម្មវិធីNEPដែលស្ថិតក្រោមចំណុះរសប់ក្រសួងអភិវឌ្ឍន៍ជនបទបានថ្លែងថា « ភូមិ២៣០៨ផ្សេងទៀតនឹងដាក់ឲ្យដំណើរការដោយចរន្តអគ្គិសនីនៅឆ្នាំនេះដែលប្រើប្រាស់មូលនិធិរដ្ឋ » ។
គួររំលឹកផងដែរថា World Bank Group បានប្រកាសពីគម្រោងពង្រីកហិរញ្ញវត្ថុចំនួន១ប៊ីលានដុល្លារដើម្បីជួយគាំទ្រដល់ការបង្កើតថាមពលអគ្គិសនី ការផ្ទេរនិងការចែកចាយរបស់ប្រទេសមីយ៉ាន់ម៉ាកាលពីខែមករាឆ្នាំ២០១៤ ៕
ចែករំលែកព័តមាននេះ