ប្រទេសវៀតណាម ៖ អនុប្រធានសមាគមស្បៀងអាហារវៀតណាម លោក Pham Van Bay បានថ្លែងថា ប្រទេសវៀតណាមបានទទួលជោគជ័យលើការដាក់ស្នើសុំកិច្ចសន្យាជាមួយហ្វ៊ីលីពីន ស្តីពីការនាំចេញអង្ករបាក់២៥%
ប្រទេសវៀតណាម ៖ អនុប្រធានសមាគមស្បៀងអាហារវៀតណាម លោក Pham Van Bay បានថ្លែងថា ប្រទេសវៀតណាមបានទទួលជោគជ័យលើការដាក់ស្នើសុំកិច្ចសន្យាជាមួយហ្វ៊ីលីពីន ស្តីពីការនាំចេញអង្ករបាក់២៥% ចំនួន៤៥០.០០០តោន ។
លោក Bay បានប្រាប់សារព័ត៌មាន Vietnam Newsថា អង្ករប្រមាណជា២៥ម៉ឺនតោន នឹងត្រូវបានដឹកបញ្ជូនទៅកាន់ទីផ្សារហ្វ៊ីលីពីនៅឆ្នាំនេះ ក្នុងនោះ១២៥.០០០តោនក្នុងអំឡុងខែ វិច្ឆិកា និងពាក់កណ្តាលទៀតនាំចេញក្នុងខែធ្នូ។ ចំណែកបរិមាណដែលនៅសេសសល់ប៉ុន្មាននឹងត្រូវបានបញ្ជូនទៅកាន់ហ្វ៊ីលីពីននៅដើមឆ្នាំ២០១៦ ខាងមុខ ។
រីឯតម្លៃលក់ នឹងស្ថិតក្នុងហាងឆេង ៤២៦,៦ដុល្លារក្នុងមួយតោន ធូរថ្លៃជាងកម្រិតតម្លៃដែលផ្តល់ឲ្យពីអាជ្ញាធរស្បៀងអាហារជាតិរបស់ហ្វ៊ីលីពីន ប្រមាណជា៧៧ដុល្លារ ។
ការដេញថ្លៃនេះត្រូវបានរៀបចំឡើងដោយអាជ្ញាធរស្បៀងអាហារជាតិហ្វ៊ីលីពីននៅក្នុងទីក្រុង Quezon City ប្រទេសហ្វ៊ីលីពីន កាលពីថ្ងៃព្រហស្បតិ៍ ។ ក្នុងព្រឹត្តិការណ៍នោះដែរអាជ្ញាធរបានសម្រេចនាំចូលអង្ករបាក់២៥%ចំនួន៧៥ម៉ឺនតោន ក្នុងនោះ២៥ម៉ឺនតោនឆ្នាំ២០១៥នេះ និង៥០ម៉ឺនតោនក្នុងឆ្នាំ២០១៦ ។
ការសម្រេចចិត្តនេះដែរ គឺស្ថិតក្នុងផ្នែកមួយដោយសារតែបាតុភូតចម្លែកនៃអាកាសធាតុ EI Nino ដែលគេប៉ាន់ប្រមាណនឹងមានលទ្ធផលអាក្រក់នៅខែតុលា ហើយចុងក្រោយគឺអូស បន្លាយដល់និទាឃរដូវរហូតដល់ដំណាច់ខែឧសភា ឆ្នាំក្រោយ ។ ចំពោះការទិញអង្ករបន្ថែមរបស់ហ្វ៊ីលីពីនត្រូវបានគេព្យាករទុកថា នឹងបង្កើនតម្លៃនាំចេញអង្ករដែលបានធ្លាក់ចុះកាលពីប៉ុន្មានខែថ្មីៗនេះ ។
ហ្វ៊ីលីពីន គឺជាទីផ្សារធំមួយរបស់អ្នកនាំចេញអង្កររបស់វៀតណាម ។ ខណៈដែលប្រទេសនេះ[ហ្វ៊ីលីពីន] បានទិញចូលអង្ករប្រមាណជាជាង៥០ម៉ឺនតោននៅចន្លោះខែមករា និងខែកក្កដា ឆ្នាំ២០១៥នេះ ។
រីឯសមាគមស្បៀងអាហារវៀតណាមបានលើកឡើងបង្ហើបថា ប្រទេសវៀតណាមបាននាំចេញអង្ករប្រមាណជាង៣លានតោននៅចន្លោះ ខែមករា និងថ្ងៃ៣១សីហា ឆ្នាំនេះ៕
ចែករំលែកព័តមាននេះ