ខេត្តរតនគីរី ៖ ជនជាតិវៀតណាមចំនួន៦នាក់ដែលឆ្លងដែនចូលមកក្នុងប្រទេសកម្ពុជាតាមច្រកទ្វារអន្តរជាតិអូរយ៉ាដាវបានត្រូវសមត្ថកិច្ចប៉េអឹមចាប់ឃាត់ខ្លួនក្រោយពីធ្វើសកម្មភាពវាយតប់ និងបាញ់បោះជាច្រើនគ្រាប់បណ្តាលឱ្យកងសន្តិសុខក្រុមហ៊ុនរងរបួសចំនួន២នាក់។ ជនជាតិវៀតណាមទាំង៦នាក់នេះចូលមកកម្ពុជាដើម្បីចូលរួមក្នុងកម្មវិធីកាត់ចំណងដៃនៅរាត្រីថ្ងៃទី២៧ មីនា របស់មេការកាស៊ីណូនៅក្នុងបរិវេណទីធ្លាកាស៊ីណូមួយកន្លែងពុំមានយីហោនៅជាប់នឹងព្រំដែនកម្ពុជា-វៀតណាម ។
តាមប្រភពព័ត៌មានឱ្យដឹងថា នៅក្នុងកម្មវិធីនោះមានការរាំលេងកំសាន្ត ហើយទំនាស់កើតឡើងដោយសារជនជាតិវៀតណាមទាំងនោះលលេងជាមួយស្ត្រីបុគ្គលិកកាស៊ីណូក្នុងរូបភាពមិនគោរពប្រពៃណីវប្បធម៌ និងតម្លៃនារីខ្មែរ ទើបក្រុមសន្តិសុខធ្វើអន្តរាគមន៍ដោយសារពួកនារីបុគ្គលិកកាស៊ីណូពឹងពាក់ឱ្យជួយការពារហើយក៏ឈានដល់ទំនាស់កើតឡើង។ ភាគីបង្កទំនាស់ជាជនជាតិវៀតណាមហើយក៏ជាកងកម្លាំងដែលមានបុណ្យស័ក្តិអំណាច និងមានកាំភ្លើងខ្លីនៅក្នុងដៃទើបហ៊ានមាក់ងាយសន្តិសុខ និងបង្កការវាយតប់បាញ់បោះស្រេចតែអំពើចិត្ត។
ប្រភពដដែលបានបន្តថា អ្នករងគ្រោះមានចំនួនពីរនាក់ដោយសារការវាយតប់ និងកាប់ដោយដាវសាមួរ៉ៃ ប៉ុន្តែមិនបានប្រាប់ឈ្មោះឱ្យដឹងទេ គឺជាកងសន្តិសុខរបស់ក្រុមហ៊ុនមួយ។ ឯអ្នកបង្កជាជនជាតិវៀតណាម និងជាកងកម្លាំងប្រដាប់អាវុធមានគ្នា១០នាក់ត្រូវបានកម្លាំងប៉េអឹមស្រុកអូរយ៉ាដាវឃាត់ខ្លួនចំនួន៦នាក់កសាងសំណុំរឿងចាត់ការតាមផ្លូវច្បាប់ តែពុំបានប្រាប់ឈ្មោះឱ្យដឹងទេ។ ជនជាតិវៀតណាមទាំងនេះត្រូវបានប៉ូលិសច្រកទ្វារអូរយ៉ាដាវអនុញ្ញាតឱ្យចូលមកប្រទេសកម្ពុជា។
មានការស្តីបន្ទោសថា ជនបរទេសទាំងអស់ដែលចូលមកកម្ពុជាត្រូវតែមានការត្រួតពិនិត្យពីសំណាក់ប៉ូលិសច្រកទ្វារ ចុះហេតុអ្វីអនុញ្ញាតឱ្យនាំយកអាវុធចូលមកខុសច្បាប់បែបនេះ ហើយហួសពេលរហូតដល់ម៉ោង១២អធ្រាត្រ។ ទាក់ទិននឹងហេតុការណ៍ខាងលើត្រូវបានលោកឡុង រក្ខា ប្រធានប៉ូលិសអន្តោប្រវេសន៍ប្រចាំច្រកទ្វារអូរយ៉ាដាវបំភ្លឺតាមទូរស័ព្ទនៅព្រឹកថ្ងៃទី២៩ មីនា ថា ជនជាតិវៀតណាមទាំងនោះមកចូលរួមក្នុងពិធីកាត់ចំណងដៃ ហើយពុំមានទំនាស់ពាក្យសំដីគ្នាទេ ឯជនជាតិខ្មែរទាំងពីរនាក់នោះរត់ដេញគ្នា លុះមកដល់កន្លែងប្រារព្ធពិធីក៏ដួលរលាត់កែងដៃគឺមិនមានការវាយតប់គ្នានោះទេ។ ចំណែកប្រភពផ្សេងមួយទៀតនិយាយថា នៅមាត់អូរក្បែរព្រំដែនក្រោយកាស៊ីណូមានសពជនជាតិវៀតណាមម្នាក់ស្លាប់ស្អុយរលួយនៅទីនោះ ដោយពុំស្គាល់អត្តសញ្ញាណ ឬមានសាច់ញាតិស្គាល់នោះទេ ហើយក៏ពុំដឹងពីមូលហេតុនោះ ដែរ។ ប៉ុន្តែប្រភពខ្លះនិយាយថា ទំនងមានទំនាស់ដោយសារដណ្តើមគ្នាទិញឈើគ្រញូងពីខ្មែរនៅជាប់ព្រំដែន។ លោកឡុង រក្ខា ប្រាប់ថា ដីនោះមិនមែនជាតំបន់ដែលលោកគ្រប់គ្រងទេ ហើយមិនអាចចុះទៅធ្វើការត្រួតពិនិត្យនៅទីនោះបានឡើយ។
សូមបញ្ជាក់ថា កាស៊ីណូនៅព្រំដែនអូរយ៉ាដាវមានចំនួនពីរកន្លែង គឺមួយកន្លែងស្ថិតនៅក្នុងបរិវេណដីរបស់លោកឧកញ៉ាទ្រី ភាព និងមួយកន្លែងទៀតដែលកើតមានទំនាស់នេះស្ថិតនៅលើទួល ដោយមានមេការឈ្មោះសុខ គឹមសាន ។ កាស៊ីណូទាំងពីរនេះបើតាមប្រភពបានបង្ហើបថា គ្រាន់តែបើកសាកល្បង ហើយអ្នកចូលលេងទីនោះមានទាំងជនជាតិវៀតណាម និងជនជាតិខ្មែរ ៕
ចែករំលែកព័តមាននេះ