ប្រទេសសិង្ហបុរី ៖ តួលេខថ្មីៗនេះបង្ហាញថា តម្លៃលក់ចេញវិញ និងបរិមាណយូនីតខុនដូក៏ដូចជាលំនៅឋានឯកជនក្រៅពីដីធ្លីក្នុងប្រទេសសិង្ហបុរី ហាក់ដូចជាមានពន្លឺជាងមុនដែលលើកទឹកចិត្តដល់ទាំងអ្នកទិញនិងអ្នកលក់ ។ នេះបើយោងតាមការចេញផ្សាយរបស់សារព័ត៌មាន Bloomberg ។
ក្រុមហ៊ុន SRX Property បានឲ្យដឹងកាលពីថ្ងៃអង្គារថា តម្លៃលក់ចេញវិញនៃអចលនទ្រព្យឯកជនក្រៅពីដីធ្លីបានកើនឡើង០,២%កាលពីខែមុន(សីហា) ប៉ុន្តែនៅតែធ្លាក់ចុះប្រមាណជា១,៧%ពីឆ្នាំទៅដដែល ។
SRX Property បានឲ្យដឹងទៀតថា តម្លៃក៏នៅតែមានកម្រិតទាបជាងការកើនឡើងលឿនបំផុតកាលពីខែមករាឆ្នាំមុនទៅទៀត ។
បើប្រៀបធៀបនឹងមួយឆ្នាំមុន តម្លៃលក់ចេញវិញនៃយូនីតនីមួយៗនៅក្នុងតំបន់កណ្តាលក្រុងបានធ្លាក់ចុះ៦,២% ហើយនៅតំបន់ជាយក្រុងបានរំកិលចុះ២,៩% ។ ប៉ុន្តែលំនៅឋានជាយក្រុងផ្ទុយ និងនិន្នាការនេះកើនឡើង៧,១% ធៀបនឹងឆ្នាំ២០១៤ ។
ចំណែកនាយកប្រតិបត្តិក្រុមហ៊ុន SLP International លោក Nicholas Mak បានឲ្យដឹងថា កត្តានេះគួរតែដោយសារការជួញដូរនៃយូនីតតូចជាងនេះនៅក្នុងតំបន់នោះតែម្តង ។ម្យ៉ាងនៅតំបន់នោះមានរចនាសម្ព័ន្ធសមាមាត្រកាន់តែប្រសើរដែលជាការពេញនិយមរបស់បណ្តាវិនិយោគិនទាំងឡាយ ។ តម្លៃខុនដូមួយយូនីតៗនៅតាមតំបន់ជាយក្រុងក៏បានធ្លាក់ចុះតិចតួចបំផុតពីការឡើងដល់កម្រិតកំពូលកាលពីពេលថ្មីៗនេះដែរ ។
ពួកគេធ្លាក់ចុះ៥,១%ពីកម្រិតកំពូលដែលមានកាលពីខែសីហាឆ្នាំ២០១៣ ខណៈតម្លៃមួយយូនីតៗក្នុងតំបន់កណ្តាលក្រុងបានធ្លាក់ចុះ១០,៥% ធៀបនឹងខែតុលាឆ្នាំ២០១៣ ហើយនៅក្នុងជាយក្រុងក្រោមតម្លៃកាលពីខែមិថុនាឆ្នាំ២០១៣ ប្រមាណជា៧,១% ។
បរិមាណលក់ចេញវិញនៃអចលនទ្រព្យក្រៅពីដីធ្លីបានធ្លាក់ចុះដែលគេបានប៉ាន់ប្រមាណ១៦,៨%កាលពីខែមុនធៀបនឹងខែកក្កដាដែលពុំមានអ្វីគួរឲ្យភ្ញាក់ផ្អើលអ្វីឡើយ ។
ចំណែកមន្ត្រីប្រតិបត្តិរបស់ក្រុម ហ៊ុនអចលនទ្រព្យ ERA Realty លោក Eugene Lim បានថ្លែងថា បរិមាណនៃការលក់ចេញវិញគឺមានកម្រិតខ្លាំងជាងនៅក្នុងខែសីហាឆ្នាំមុនទៅទៀតដែលជាសញ្ញាដ៏ប្រសើរមួយ និងមានអ្នកទិញកាន់តែច្រើនកំពុងឈានជើងចូលទីផ្សារ ។ និន្នាការនេះគឺស្របពេលដែលតម្លៃលក់ចេញវិញកាន់តែមានស្ថិរភាពនាពេលបច្ចុប្បន្ន ហើយអ្នកលក់ក៏កំពុងឃ្លាំមើលត្រៀមនឹងលក់ចេញដោយសុខចិត្តធ្វើការចរចា ។
លោកបានបានបន្ថែមថា បរិមាណនៃការលក់ចេញវិញគួរតែត្រូវបានរ៉ាប់រងបន្តតាមរយៈការធ្វើឲ្យមានស្ថិរភាពនៃតម្លៃដែលនឹងក្លាយជាចំណុចមិនល្អរបស់អ្នកទិញកាន់តែច្រើននៅលើទីផ្សារ ដែលមានការប៉ាន់ប្រមាណនូវការជួញដូរក្រៅពីដីធ្លីនៃការលក់ចេញវិញសរុប៦ពាន់លំនៅឋានសម្រាប់ពេញមួយឆ្នាំនេះ ។
បើធ្វើការប្រៀបធៀបទៅនឹងឆ្នាំទៅ ការជួញដូរអចលនទ្រព្យក្រៅពីដីធ្លីមានចំនួនត្រឹមតែ៤.០៨៨លំនៅឋានប៉ុណ្ណោះ ។
រីឯការវាយតម្លៃរបស់ក្រុមហ៊ុន SRX Property បង្ហាញថា តម្លៃលក់ចេញវិញនៃយូនីតឯកជន(ខុនដូ)ក្រៅពីដីធ្លីនៅក្នុងតំបន់ភូមិភាគកណ្តាលបានធ្លាក់ថ្លៃ០,៥%ពីមួយខែទៅមួយខែ ខណៈនៅតំបន់ជាយៗបានធ្លាក់ចុះ០,២% និងតម្លៃក្នុងតំបន់ជាយក្រុងបានកើនឡើង១,៨% ។
អគ្គនាយកគ្រប់គ្រងក្រុមហ៊ុន R’ST Research លោក Ong Kah Seng បានឲ្យដឹងថា អ្នកជំនាញរំពឹងថា ទីផ្សារលក់ចេញវិញនឹងស្ងប់ស្ងាត់ជាងមុននៅក្នុងអំឡុងពេលដែលនៅសេសសល់នៃឆ្នាំនេះ ដែលនាំឲ្យមានអត្រាបង្អង់ល្បឿននៅចុងឆ្នាំ ។ ម្យ៉ាងទៀតគម្រោងធំៗដែលទើបនឹងចាប់ផ្តើមមួយចំនួននៅក្នុងខែខាងមុខអាចនឹងធ្វើឲ្យមានការទាក់ទាញអ្នកទិញកាន់តែច្រើននៅក្នុងការលក់ចេញនូវអចលនទ្រព្យក្នុងតំបន់ទាំងនោះ ។
ទោះជាយ៉ាងណាលោក Nicholas Mak បានលើកឡើងថា សន្ទស្សន៍តម្លៃលក់ចេញវិញសរុបគួរតែស្ថិតនៅក្នុងរង្វង់កម្រិតប្រហាក់ប្រហែលគ្នានេះឬក៏ធ្លាក់ថ្លៃបន្ដិចបន្តួច ។
លោកបានបន្ថែមថាព « កត្តាគន្លឹះមួយគឺសេចក្តីប្រកាសរបស់ក្រសួងការងារនៅក្នុងខែកក្កដាដែលវានឹងបង្កើននូវប្រាក់ឈ្នួលអប្បបរមាសម្រាប់អ្នកកាន់កាតការងារ(EP) ដែលជាអ្នកស្វែងរកការនាំក្រុមគ្រួសាររបស់ពួកគេមកនៅទីនោះចាប់ពី៤.០០០ដុល្លារទៅ៥.០០០ដុល្លារក្នុងមួយខែ។ ច្បាប់ថ្មីគឺទំនងជាមិនលើកទឹកចិត្តដល់បណ្តាអ្នកកាន់កាតការងារEPដែលនឹងចូលមកធ្វើការដែលកំពុងស្វែងរកតាំងលំនៅឋានថ្មីនៅទីនោះនិងអ្នកដែលមានកាន់កាតEP ដែលមានបំណងចង់តាំងទីលំនៅនៅទីនេះជាមួយនឹងក្រុមគ្រួសាររបស់ពួក » ។
លោកបានបន្ថែមថា ហានិភ័យនៃបង្អន់ល្បឿនសេដ្ឋកិច្ចក្នុងតំបន់ និងការដំឡើងអត្រាការប្រាក់ អាចមិនអំណោយផល និងប៉ះពាល់ដល់តម្រូវការវិនិយោគអចលនទ្រព្យជាដើម ។តម្លៃអចលនទ្រព្យឯកជនសរុបបានបន្តដំណើររំកិលចុះ វៀរលែងតែមានការផ្លាស់ប្តូរខ្លះៗនៅក្នុងវិធានការស្អំកម្តៅនេះ ៕
ចែករំលែកព័តមាននេះ