ប្រទេសឥណ្ឌូណេស៊ី ៖ ធនាគារគ្រប់គ្រងដោយរដ្ឋ Bank Tabungan Negara (BTN) រំពឹងថា គម្រោងរបស់រដ្ឋាភិបាលដែលអនុញ្ញាតឲ្យជនបរទេសធ្វើជាម្ចាស់កម្មសិទ្ធិលើផ្ទះល្វែងនានានៅក្នុងប្រទេស នឹងជួយជំរុញដល់ការខ្ចីប្រាក់ដោយដាក់របស់បញ្ចាំ ដែលធ្វើឲ្យប្រសើរឡើងនូវវិស័យមួយនេះ ។ នេះបើយោងតាម The Jakarta Post។
កាសែតហ្សាការតាប៉ុស្តិ៍ បានឲ្យដឹងថា គោលនយោបាយដែលបានគ្រោងទុកនេះគឺជាផ្នែកមួយនៃគម្រោងគោលនយោបាយរបស់រដ្ឋាភិបាលនៅក្នុងការធ្វើឲ្យប្រសើរឡើងវិញនូវភាពស្ពឹកនៃសេដ្ឋកិច្ចរបស់ប្រទេសឥណ្ឌូណេស៊ី នឹងបើកឲ្យមានភាពជាម្ចាស់កម្មសិទ្ធិស្របច្បាប់របស់ជនបរទេសចំពោះផ្ទះល្វែងដែលមានតម្លៃយ៉ាងតិច ៦៩៧.៣២៩ដុល្លារ ។
លោក Mansyur Nasution អគ្គនាយធនាគារBTNបានថ្លែងថា ធនាគាររបស់ខ្លួនដែលជាអ្នកប្រកាន់ជំហរប្រកបអាជីវកម្មស្នូលលើការផ្តល់កម្ចីដោយមានដាក់វត្ថុបញ្ចាំ បានស្វាគមន៍ផែនការរបស់រដ្ឋាភិបាលស្របពេលដែលខ្លួននឹងបង្កើនការផ្តល់ហិរញ្ញវត្ថុសម្រាប់ផ្នែកដែលមានកម្រិតខ្ពស់ជាងមុន ។
លោក Mansyur បានថ្លែងកាលពីថ្ងៃព្រហស្បតិ៍ថា «គោលនយោបាយដែលបានគ្រោងទុកនេះអាចជួយយើងរក្សាកំណើនឥណទានរបស់យើងនៅគ្រប់ផ្នែកពីកម្រិតទាបទៅកម្រិតខ្ពស់បំផុតដូចដែលយើងប្រាថ្នាចង់បានដើម្បីបំពេញតាមតម្រូវទាំងអស់ » ។
បើទោះជាវានឹងត្រូវបានគេស្គាល់ចំពោះការផ្តល់នូវកម្ចីដោយមានដាក់របស់បញ្ចាំសម្រាប់អ្នកខ្ចីដែលមានចំណូលកម្រិតទាប និងមធ្យមយ៉ាងណាក្តី ក៏លោក Mansyur បានថ្លែងថា ធនាគារBTNប្រាថ្នាចង់បង្កើនមួយចំណែកទៀតដែលមានកម្រិតខ្ពស់ និងជាផ្នែកមួយនៃកិច្ចខិតខំប្រឹងប្រែងអំឡុងពេលយូរអង្វែងរបស់ខ្លួនដើម្បីបង្កើនភាគហ៊ុនទីផ្សារឲ្យបាន៣០%នៅឆ្នាំ២០១៩ ។
គិតចាប់តាំងពីឆ្នាំទៅ BTNបាននាំមុខទីផ្សារជាមួយនឹងភាគហ៊ុន២៧,៥៣%នៃទីផ្សារកម្ចីដោយដាក់វត្ថុបញ្ចាំសរុបរបស់ប្រទេសឥណ្ឌូណេស៊ី ។
លោក Mansyur បានលើកឡើងថា ចាប់ពីពេលនេះតទៅ ៨០%នៃឥណទានផ្ទះល្វែងនិងលំនៅឋានរបស់ធនាគារ BTN គឺជាអតិថិជនដែលរកចំណូលបានកម្រិតទាបនិងមធ្យម ខណៈ២០%ដែលនៅសេសសល់គឺជាអ្នកខ្ចីដែលមានចំណូលខ្ពស់ជាងគេនៅក្នុងកិច្ចខិតខំប្រឹងប្រែងធ្វើឲ្យផ្សេងពីគ្នានៅក្នុងមុខជំនួញរបស់ខ្លួន ។
ក្នុងចំណោមការខ្ចីដោយដាក់របស់បញ្ចាំដែលមានកម្រិតខ្ពស់ជាងគេ លោក Mansyur បានថ្លែងថា ការផ្តល់ហិរញ្ញវត្ថុសម្រាប់ទិញលំនៅឋានដែលមានតម្លៃលើសពី១០ប៊ីលានឥណ្ឌូណេស៊ីរូព្យាដ(៦៩០.០០០ដុល្លារ)ស្មើនឹងអត្រាតិចជាង១% ។
លោកបានឲ្យដឹងទៀតថា « យើងអាចមានក្តីរំពឹងនៅក្នុងការបង្កើតនូវភាពធំធាត់នៃការខ្ចីដោយដាក់វត្ថុបញ្ចាំចំពោះលំនៅឋានដែលមានតម្លៃទឹកប្រាក់លើសពី៦៩០.០០០ដុល្លារឬស្មើនឹងជាង៣% ពីព្រោះយើងកំពុងតែខិតជិតដល់ដំណាច់ឆ្នាំទៅហើយនោះ។ វាប្រហែលជាអាចមានទំហំទឹកប្រាក់ច្រើនជាងនេះនៅឆ្នាំក្រោយ»។
BTNបានកក់ឥណទានដែលមានទំហំទឹកប្រាក់ចំនួន៨,៧០ប៊ីលានដុល្លារក្នុងឆមាសទី១នៃឆ្នាំ២០១៥នេះក្នុងនោះ៨៥%នៃឥណទាននេះនឹងបញ្ចូលទៅក្នុងវិស័យអចលនទ្រព្យ ដែលរួមមានការផ្តល់កម្ចីដោយដាក់វត្ថុបញ្ចាំនិងការផ្តល់ហិរញ្ញវត្ថុដល់បណ្តាក្រុមហ៊ុនអភិវឌ្ឍន៍លំនៅឋាន និងអគារពាណិជ្ជកម្មនានា ។
ដើមឡើយ រដ្ឋមន្ត្រីហិរញ្ញវត្ថុឥណ្ឌូណេស៊ីលោក Bambang Brodjonegoro បានពិចារណាពីកម្រិតនៃការផ្លាស់ប្តូរ៣៤៥.០០០ដុល្លារ ប៉ុន្តែផែនការកែប្រែថ្មីនៃការធ្វើនិយ័តកម្មរបស់រដ្ឋាភិបាលនូវមាត្រា៤១នៃច្បាប់ឆ្នាំ១៩៩៦ ស្តីពីភាពធ្វើម្ចាស់កម្មសិទ្ធិលើលំនៅឋានដោយជនបរទេសនឹងចែងជំនួសដោយទឹកប្រាក់ ៦៩០.០០០ដុល្លារវិញ ។
ពាក់ព័ន្ធនឹងឥណទានសាងសង់សម្រាប់លំនៅឋានប្រណីត លោក Mansyur បានថ្លែងថាធនាគារ BTN បានផ្តល់អាទិភាពនូវការផ្តល់កម្ចីរបស់ខ្លូនសម្រាប់គម្រោងទាំងនោះដោយបង្កើតឡើងតាមរយៈបណ្តាក្រុមហ៊ុនអភិវឌ្ឍន៍នានានៅក្នុងបញ្ជីលំដាប់កំពូលទាំង២០និង៥០របស់ប្រទេសឥណ្ឌូណេស៊ី ដែលមានសមត្ថភាពស្វែងរកទីតាំងល្អជាងគេដែលផ្តល់នូវការរីកដុះដាលនៃការវិនិយោគកម្រិតខ្ពស់ពីវិស័យអចលនទ្រព្យ ។
លោក Mansyur បានលើកឡើងផងដែរថា « អ្នកដែលចង់វិនិយោគលើដើមទុនជាង៣៤៥.០០០ដុល្លារជាធម្មតាត្រូវបានគេធ្វើឲ្យមានការជឿជាក់ថា ពួកគេនឹងធ្វើការវិវឌ្ឍខ្លួនបានល្អប្រសើរលើការវិនិយោគរបស់ពួកគេ។ នេះគឺជាចំណែកមួយដែលបាននិងស្វែងរក » ។
បើទោះជាកំណើនសេដ្ឋកិច្ចចុះខ្សោយនាពេលបច្ចុប្បន្នក្តី ក៏លោក Mansyur បានគូសបញ្ជាក់ថា ធនាគារ BTN នៅតែធ្វើឲ្យមានការជឿទុកចិត្តដដែលថា ខ្លួនអាចសម្រេចបាននូវទិសដៅកំណើនឥណទានក្នុងចន្លោះ១៥%និង១៧%សម្រាប់ឆ្នាំនេះ ស្របពេលដែលការផ្តល់កម្ចីរបស់ខ្លួនគិតចាប់ពីខែសីហានេះបានកើនឡើងយ៉ាងហោច១៨%៕
ចែករំលែកព័តមាននេះ