ខេត្តប៉ៃលិន ៖ បន្ទាប់ពីមានភ្លៀងធ្លាក់ជោគជាំជារៀងរាល់ថ្ងៃអស់រយៈពេលជាង១សប្តាហ៍ ចាប់តាំងពីថ្ងៃទី១០ រហូតដល់ថ្ងៃទី១៧ ខែកញ្ញា ឆ្នាំ២០១៥នេះ បណ្តាលឱ្យលិចលង់ភូមិអស់ចំនួន និងខូចខាតដំណាំដំឡូងមីរបស់ប្រជាពលរដ្ឋជាច្រើនហិកតា នៅក្នុងឃុំស្ទឹងត្រង់ ស្រុកសាលាក្រៅ រីឯចំណតរថយន្តនៅក្នុងក្រុងប៉ៃលិនក៏មានការលិចលង់ មិនអាចចតរថយន្តកើតផងដែរ ។
ប្រភពព័ត៌មានបានឱ្យដឹងថា ភូមិដែលត្រូវជំនន់ទឹកភ្លៀងលិចភូមិចំនួន៤ក្នុងស្រុកសាលាក្រៅមានដូចជា ភូមិផ្ទះស្បូវ ខូចខាតដំណាំអស់១១០ហិកតា, ភូមិព្រៃសន្ទះ ខូចខាតដំណាំអស់១១២ហិកតា, ភូមិដីស ខូចខាតដំណាំអស់៨ហិកតា និងភូមិកូនដំរី ខូចខាតដំណាំអស់៣៥ហិកតា ។
ប្រភពបន្តទៀតថា រហូតមកដល់ថ្ងៃទី១៨ ខែកញ្ញានេះ ភ្លៀងបានផ្អាកហើយ ដូច្នេះទឹកជំនន់ក៏ស្រកទៅវិញជាបណ្តើរៗផងដែរ ។
លោក រី ដារ៉ា អធិការរងស្រុកសាលាក្រៅបានឱ្យដឹងថា បន្ទាប់ពីមានភ្លៀងធ្លាក់ទាំងយប់ទាំងថ្ងៃអស់រយៈពេលជាង១សប្តាហ៍ បណ្តាលឱ្យទៅជាទឹកជន់ទឹកភ្លៀងហូរបុកយ៉ាងគំហុកក្នុងទិសដៅពីត្បូងទៅជើង ហើយក៏បណ្តាលឱ្យលិចលង់ភូមិទាំង៤ និងទទួលរងការខូចខាតដំណាំដំឡូងមីរបស់ប្រជាពលរដ្ឋជាច្រើនហិកតាផងដែរ ។ លោកបញ្ជាក់ថា ពេលនេះទឹកជំនន់បានស្រកបណ្តើរៗទៅវិញហើយ ហើយលោកស្នងការនគរបាលខេត្តក៏បានដឹកនាំកម្លាំងចុះទៅត្រួតពិនិត្យនៅកន្លែងកើតហេតុនោះដែរ ៕
ចែករំលែកព័តមាននេះ