ខេត្តឧត្តរមានជ័យ ៖ សត្វខ្ទីងមួយក្បាលដោយមានកូននៅក្នុងផ្ទៃផងនោះ សង្ស័យត្រូវបានព្រានព្រៃបាញ់សម្លា.ប់ រត់មកងាប់នៅចំណុចភ្នំជញ្ជាំង ស្ថិតនៅក្នុងភូមិលំទង ឃុំលំទង ស្រុកអន្លង់វែង ខេត្តឧត្តរមានជ័យ ។…
ខេត្តឧត្តរមានជ័យ ៖ សត្វខ្ទីងមួយក្បាលដោយមានកូននៅក្នុងផ្ទៃផងនោះ សង្ស័យត្រូវបានព្រានព្រៃបាញ់សម្លា.ប់ រត់មកងាប់នៅចំណុចភ្នំជញ្ជាំង ស្ថិតនៅក្នុងភូមិលំទង ឃុំលំទង ស្រុកអន្លង់វែង ខេត្តឧត្តរមានជ័យ ។ នេះបើយោងតាមមន្ទីរបរិស្ថានខេត្តឧត្តរមានជ័យបង្ហោះ កាលពីពេលថ្មីនេះ ។
ប្រភពបានបញ្ជាក់ទៀតថា សត្វខ្ទីងនេះអាចងាប់រយៈពេលមួយសប្ដាហ៍មកហើយ ព្រោះមានសភាពហើមស្អុយរលួយសាច់ទៅហើយ ។
គួរបញ្ជាក់ថា ពិតជាមានការសោកស្តាយបំផុត ចំពោះការបាត់បង់ប្រភេទសត្វដែលកម្រមាននេះ ។ ដែលសត្វខ្ទីងជាសត្វព្រៃដ៏កម្របំផុត មិនគួរព្រានព្រៃបាញ់សម្លា.ប់បែបនេះទេ។ អ្វីកាន់តែស្តាយទៀតនោះ សត្វខ្ទីងងាប់ គឺមានកូននៅក្នុងផ្ទៃទៀតផង ។
សូមបញ្ជាក់ថា សត្វខ្ទីងជាប្រភេទសត្វព្រៃធំមួយប្រភេទ ដែលមានតម្លៃកាត់ថ្លៃមិនបាន ហើយអ្វីដែលជាការព្រួយបារម្ភនោះ គឺការរស់នៅក្នុងធម្មជាតិកំពុងប្រឈមនឹងបញ្ហាជាច្រើន ពិសេស គឺការរេចរឹលនៃតំបន់ព្រៃភ្នំដែលចេះតែរួញតូចទៅៗ ។ មួយវិញទៀត ដោយសារសត្វនេះមានតម្លៃពួកព្រានព្រៃតែងតាមប្រមាញ់ដោយប្រើប្រាស់កាំភ្លើងតែម្តង ដែលពីសម័យដើមមុនសង្គ្រាម ព្រានព្រៃមានតែស្នាមិនអាចប្រមាញ់បានសត្វធំៗបែបនេះទេ ។
ខ្ទីងមានមាឌធំ ខ្លួនខ្មៅ បូកក្រាស់លាតសន្ធឹងរហូតដល់ស្ទើរពាក់កណ្តាលខ្នង ចំណែក.កខ្លីបន្តិច រាងមាំ ដោយមានបូកនៅផ្នែកខាងក្រោម ។ ជើងទាំងបួនចាប់ពីជង្គង់ចុះក្រោមពណ៌ប្រផេះ ។ នៅលើថ្ងាស មានរោមវែងពណ៌ប្រផេះ ឬពណ៌លឿងមាសស្រាល ។ កូនរបស់វាមានពណ៌ត្នោត រហូតដល់វាមានអាយុពី៤ទៅ៥ខែ ទើបក្លាយទៅជាពណ៌ខ្មៅ ។ ខ្ទីងញីមានមាឌ និងស្នែងតូចជាងខ្ទីងឈ្មោល ហើយពុំសូវមានបូក និងបួរដូចខ្ទីងឈ្មោលទេ ។
ព័ត៌មានបន្ថែមនឹងមានផ្សាយជូនបន្ត ។ ដោយ៖ ប៊ុនណាក់
ចែករំលែកព័តមាននេះ