ខេត្តកំពង់ធំ ៖ អគ្គីភ័យបានលេបត្របាក់រោងម៉ាស៊ីនកិនស្រូវមួយកន្លែង ដែលមានទំហំ៤៥ម៉ែត្រ គុណ៣៤ម៉ែត្រ មានដំបូល និងជញ្ជាំងប្រក់ និងបាំងស័ង្កសី ហើយមានផ្ទុកស្រូវជាងមួយពាន់តោន។ ទោះបីជាបែបណា គេពុំទាន់ដឹងអំពីមូលហេតុពិតប្រាកដ ដែលបណ្តាលឱ្យមានគ្រោះអគ្គីភ័យនោះទេ។ ហេតុការណ៍នេះកើតឡើងកាលពីវេលាម៉ោង១២រំលងអធ្រាត្រ ថ្ងៃទី៨ ឈានចូលថ្ងៃទី៩ មីនា នៅចំណុចភូមិឈើទាល ឃុំកំពង់ចិនខាងត្បូង ស្រុកស្ទោង។ ក្រោយពេលកើតហេតុប្រហែលមួយម៉ោងទើបរថយន្តពន្លត់អគ្គីភ័យរបស់ស្នងការដ្ឋាននគរបាលខេត្តបានទៅដល់២គ្រឿងជួយបាញ់ទឹកពន្លត់។
តាមរបាយការណ៍របស់សមត្ថកិច្ចស្រុកស្ទោងឱ្យដឹងថា រោងម៉ាស៊ីនកិនស្រូវនេះមានម្ចាស់ចំនួន២នាក់ ម្នាក់ឈ្មោះជីវ ហុងតាំង ភេទប្រុស អាយុ៦៣ឆ្នាំ និងម្នាក់ទៀតឈ្មោះងួន ឈុនហួង ភេទប្រុស អាយុ៥៨ឆ្នាំ ពួកគេទាំង២នាក់រស់នៅភូមិ-ឃុំកើតហេតុខាងលើ។ តាមប្រភពព័ត៌មានជំហានដំបូងឱ្យដឹងថា ស្រូវក្នុងរោងម៉ាស៊ីននេះត្រូវភ្លើងឆេះអស់ប្រហែល២០ភាគរយ ចំណែករោង និងម៉ាស៊ីនកិនស្រូវត្រូវភ្លើងឆេះខ្ទេច នៅសល់តែគំនរស្រូវ ដែលត្រូវភ្លើងឆេះងំរហូតដល់ម៉ោង៩ព្រឹក ថ្ងៃទី៩ មីនា រថយន្តពន្លត់អគ្គីភ័យទាំង២គ្រឿងកំពុងតែបូមទឹកស្ទឹងស្ទោងទៅបាញ់ពន្លត់គំនរស្រូវដែលនៅឆេះហ៊ុយៗមិនទាន់រលត់ទាំងស្រុងនៅឡើយ។ កាលពីដំបូងគេច្រកស្រូវនេះដាក់បាវ ឬការុង តម្រួតដាក់លើគ្នាក្នុងរោងម៉ាស៊ីន លុះពេលភ្លើងឆេះសំបកការុងធ្វើអំពីជ័រអស់ គេឃើញតែគំនរស្រូវប៉ុណ្ណោះ។
ម្ចាស់រោងម៉ាស៊ីនឱ្យដឹងថា ស្រូវក្នុងរោងម៉ាស៊ីនមានចំនួនជាងមួយពាន់តោនជាប្រភេទស្រូវម្លិះ ពួកគាត់ទិញអស់ប្រាក់ជាង២លានដុល្លារ។ ទាក់ទិននឹងអគ្គីភ័យនេះដែរ មានប្រភពខ្លះធ្វើការសន្និដ្ឋានថា អាចបណ្តាលមកពីទុស្សេចរន្តអគ្គិសនី។ ប្រភពខ្លះទៀតថា អាចបណ្តាលមកពីបំពង់សឺម៉ាំងម៉ាស៊ីនកិនស្រូវក្តៅខ្លាំងពេក ហើយមានផ្កាភ្លើងប៉ើងទៅប៉ះ បណ្តាលឱ្យឆេះតិចៗរហូតរាលដាលឆេះខ្លាំងទើបបង្កឱ្យមានអគ្គីភ័យឆេះឡើង ពីព្រោះនៅពេលថ្ងៃមុនកើតហេតុ រោងម៉ាស៊ីននេះមានកិនស្រូវច្រើនខុសប្លែកធម្មតា។ លុះដល់ពេលល្ងាចទើបម្ចាស់រោងម៉ាស៊ីន និងកម្មករនាំគ្នាចាក់សោរោង ហើយនាំគ្នាមកយាមនៅក្រៅរោងម៉ាស៊ីន។ លុះពេលភ្លើងឆេះពេញបន្ទុកហើយទើបពួកគេដឹង ក៏នាំគ្នាផ្អើលឆោឡោឡើងតែម្តង។
តាមមន្ត្រីការិយាល័យព័ត៌មានស្រុកស្ទោងឱ្យដឹងថា ការខូចខាតសរុបអស់ប្រហែលមួយលានដុល្លារ ពីព្រោះគ្រាន់តែក្បាលម៉ាស៊ីនកិនស្រូវមានតម្លៃជាង១០ម៉ឺនដុល្លារ និងឆេះស្រូវអស់មួយចំនួនធំ ព្រមទាំងឆេះសំភារផ្សេងៗអស់ជាច្រើនទៀត។ ក្នុងគ្រោះអគ្គីភ័យនេះ ពុំបណ្តាលឱ្យមានគ្រោះថ្នាក់ដល់ជីវិតមនុស្ស ឬឆេះរាលដាលដល់ផ្ទះអ្នកជិតខាងឡើយ៕
ចែករំលែកព័តមាននេះ