កាលពីថ្ងៃទី១៤ ខែកុម្ភៈ ឆ្នាំ២០១១ «សមាជិកក្រុមប្រឹក្សាសន្តិសុខអង្គការសហប្រជាជាតិ បានជម្រុញឱ្យភាគីទាំងឡាយបង្កើតនូវការឈប់បាញ់ជាអចិន្ត្រៃយ៍ ហើយត្រូវអនុវត្តនូវការ ឈប់បាញ់នោះឱ្យបានពេញលេញ»។ បន្ទាប់មក នាព្រឹកថ្ងៃទី១៧ ខែកុម្ភៈ ឆ្នាំ២០១១ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសថា នៅថ្ងៃទី២២ ខែកុម្ភៈ មានជំនួបរដ្ឋមន្ត្រីការបរ ទេសអាស៊ានដែលប្រព្រឹត្តធ្វើឡើងក្នុងទីក្រុង ហ្សាការតា ហើយកម្ពុជាស្នើឱ្យមាន «បទឈប់ បាញ់ជាអចិន្ត្រៃយ៍មួយ» ដែលត្រូវចុះហត្ថលេខា ដោយកម្ពុជា និងថៃ ព្រមទាំងចុះហត្ថលេខាអម ដោយសមាជិកអាស៊ានដទៃទៀត ឬដោយ ប្រធានអាស៊ាន។ នៅថ្ងៃដដែលវេលាម៉ោង៥ និង២៥នាទីល្ងាច គេហទំព័រសារព័ត៌មានបាង កកប៉ុស្តិ៍ បានដកស្រង់សម្តីនាយករដ្ឋមន្ត្រីថៃ អាប់ភីស៊ីត វេចាជីវ៉ា ដែលនិយាយថា «វាលឿន ពេកក្នុងការនិយាយអំពីការចុះហត្ថលេខាលើ កិច្ចព្រមព្រៀងឈប់បាញ់ជាមួយនឹងកម្ពុជា»។
មានកិច្ចព្រមព្រៀងឈប់បាញ់ ឬគ្មាន យើងនឹងអាចមើលឃើញនៅក្នុងកិច្ចប្រជុំក្នុងក្រុងហ្សាការតានេះ ។ ជារួម អាស៊ាននឹងបានដឹងហេតុ ផលស្ថិតនៅពីក្រោយលទ្ធផល នៃកិច្ចប្រជុំនេះ។ «យើងទាំងអស់គ្នានឹងស្ថិតនៅទីភ្លឺ-យើងនឹង លែងស្ថិតនៅទីងងឹតទៀតហើយ» នេះគឺជាប្រសាសន៍របស់សម្តេចតេជោហ៊ុន សែន ដោយសម្តេចសំដៅទៅលើថា សមាជិកអាស៊ាននឹងដើរតួនាទីជាភាគីទីបីពេញលក្ខណៈមួយក្នុងការចារចារវាងកម្ពុជានិងថៃ។ នេះជាប្រការដែលគេមិនអាចចៀសគេចបាន។
ទាំងអស់នេះបានឆ្លុះបញ្ចាំងឱ្យឃើញពីលក្ខណសម្បត្តិរបស់សម្តេចតេជោ ហ៊ុន សែន ជាអ្នកសន្តិភាពនិយមដែលស្រឡាញ់សុខសន្តិភាព ស្វែងរកសន្តិភាព និងជាអ្នកបង្កើតសន្តិភាពតាមរយៈការដាក់ចេញនូវសំណើបួនចំណុចរបស់កម្ពុជា អំពីបែបបទដើម្បីធានាឱ្យបាននូវការ ឈប់បាញ់ជាអចិន្ត្រៃយ៍ និងជាស្ថាពរ ដោយស្នើឱ្យសមាជិកអាស៊ានដទៃទៀត ក្រៅពីកម្ពុជា និងថៃបញ្ជូនអ្នកសង្កេតការណ៍អាស៊ាន មិនថាជាស៊ីវិលឬយោធានោះទេ ទៅកាន់តំបន់ព្រំដែន កម្ពុជា-ថៃ ដើម្បីធ្វើការត្រួតពិនិត្យនិងផ្ទៀងផ្ទាត់ការអនុវត្តការឈប់បាញ់នេះ ។ ប្រសិនបើថៃ ច្រានចោលនូវសំណើនេះ កម្ពុជានឹងអញ្ជើញជាឯកតោភាគីឱ្យសមាជិកអាស៊ានដទៃទៀត បញ្ជូនអ្នកសង្កេតការណ៍និងឈរជើងក្នុងទឹកដីកម្ពុជា មិនថាជាអ្នកសង្កេតការណ៍ស៊ីវិល ឬយោធា នោះឡើយ ហើយកម្ពុជានឹងរីករាយ និងដឹងគុណផងដែរប្រសិនបើសមាជិកណាមួយឆ្លើយ តបជាវិជ្ជមានតាមសំណើរបស់រាជរដ្ឋាភិបាល កម្ពុជា។ ដូចដែលសម្តេចនាយករដ្ឋមន្ត្រី ហ៊ុន សែន មានប្រសាសន៍ជាច្រើនលើកច្រើនសាថា កម្ពុជាពុំមែនជាអ្នកឈ្លានពានឡើយ ដូច្នេះវាច្បាស់ណាស់គ្មានអ្វីដែលកម្ពុជាត្រូវបារម្ភពីវត្តមានរបស់ភាគីទីបីនោះទេ៕
សាស្ត្រាចារ្យ ប៉ែន ងឿន
ចែករំលែកព័តមាននេះ