រាជធានីភ្នំពេញ ៖ បុរសម្នាក់បានដឹងថា ប្រពន្ធរបស់ខ្លួនលេងឆាតជាមួយប្រុសម្នាក់ទៀតជាងរៀងរាល់ថ្ងៃ ប៉ុន្តែគាត់ពុំបានដឹងពីទំនាក់ទំនងរវាងអ្នកទាំង២ស៊ីជម្រៅដល់ជម្រិតណានោះទេ ហើយក៏ពុំបានដឹងថាខ្លឹមសារនៅក្នុងឆាតនោះមានន័យបែបណាដែរ ព្រោះប្រពន្ធលែងរួចលុបចោលៗរហូតពុំដែលទុកឡើយ ។ លុះដល់ពេលចុងក្រោយដោយមានការសង្ស័យ គាត់ក៏បានតាមដាន ស្រាប់តែឃើញផ្ទាល់នឹងភ្នែក ស្ទើរកកឈា.ម ដោយមិននឹកស្មានដល់ទាល់តែសោះ ខណៈឃើញប្រពន្ធកំពុងរួមមេត្រីជាមួយប្រុសសហាយនៅក្នុងបន្ទប់ជួលយ៉ាងផ្អែមល្ហែមក្បត់ចិត្តគាត់ជាប្ដីបែបនេះ ។ ប៉ុន្តែគាត់ជាមនុស្សចិត្តធ្ងន់ម្នាក់ ទោះបីជាបានឃើញប្រពន្ធប្រព្រឹត្តបែបនេះក្ដីក៏ពុំបានប្រើហិ.ង្សាទៅលើប្រពន្ធនិងប្រុសសហា.យនោះឡើយ គាត់គ្រាន់តែបិទទ្វារចាក់សោរពីខាងក្រៅរួចរាយការណ៍ប្រាប់ឲ្យនគរបាលចុះទៅឃាត់អ្នកទាំង២នាំទៅសាកសួរប៉ុណ្ណោះ។
ហេតុការណ៍ខាងលើនោះបានបង្កឲ្យមានការភ្ញាក់ផ្អើលកើតឡើងកាលពីវេលាម៉ោង៥ និង២០ នាទីព្រឹកថ្ងៃទី២៨ ខែមីនា ឆ្នាំ ២០២១ នៅចំណុចបន្ទប់ផ្ទះជួលមួយកន្លែង ស្ថិតនៅក្នុងភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
ទាំងបុរសជាប្ដីរួមជាមួយស្ត្រីជាប្រពន្ធនិងប្រុសសហាយពុំត្រូវបានប្រាប់ឲ្យដឹងពីអត្តសញ្ញាណនោះទេ ប៉ុន្តែគ្រាន់តែដឹងថា ប្ដីមានមុខរបរជាកម្មករ នៅទីសត្តឃា.តមួយកន្លែង ហើយប្រពន្ធជាកម្មការិនីរោងចក្រកាត់ដេរ ចំណែកប្រុសសហា.យពុំដឹងថាមានមុខរបរអ្វីឡើយ។
តាមប្រភពព័ត៌មានបានឲ្យដឹងថា ប្ដីប្រពន្ធខាងលើបាន រៀបការជាមួយគ្នាត្រឹមត្រូវតាមច្បាប់រយៈពេលប្រមាណ៣ឆ្នាំមកកន្លងហើយ និងបង្កើតបានកូនស្រីម្នាក់ជាចំណងដៃអាពាហ៍ពិពាហ៍ផងដែរ ។ ជារៀងរាល់ថ្ងៃបុរសជាប្ដីបានចេញទៅធ្វើការនៅម៉ោង២យប់រំលងអាធ្រាត្រដោយទុកឲ្យប្រពន្ធដេកនៅក្នុងបន្ទប់ជួលម្នាក់ឯង រហូតដល់វេលាម៉ោង៨ទៅ៩ព្រឹកទើបត្រឡប់ទៅដល់បន្ទប់ជួលវិញ។ ចំណែកស្ត្រីជាប្រពន្ធពុំមានភាពស្មោះត្រង់ជាមួយប្ដីនោះឡើយ នាងបានលួចបង្កាត់ភ្លើងស្នេហ៍ជាមួយប្រុសថ្មីម្នាក់នោះមួយរយៈពេលកន្លងមកហើយប៉ុន្តែបុរសជាប្ដីទើបតែដឹងពេលនេះ។
តាមប្រភពដដែលបានបន្តទៀតថា ស្ត្រីជាប្រពន្ធបានលេងឆាតហ្វេសប៊ុកជាមួយប្រុសស្នេហ៍ថ្មីជារៀងរាល់ថ្ងៃហើយប្ដីក៏បានដឹងដែរ ប៉ុន្តែពុំដែលរករឿងប្រពន្ធទេព្រោះគ្មានភស្តុតាង ដោយសារតែក្រោយលេងរួចប្រពន្ធតែងតែលុបឆាតចោលជាបន្តបន្ទាប់ ពុំដឹងថាប្រុសដែលប្រពន្ធលេងឆាតជាមួយនោះជានរណា និងខ្លឹមសារឆាតស៊ីជម្រៅដល់កម្រិតណាឡើយ ។ ប៉ុន្តែគាត់មានការសង្ស័យទៅលើប្រពន្ធយ៉ាងខ្លាំងពីរឿងនេះ ទើបនៅវេលាម៉ោង២យប់រំលងអាធ្រាត្រឈានចូលថ្ងៃទី២៨ ខែមិនា គាត់បានចេញទៅធ្វើការជាធម្មតាដូចសព្វមួយដងដែរ ។ ចំណែកស្ត្រីជាប្រពន្ធវិញក្រោយប្ដីចេញទៅបាត់ភ្លាម បានហៅប្រុសស្នេហ៍ឲ្យចូលទៅរួមមេត្រីភ្លែតទៅតាមទម្លាប់រាល់ដង រហូតដល់វេលាម៉ោង៥និង២០នាទីព្រឹកថ្ងៃដដែលបុរសជាប្ដីក៏ត្រឡប់ទៅកាន់បន្ទប់ជួលវិញ ដើម្បីតាមដានប្រពន្ធ។
តាមប្រភពខាងលើបានបញ្ជាក់បន្ថែមទៀតថា ពេលទៅដល់បុរសជាប្ដីគោះទ្វារហៅប្រពន្ធ ហើយភ្លាមៗនោះមិនឃើញប្រពន្ធបើកទ្វារឲ្យឡើយ គាត់ក៏រង់ចាំនៅមុខបន្ទប់មួយសន្ទុះ ទើបប្រពន្ធបើកទ្វារឲ្យចូល ហើយគាត់បានប្រទះឃើញម៉ូតូ១គ្រឿងស្ថិតនៅក្នុងបន្ទប់ ។ ខណៈនោះគាត់មានការងឿងឆ្ងល់កាន់តែខ្លាំងក៏ទៅមើលក្នុងបន្ទប់ទឹក ស្រាប់តែឃើញប្រុសសហា.យប្រពន្ធកំពុងពួនសម្ងំនៅក្នុងបន្ទប់ទឹក ពេលឃើញបែបនោះធ្វើឲ្យគាត់ស្ទើរកកឈា.ម រកនិយាយអ្វីមិនចេញឡើយ ។ ប៉ុន្តែគាត់ពុំបានប្រើហិ.ង្សាទៅលើប្រពន្ធនិងប្រុសស្នេហ៍នោះឡើយ បន្ទាប់មកគាត់បានដើរចេញនិងបានបិទទ្វារបន្ទាប់ចាក់សោរពីខាងក្រៅព្រមទាំងរាយការណ៍ជូននគរបាលប៉ុស្តិ៍សំរោងក្រោមឲ្យចុះទៅឃាត់ប្រពន្ធនិងប្រុសសហាយនាំទៅសាកសួរនិងដោះស្រាយនៅប៉ុស្តិ៍។
ទាក់ទិននឹងរឿងរ៉ាវខាងលើនេះ កោះសន្តិភាពបានទំនាក់ទំនងទៅកាន់លោកនាយប៉ុស្តិ៍នគរបាលសំរោងក្រោមដើម្បីចង់ដឹងពីដំណោះស្រាយរវាងប្ដីប្រពន្ធនិងប្រុសសហា.យនោះដែរ ដោយលោកនាយប៉ុស្តិ៍បានប្រាប់ថា រឿងនេះបានដោះស្រាយចប់អស់ហើយ។ ប៉ុន្តែនៅពេលសួរថា តើចប់ដោយបែបណាដែរ? តើប្ដីប្រពន្ធនោះយកគ្នាវិញដែរទេ ឬក៏លែងលះគ្នាហើយប្រពន្ធទៅតាមប្រុសថ្មី ? លោកឆ្លើយថា អត់ដឹងដែរ អត់រឿងផ្ទៃក្នុងប្ដីប្រពន្ធគេដែរ រឿងយកគ្នាវិញឬមិនយកគឺជារឿងប្ដីប្រពន្ធរបស់គេទេ លោកនាយប៉ុស្តិ៍គ្រាន់តែដឹងថា ខាងប្ដីទាមទារសំណងពីប្រុសសហា.យ ។ ប៉ុន្តែនៅពេលសួរលោកនាយប៉ុស្តិ៍ថា តើទារចំនួនប៉ុន្មាន? លោកមេប៉ុស្តិ៍រូបនោះឆ្លើយតបថា អត់ដឹងដែរ ព្រោះកូនចៅលោកជាអ្នកដោះស្រាយ ។ ខណៈនោះភ្នាក់ងារកោះសន្តិភាពសួរបន្តទៀតថា «អ៊ីចឹងខ្ញុំសុំលេខទូរស័ព្ទកូនចៅបងបានទេ ដើម្បីសួរគាត់បន្តិច?» លោកមេប៉ុស្តិ៍ឆ្លើយថា «អត់ស្គាល់លេខទេ ពុំដឹងថាលេខប៉ុន្មានទេ ខ្ញុំអត់ដឹងដែរ ព្រោះកូនចៅម្នាក់នេះទើបមកថ្មី» ៕
ចែករំលែកព័តមាននេះ