រាជធានីភ្នំពេញ ៖ គ្រួសារចំនួន៣បានទៅចូលរួមបុណ្យ៧ថ្ងៃរបស់សាច់ញាតិ ដោយបានទុកកូនចៅឲ្យនៅផ្ទះ ជាអកុសលទុក្ខជាន់លើទុក្ខ ខណៈកូនចៅប្រុសស្រីរបស់ពួកគាត់ចំនួន៣នាក់ បាននាំគ្នាទៅរកត្រី ហើយមេឃក្ដៅពេកក៏បានបបួលគ្នាចុះទៅងូតទឹកស្ទឹងព្រែកត្នោតដែលស្ថិតនៅជិតផ្ទះ ក៏បណ្តាលឱ្យលង់ទឹកស្លា.ប់យ៉ាងអាណោចអាធ័មបំផុត ទោះជាអ្នកភូមិជួយស្រង់ឡើងគោកហើយក្រុមគ្រួសារបញ្ជូនទៅសង្រ្គោះនៅមន្ទីរពេទ្យយ៉ាងណាក្ដី។
ហេតុការណ៏ដ៏សង្វេគខាងលើនេះបានកើតឡើងកាលពីវេលាម៉ោង១និង៣០នាទីរសៀល ថ្ងៃទី២៦ ខែមិនាឆ្នាំ២០២១ នៅស្ទឹងព្រែកត្នោត ស្ថិតនៅក្នុងភូមិអង្លូងគងថ្មី សង្កាត់ព្រៃស ខណ្ឌដង្កោ រាជធានីភ្នំពេញ។
ក្មេងរងគ្រោះទាំង៣នាក់នោះរួមមាន ១-ឈ្មោះ សៀ ស្រីនួន ភេទស្រី អាយុ៨ឆ្នាំ ជាសិស្ស ស្នាក់នៅភូមិសេរីដីដុះ សង្កាត់ព្រៃវែង ខណ្ឌដង្កោ ២-ឈ្មោះ ប៉ាក់ សាវុធ ភេទប្រុស អាយុ៨ឆ្នាំជាសិស្ស ស្នាក់ជាមួយគ្នា និង៣-ឈ្មោះលៀង ចិត្តា ភេទប្រុស អាយុ៨ឆ្នាំជាសិស្សស្នាក់នៅជាមួយគ្នា។
អ្នកភូមិបានប្រាប់ឲ្យដឹងថា នៅមុនពេលកើតហេតុ ខណៈឪពុកម្ដាយនិងជីដូនទៅចូលរួមពិធីបុណ្យស.ពសាច់ញាតិនៅក្នុងភូមិមួយស្ថិតនៅក្នុងសង្កាត់ព្រៃសនោះដែរ ក្មេងប្រុសស្រីរងគ្រោះទាំង៣នាក់រួមជាមួយក្មេងប្រុសម្នាក់ទៀតបានបបួលគ្នាទៅរកចាប់ត្រីនៅចំណុចក្នុងស្ទឹងព្រែកត្នោត ខណ:នោះដោយសារតែមេឃក្ដៅខ្លាំងពេក ក្មេងរងគ្រោះប្រុសស្រីទាំង៣នាក់ក៏បបួលគ្នាចុះងូតទឹកស្ទឹងព្រែកត្នោត ហើយក៏បានលិច និងលង់បាត់ទៅក្នុងទឹកតែម្ដង ។ ដោយឡែកក្មេងប្រុសម្នាក់ទៀតដែលទៅជាមួយគ្នាដែរពុំបានជួបគ្រោះថ្នាក់នេះឡើយ ហើយក៏បានរត់ឡើងគោកទៅប្រាប់ចាស់ទុំនៅក្នុងភូមិឲ្យដឹងបង្កឲ្យមានការភ្ញាក់ផ្អើលយ៉ាងខ្លាំង ហើយក៏នាំគ្នាទៅរាវរកនិងស្រង់ឡើងគោក ព្រមទាំងទូរស័ព្ទទៅប្រាប់ក្រុមគ្រួសារក្មេងរងគ្រោះទាំងនេះឱ្យបានដឹង។
តាមប្រភពដដែលបានបន្តទៀតថា ក្រោយដឹងនៅដំណឹងដ៏អកុសលនេះហើយឪពុកម្ដាយនិងជីដូនក្មេងៗរងគ្រោះបានចាកចេញពីកន្លែងបុណ្យទៅកាន់កន្លែងកើតហេតុភ្លាមៗ ហើយដោយមិនអស់ចិត្តថា កូនស្លា.ប់ក៏បាននាំយកកូនៗទៅកាន់មន្ទីរពេទ្យដើម្បីសង្រ្គោះដែរ ប៉ុន្តែមិនអាចសង្រ្គោះបានឡើយព្រោះពួកគេបានស្លា.ប់បាត់បង់ជីវិតទៅហើយ។
ក្រោយមកទើបដឹកស.ពក្មេងរងគ្រោះយកត្រឡប់ទៅផ្ទះវិញរួចរាយការណ៍ជូននគរបាលឲ្យចុះទៅពិនិត្យ ព្រមទាំងធ្វើបុណ្យតាមប្រពៃណីក្នុងទិដ្ឋភាពដ៏សោកសង្រេងបំផុត៕
ចែករំលែកព័តមាននេះ