គេអាចយកផ្លែពោតទៅកែច្នៃច្រើនមុខទៅតាមតម្រូវការ (ខ្ចី ចាស់ ទុំ) ។ ពោតខ្ចីអាចចិតគ្រាប់វាស្ដើងៗ យកទៅឆា ធ្វើសម្លប្រហើរ បង្អែម ស្ងោរ ជាដើម ។ ពោតទុំ យើងអាចបកសម្បក ហើយប្រឡេះគ្រាប់វាចេញឱ្យស្អាត រួចយកគ្រាប់ពោត
គេអាចយកផ្លែពោតទៅកែច្នៃច្រើនមុខទៅតាមតម្រូវការ (ខ្ចី ចាស់ ទុំ) ។ ពោតខ្ចីអាចចិតគ្រាប់វាស្ដើងៗ យកទៅឆា ធ្វើសម្លប្រហើរ បង្អែម ស្ងោរ ជាដើម ។ ពោតទុំ យើងអាចបកសម្បក ហើយប្រឡេះគ្រាប់វាចេញឱ្យស្អាត រួចយកគ្រាប់ពោតទាំងនោះកែច្នៃធ្វើពោតកំបោរ ។ ជាក់ស្ដែង អ្នកមីង អម ចាន់ធូ អាយុ៥៧ឆ្នាំ ជាកសិកររស់នៅភូមិត្នោតលើ ឃុំឫស្សីស្រុក ស្រុកស្រីសន្ធរ ខេត្តកំពង់ចាម ។ គាត់ចេះធ្វើពោតកំបោរយ៉ាងឆ្ងាញ់ពិសា ដែលបទពិសោធន៍នេះ គាត់ចេះពីឪពុកម្ដាយគាត់តាំងពីនៅក្មេងមកម្ល៉េះ។ ខ្ញុំសូមបង្ហាញដូចខាងក្រោម៖
១.គ្រឿងផ្សំ
-គ្រាប់ពោតទុំ ៥គីឡូក្រាម
-កំបោរ ១ខាំកន្លះ (កំបោរហូបជាមួួយស្លា)
-ដូងទុំ ២ផ្លែ កោសយកសាច់
-ស្ករសប្រហែល ១គីឡូក្រាម
-ល្ងប្រហែល ០,៥គីឡូក្រាម
-ស្លឹកឫស្សីសមល្មមទុកសម្រាប់ទ្រាប់បាតឆ្នាំង
-ទឹកបន្តិចលាយជាមួយកំបោរ ។
២.របៀបចម្អិនពោតកំបោរ
គាត់យកស្លឹកឫស្សីមកទ្រាប់បាតឆ្នាំង ដើម្បីកុំឱ្យខ្លោចបាតឆ្នាំង ម្យ៉ាងវិញទៀត ធ្វើឱ្យពោតមានក្លិនប្រហើរ គួរឱ្យចង់ទទួលទាន ។ គាត់យកគ្រាប់ពោតទុំមកដាក់ក្នុងឆ្នាំង បន្ទាប់មកយកកំបោរលាយជាមួយទឹកឱ្យរាវល្មម រួចដាក់ចូលទៅក្នុងឆ្នាំង ។ បន្ទាប់មក លើកឆ្នាំងដាក់ដាំឱ្យពុះបន្តិចរហូតទាល់តែសម្បកពោតរបេះ ទើបគាត់លើកឆ្នាំងចុះ រួចចាក់ដាក់កញ្ច្រែងឱ្យស្រស់ទឹក ហើយយកគ្រាប់ពោតនោះមកលាងសម្អាតទឹក២ទៅ៣ដងឱ្យជ្រុះសម្បកអស់ និងអស់ជាតិកំបោរ ។ បន្ទាប់មកទៀត យកវាទៅស្ងោរជាការស្រេចជាមួួយទឹកធម្មតាឱ្យពុះ ទើបលើកឆ្នាំងដាក់ចុះ ហើយចាក់វាដាក់កញ្ច្រែងឱ្យស្រស់ទឹកល្អជាការស្រេច ។
នៅពេលបរិភោគ ដួសដាក់ចានតូច ហើយយកដូង ស្ករស និងល្ងមករោយពីលើពោតតាមចំណង់ចំណូលចិត្ត ។ ដូចនេះ សូមបងប្អូនទាំងអស់សាកល្បងធ្វើពោតកំបោរមើលថា តើវាមានរសជាតិឆ្ងាញ់ប៉ុនណា ?
ចែករំលែកព័តមាននេះ