ខេត្តកំពង់ធំ ៖ មានហេតុការណ៍ភ្ញាក់ផ្អើលមួយបានកើតឡើងដោយសារតែបុរសជាប្តីម្នាក់បានចង.កសម្លាប់ខ្លួនក្រោយពីប្រពន្ធដែលមានផ្ទៃពោះស្តីបន្ទោសពីរឿងឃាត់នាងមិនឱ្យទៅមើលល្ខោន។ ការសម្រេចចិត្តយកខ្សែចង.កសម្លាប់ខ្លួនដោយគ្មានការស្តាយស្រណោះនេះ បានធ្វើឱ្យមនុស្សគ្រប់គ្នាមានការហួសចិត្តជាពន់ពេក ។ ហេតុការណ៍ដែលស្មានមិនដល់នេះបានកើតឡើងកាលពីវេលាម៉ោង២៣និង២៣នាទី ថ្ងៃសិទ្ធិនារី៨មីនា ឆ្នាំ២០១១ នៅចំណុចភូមិរូង ឃុំក្រវ៉ា ស្រុកបារាយណ៍ ។
តាមប្រភពព័ត៌មានពីមន្ត្រីនគរបាលប៉ុស្តិ៍ក្រវ៉ា បានឱ្យដឹងថា បុរសដែលធ្វើអត្តឃាតដោយសារខឹងប្រពន្ធស្តីបន្ទោសរូបនេះឈ្មោះរិន រិទ្ធ អាយុ២៦ឆ្នាំ មានទីលំនៅក្នុងភូមិកើតហេតុខាងលើ ចំណែកប្រពន្ធដែលចង់ដើរលេងមិនស្តាប់ការហាមឃាត់របស់ប្តីឈ្មោះខួង ភ័ណ្ឌ អាយុ២៧ឆ្នាំ ។
ពាក់ព័ន្ធនឹងហេតុការណ៍នេះ ប្រភពដដែលបានបន្តថា តាមការស្រាវជ្រាវនៅកន្លែងកើតហេតុ និងតាមការបំភ្លឺរបស់ស្ត្រីជាប្រពន្ធបានឱ្យដឹងថា មុនពេលកើតហេតុនាងបានសុំប្តីទៅមើលល្ខោននៅក្នុងភូមិ តែប្តីនាងឃាត់មិនឱ្យទៅទេ ពីព្រោះឃើញនាងមានផ្ទៃពោះគ្រប់ខែជិតដល់ថ្ងៃឆ្លងទន្លេ ហើយដោយសារខ្លាចឃាត់រូបនាងមិនឈ្នះ ប្តីនាងក៏ប្រើល្បិចដើរទៅយកអាគុយនៅឯផ្សារបាត់ និងបានអូសបន្លាយពេលដល់ម៉ោងជិត២១ទើបត្រឡប់មកផ្ទះវិញ ដើម្បីកុំឱ្យនាងទៅមើលល្ខោនបាន ។ ក្រោយពេលប្តីនាងត្រឡប់មកវិញ នាងបានស្តីបន្ទោសប្តីយ៉ាងចាស់ដៃ បន្ទាប់មករូបនាងក៏បានដើរទៅដេកនៅក្រោមផ្ទះបាត់ ឯប្តីនាងនៅលើផ្ទះម្នាក់ឯង ហើយក៏ចង.កសម្លាប់ខ្លួនតែម្តង ។
សមត្ថកិច្ចបានបញ្ជាក់ឱ្យដឹងដែរថា ក្រោយពេលប្តីស្លាប់បាន២ថ្ងៃ គឺនៅថ្ងៃទី១០ មីនា ប្រពន្ធក៏បានសំរាលកូនដោយសុវត្ថិភាព ។ ជុំវិញការស្លាប់របស់បុរសជាប្តីខាងលើនេះ មានព័ត៌មានខ្លះបាននិយាយថា ការសម្លាប់ខ្លួនរបស់បុរសជាប្តី គឺដោយសាររូបគាត់ប្រចណ្ឌប្រពន្ធពេក ។ ប៉ុន្តែទោះបីជាយ៉ាងណាបញ្ហាក្នុងគ្រួសារអ្នកក្រៅមិនបានដឹងឱ្យស៊ីជម្រៅទេ មានតែសាមីខ្លួនប៉ុណ្ណោះ ទើបដឹងច្បាស់ ៕
ចែករំលែកព័តមាននេះ