រាជធានីភ្នំពេញ ៖ រថយន្តយីឌុប១គ្រឿងបានខូចបែនមិនដំណើរការមិនអាចដឹកដីបាន ត្រូវម្ចាស់បើកយកទៅធ្វើការជួសជុលបែននៅក្នុងយានដ្ឋានមួយកន្លែង ហើយក្រោយពេលជាងធ្វើការជួសជុលឲ្យដំណើរការឡើងវិញ ម្ចាស់បានប្រើអ្នកបើកបរឲ្យទៅបើកចេញពីយានដ្ឋានទៅកាន់ដីវាលមួយកន្លែង ដើម្បីសាកល្បងលើកបែនឡើងនិងដាក់ចុះវិញ ចុះឡើងៗច្រើនដង ។ លុះចុងក្រោយលើកឡើងហើយទំនងជាភ្លេចទម្លាក់ចុះវិញ ក៏បានទាក់ខ្សែកាប្លិ៍ បណ្ដាលឲ្យបាក់បង្គោលអស់២ដើម ប៉ុន្តែមិនបណ្ដាលឲ្យទុស្សេឬឆក់បង្កគ្រោះថ្នាក់ដល់មនុស្សណាម្នាក់ឡើយ។
ហេតុការណ៍ខាងលើនេះបានកើតឡើងកាលពីវេលាម៉ោង១០និង២០នាទីព្រឹកថ្ងៃទី២៥ ខែមីនាឆ្នាំ២០២១ នៅចំណុចដីវាលមួយកន្លែងស្ថិតនៅតាមបណ្ដោយផ្លូវ៥០ម៉ែត្រ ក្នុងភូមិពាម សង្កាត់ព្រៃស ខណ្ឌដង្កោ រាជធានីភ្នំពេញ ។
រថយន្តបង្កមួយគ្រឿងខាងលើម៉ាក ហ៊ីយ៉ាន់ដាយ ពណ៌លឿង ពាក់ស្លាកលេខ ភព3-0032 បើកបរដោយបុរសពុំស្គាល់អត្តសញ្ញាណម្នាក់។
តាមប្រភពព័ត៌មានបានឲ្យដឹងថា រថយន្តនេះបានខូចបែនលើកឡើងចុះពុំបានអត់ដំណើរការសោះ ក្រោយមកត្រូវបានម្ចាស់យកចូលយានដ្ឋានមួយកន្លែងដើម្បីធ្វើការជួសជុលបែនឲ្យដំណើរការឡើងវិញ ហើយបន្ទាប់ពីជួសជុលរួចរាល់ ម្ចាស់បានឲ្យអ្នកបើកបរម្នាក់បើករថយន្តនេះចេញពីយានដ្ឋានទៅកាន់ដីវាលខាងលើ ដើម្បីសាកល្បងបញ្ជាបែនឡើងចុះឲ្យដឹងថាវាដំណើរការល្អដូចដើមហើយឬនៅ ។ ខណៈនោះអ្នកបើកបរបានលើកបែនឡើងចុះជាច្រើនដង ហើយបន្ទាប់ពីឃើញថាវាដំណើរការស្រួលហើយក៏បានបើករថយន្តចេញពីដីវាលនោះក្នុងល្បឿនលឿនហើយសង្ស័យចុងក្រោយភ្លេចទម្លាក់បែនចុះក៏បានទាក់ខ្សែកាប្លិ៍ បណ្ដាលឲ្យបាក់បង្គោលភ្លើងថ្មអស់២ដើមនិងធ្លាក់ខ្សែភ្លើងរាយប៉ាយពេញដីតែម្ដង។
តាមប្រភពដដែលបានបន្តទៀតថា ខណៈនោះសំណាងខ្លាំងណាស់ដែលខ្សែភ្លើងអត់ដាច់ទើបពុំបណ្ដាលឲ្យឆ្លងចរន្តទុស្សេឬឆក់អ្នកបើកបររថយន្តនោះឡើយ ហើយក្រោយកើតហេតុកម្លាំងនគរបាលប៉ុស្តិ៍ព្រៃសនិងនគរបាលខណ្ឌដង្កោបានចុះទៅកាន់ទីតាំងកន្លែងកើតហេតុរួចទំនាក់ទំនងទៅកាន់មន្ត្រីអគ្គិសនីឲ្យទៅពិនិត្យជាក់ស្ដែងនិងជួបជាមួយភាគីម្ចាស់រថយន្តបង្កដើម្បីដោះស្រាយគ្នាបញ្ចប់រឿង៕
ចែករំលែកព័តមាននេះ