រាជធានីភ្នំពេញ ៖ សហព័ន្ធកីឡាទ្រីយ៉ាត្លុងកម្ពុជា បានត្រៀមដាក់វិញ្ញាសាចំនួន៤ដើម្បីចូលរួមប្រកួតក្នុងព្រឹត្តិការណ៍កីឡាស៊ីហ្គេមលើកទី៣១ ឆ្នាំ២០២១ នៅទីក្រុងហាណូយ ប្រទេសវៀតណាម។
អគ្គលេខាធិការសហព័ន្ធកីឡាទ្រីយ៉ាត្លុងកម្ពុជា លោក ងិន សុខបញ្ញា បានប្រាប់ឲ្យដឹងថា វិញ្ញាសាចំនួន៤ដែលកម្ពុជាត្រៀមដាក់ចូលរួមប្រកួតនេះ រួមមាន វិញ្ញាសាទ្រីយ៉ាត្លុងស្តង់ដារអន្តរជាតិចំនួន២វិញ្ញាសាគឺបុរស-នារី ដែលត្រូវហែលទឹក១៥០០ម៉ែត្រ ជិះកង់៤០គីឡូម៉ែត្រ និងបន្តរត់៥គីឡូម៉ែត្រ និងវិញ្ញាសាឌូអាត្លុងបុរស-នារីដែលត្រូវរត់១០គីឡូម៉ែត្រ ជិះកង់៤០គីឡូម៉ែត្រ និងរត់៥គីឡូម៉ែត្រទៀត ។
លោក ងិន សុខបញ្ញា បន្តថា បច្ចុប្បន្នក្រុមជម្រើសជាតិទ្រីយ៉ាត្លុងកម្ពុជាសរុបមានចំនួន១៤នាក់ ក្នុងនោះមានកីឡាករ៩នាក់ និងកីឡាការិនី៥នាក់ ឯគ្រូបង្វឹកមាន៤នាក់ ក្នុងនោះមានគ្រូបរទេសម្នាក់ជាជនជាតិនូវែលសេឡង់ដែលទើបនឹងមកជួយបង្វឹកដល់ក្រុមជម្រើសជាតិកម្ពុជា ។ ពេលនេះក្រុមជម្រើសជាតិទ្រីយ៉ាត្លុងកម្ពុជាកំពុងបន្តការហ្វឹកហាត់នៅតាមផ្ទះរៀងៗខ្លួនដោយសារស្ថានភាពវិបត្តិជំងឺកូវីដ១៩នៅតែបង្កផលប៉ះពាល់ខ្លាំង ទើបក្រសួងអប់រំ យុវជន និងកីឡា ប្រកាសរំសាយការហ្វឹកហាត់លក្ខណៈប្រមូលផ្តុំជាបណ្តោះអាសន្ន។
អ្វីដែលចាំបាច់បំផុតក្នុងស្ថានភាពនេះគឺគ្រូបង្វឹកជម្រើសជាតិត្រូវរៀបចំកម្មវិធីហ្វឹកហាត់ច្បាស់លាស់ប្រចាំថ្ងៃនៅតាមផ្ទះសិន ដើម្បីថែរក្សាកម្លាំងកុំឲ្យធ្លាក់ចុះខ្លាំងពេក ហើយការត្រួតពិនិត្យការហ្វឹកហាត់របស់កីឡាករ-កីឡាការិនីពីគ្រូបង្វឹកធ្វើឡើងតាមប្រព័ន្ធអនឡាញ ។
លោកអគ្គលេខាធិការរូបនេះបន្ថែមថា ការហ្វឹកហាត់នៅតាមផ្ទះនេះគ្រាន់តែហ្វឹកហាត់បណ្តោះអាសន្នប៉ុណ្ណោះនិងមិនអាចបង្កើនគុណភាពបច្ចេកទេសឲ្យល្អនោះឡើយ ដោយអាចហាត់លើកម្លាំងកាយមូលដ្ឋាន រត់កម្តៅសាច់ដុំ ហើយជិះកង់នៅលើរ៉ូឡូនៅផ្ទះ និងអាចចេញហាត់ជិះកត់នៅតាមផ្លូវសាធារណៈលក្ខណៈឯកត្តជន មិនមានហាត់ជុំគ្នានោះទេ។
អ្វីដែលជាបញ្ហាប្រឈមគឺការហាត់ហែលទឹក ពីព្រោះថានៅផ្ទះមិនមានអាងហែលទឹកនោះទេ ប៉ុន្តែទោះយ៉ាងនេះក្តី ការហាត់នៅផ្ទះក៏នឹងជួយដល់ការប្រមូលផ្តុំឡើងវិញបានខ្លះៗដែរ ហើយបើមិនហ្វឹកហាត់សោះ នោះនឹងជួបបញ្ហាប្រឈមកាន់តែខ្លាំង ពេលប្រមូលផ្តុំហ្វឹកហាត់ឡើងវិញជាក់ជាមិនខាន ។
ក្រសួងអប់រំ យុវជន និងកីឡា ក៏ដូចជាគណៈកម្មាធិការជាតិអូឡាំពិកកម្ពុជាតែងតែផ្តល់ជាការលើកទឹកចិត្តធ្វើយ៉ាងណាជំរុញឲ្យកីឡាករ កីឡាការិនីជម្រើសជាតិនានា បង្កើនការហ្វឹកហាត់នៅតាមផ្ទះនេះឲ្យបានខ្លាំងក្លាតាមកម្មវិធីដែលបានរៀបចំ ដើម្បីត្រៀមស៊ីហ្គេមចុងឆ្នាំ២០២១នេះ ពីព្រោះថាពេលវេលាកាន់តែកៀកហើយ ដែលជាក្តីបារម្ភយ៉ាងខ្លាំងដល់ការអភិវឌ្ឍបច្ចេកទេសផងដែរ ៕
ចែករំលែកព័តមាននេះ