រាជធានីភ្នំពេញ ៖ ជនសង្ស័យ៣នាក់បានជិះម៉ូតូ២គ្រឿង ចេញធ្វើសកម្មភាពឆក់ទ្រព្យសម្បត្តិនៅតាមផ្លូវសាធារណៈ លុះពេលទៅដល់ត្រង់ចំណុចមុខផ្ទះមួយកន្លែងឃើញយុវជនម្នាក់កំពុងអង្គុយមើលទូរស័ព្ទស៊េរីទំនើប ក៏បានធ្វើសកម្មភាពឆក់យកបានសម្រេច រួចព្យាយាមជិះម៉ូតូគេចខ្លួន ប៉ុន្តែខណៈនោះត្រូវយុវជនដែលជាម្ចាស់ទូរស័ព្ទរត់ដេញតាម និងស្រែកថាចោរៗបង្កឲ្យមានការភ្ញាក់ផ្អើលដល់ប្រជាពលរដ្ឋនៅជិតនោះនាំគ្នាជួយស្រែកបន្ទរម្នាក់១ម៉ាត់ៗថែមទៀត ព្រមទាំងជួយដេញតាម ស្របពេលនោះក៏៏មានកម្លាំងនគរបាលខណ្ឌពោធិ៍សែនជ័យកំពុងល្បាតនៅតាមផ្លូវនោះផង ក៏ជួយអន្តរាគមន៍ដេញតាមឃាត់ខ្លួនបាន១នាក់ ចំណែក២នាក់ទៀតជិះម៉ូតូគេចខ្លួនទៅបាត់ដោយសុវត្ថិភាព។
ហេតុការណ៍ខាងលើនេះបានកើតឡើងកាលពីវេលាម៉ោង៥ល្ងាចថ្ងៃទី២៣ ខែមីនា ឆ្នាំ២០២១ នៅចំណុចមុខហាងបេប៊ីម៉ាត ផ្ទះលេខ០២៨ ផ្លូវ១០៥K ស្ថិតក្នុងភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។
ជនសង្ស័យខាងលើឈ្មោះ លី សុខ អាយុ១៨ឆ្នាំមុខរបរមិន ពិតប្រាកដមានទីលំនៅភូមិដីថ្មី សង្កាត់គោកឃ្លាង ខណ្ឌសែនសុខ ចំណែកបក្សពួក២ទៀត ក្នុងនោះម្នាក់ឈ្មោះ អាវីត និងម្នាក់ទៀតឈ្មោះអាឡុញ រត់គេចខ្លួនរួច ។ ក្រុមជនសង្ស័យបានឆក់ទូរស័ព្ទដៃ១គ្រឿងពីយុវជនម្នាក់ឈ្មោះខៀវ គឹមហុង អាយុ២៤ឆ្នាំ មុខរបរជាអ្នកគូរប្លង់ មានទីលំនៅភូមិកើតហេតុខាងលើ។
នគរបានប្រាប់ឲ្យដឹងថា នៅមុនពេលកើតហេតុ ខណៈពេលជនរងគ្រោះកំពុងអង្គុយចុចទូរស័ព្ទនៅមុខផ្ទះ ស្រាប់តែជនសង្ស័យមានគ្នាចំនួន៣នាក់ជិះម៉ូតូ២គ្រឿងទៅជិត រួចបានធ្វើសកម្មភាពឆក់យកបានសម្រេច ហើយព្យាយាមជិះម៉ូតូរត់គេចខ្លួន ។ ភ្លាមៗនោះជនរងគ្រោះបានរត់តាមបណ្ដើរ និងស្រែក ចោរៗបណ្ដើរ បង្កឲ្យមានការភ្ញាក់ផ្អើលយ៉ាងខ្លាំង ហើយប្រជាពលរដ្ឋនៅជិតនោះបានជួយដេញតាមចាប់ ហើយស្របពេលនោះដែរកម្លាំងនគរបាលខណ្ឌពោធិ៍សែនជ័យកំពុងល្បាតនៅតាមផ្លូវនោះស្រាប់ ក៏បានជួយអន្តរាគមន៍ឃាត់បាន១នាក់ភ្លាមៗ ចំណែក២នាក់ទៀតរត់គេចខ្លួន បាត់ស្រមោល។
ក្រោយពេលកើតហេតុជនសង្ស័យត្រូវបាននគរបាលនាំទៅសាកសួរនិងកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមច្បាប់ព្រមទាំងបន្តតាមចាប់ខ្លួនបក្ខពួកដែលកំពុងរត់គេចខ្លួននោះថែមទៀត៕
ចែករំលែកព័តមាននេះ