ខេត្តបន្ទាយមានជ័យ ៖ ករណីចង់លក់ដីរបស់វត្ត «ទួលចារង្សី» ស្ថិតនៅក្នុងភូមិពាមកំពង់ក្រសាំង ឃុំភ្នំលាប ស្រុកព្រំនេត្រព្រះ ដែលធ្វើឱ្យពុទ្ធបរិស័ទចំណុះជើងវត្តស្ទើរ៣ភូមិ បានផ្ទុះប្រតិកម្មកាលពីថ្ងៃមុន ពេលនេះបានបញ្ចប់ហើយ គឺដីរបស់វត្តត្រូវរក្សាទុកដូចដើម ព្រោះជារបស់វត្តមិនអនុញ្ញាតឱ្យលក់បានឡើយ ក្រោយព័ត៌មានធ្វើការផ្សព្វផ្សាយដឹងដល់ថ្នាក់លើហើយនោះ។ គួររំលឹកថា៖ រឿងដីវត្តធ្លាយព័ត៌មានថា«គេប្រុងលក់ហើយ?»
លោកខៀវ សុនិមល អនុប្រធានមន្ទីរធម្មការ និងសាសនាខេត្តប្រាប់តាមទូរសព្ទ នៅព្រឹកថ្ងៃទី២៤ មីនា នេះថា កាលពីម្សិលមិញក្រុមការងារមន្ទីរធម្មការ, សមាគមអាចារ្យខេត្តស្រុក, ព្រះសង្ឃ, គណៈកម្មការវត្តទួលចារង្សី, អាជ្ញាធរនិងពលរដ្ឋបានជួបប្រជុំរកដំណោះស្រាយរឿងរ៉ាវខាងលើ ។
ជាលទ្ធផល លោកអនុប្រធានមន្ទីរប្រាប់ថា ដីចំណុចកើតហេតុដែលជារបស់វត្ត គឺឯកភាពរក្សាទុកដូចដើម មិនអនុញ្ញាតឱ្យលក់ដូរបានឡើយ។ ចំពោះអ្នកសុំខ្ចីដីរបស់វត្តរស់នៅគឺត្រូវរុះរើចេញ បើវត្តត្រូវការអភិវឌ្ឍន៍អ្វីមួយ ហើយខាងវត្តត្រូវធ្វើបែបបទទៅអាជ្ញាធរភូមិ-ឃុំស្រុកឱ្យបានត្រឹមត្រូវ ៕ ដោយ៖ មុត សារុន
ចែករំលែកព័តមាននេះ