ខេត្តកំពង់ចាម ៖ លោកយាយវ័យ៨៦ឆ្នាំ ពិការជើងដើរមិនរួចឈ្មោះ ឡុង ណន នៅភូមិពណ្ណរាយ សង្កាត់សួង ក្រុងសួង ខេត្តត្បូងឃ្មុំ ត្រូវបានកូនប្រុសអៀវចូលសវនាការនារសៀលថ្ងៃទី១៤ កញ្ញា ២០១៥ ដោយសារតែមានជម្លោះដណ្តើមដី និងផ្ទះ ជាមួយកូនស្រីបង្កើតរបស់ខ្លួន ហើយល្បីថាកូនស្រីបានជេរនូវពាក្យចំអាស់ចំអូង ព្រមទាំងបណ្តេញម្តាយចេញពីផ្ទះថែមទៀតផង ។
លោក យ៉េត សារ៉ាន់ អាយុ៥២ឆ្នាំ ត្រូវជាកូនប្រុសបង្កើតរបស់លោកយាយបានប្រាប់ឲ្យដឹងថា រូបគាត់មកកាន់សាលាដំបូងខេត្តកំពង់ចាមនារសៀលថ្ងៃខាងលើ ដើម្បីចូលរួមសវនាការទាមទាររបស់ទ្រព្យមានដី និងផ្ទះឈើ១ខ្នង ពីបងស្រីរបស់គាត់ឈ្មោះ យ៉េត ថេន អាយុ៥៣ឆ្នាំ មកឲ្យម្តាយវិញ ព្រោះក្រោយពីឪពុកបានស្លាប់រយៈពេល១ឆ្នាំក្រោយមក បងស្រីរូបនេះបានបណ្តេញម្តាយចេញពីផ្ទះដើម្បីយកទ្រព្យតែម្នាក់ឯង ។
លោក យ៉េត សារ៉ាន់ ប្រាប់បន្តថា មានពេលមួយបងស្រីបានជេរម្តាយនូវពាក្យចំអាស់ចំអូងពិបាកស្តាប់ណាស់ ការដែលបងប្អូនជាច្រើននាក់មកនេះ គឺដើម្បីទាមទារដី និងផ្ទះប្រគល់ជូនទៅឲ្យម្តាយវិញ ដែលពិការជើងដើរមករួចរយៈពេល៥ខែមកហើយ ។ ប្រសិនណាបើការកាត់ក្តី ម្តាយត្រូវចាញ់កូននោះ រូបលោកមិនសុខចិត្តទេ និងបន្តនាំម្តាយទៅប្តឹងដល់សាលាឧទរណ៍បន្តទៀត ។
អ្នកស្រី យ៉េត ណេង អាយុ៦៤ឆ្នាំ ត្រូវជាកូនទី១របស់លោកយាយប្រាប់ឲ្យដឹងថា បងប្អូនរបស់គាត់មានចំនួន៣នាក់ បានផ្តិតមេដៃយល់ព្រម ប្រគល់ដីទំហំ២០ម៉ែត្រ គុណ៤០ម៉ែត្រ និងផ្ទះឲ្យប្អូនឈ្មោះ ថេន ទទួលរាប់រងចិញ្ចឹមម្តាយចាស់ជរារហូតទាល់តែស្លាប់ ដោយមានលោកមេភូមិដឹងឮ ។ ក្នុងនោះចំណែកដី១០ម៉ែត្រក៏មានចំណែកប្អូនស្រីម្នាក់ទៀតដែរ តែក្រោយមកមានរឿងបែរជាប្អូនឈ្មោះ ថេន ទាមទារយកទាំងអស់ ព្រមទាំងបណ្តេញម្តាយចេញពីផ្ទះថែមទៀត និងបានជេរនូវពាក្យអសុរោះ ។ ដោយសារតែមានសភាពបែបនេះ ទើបពួកគាត់ជាកូនៗនាំគ្នាប្តឹងមកសាលាដំបូងខេត្តកំពង់ចាមតាំងពីមិនទាន់កាត់បំបែកខេត្តម្លេះ ។
លោកយាយ ឡុង ណន អាយុ៨៦ឆ្នាំ មានប្រសាសន៍ឲ្យដឹងថា គាត់សូមទាមទារយករបស់ទ្រព្យមកវិញខ្លះគ្រាន់ចិញ្ចឹមជីវិតរហូតដល់ដង្ហើមចុងក្រោយ ដោយដីនេះបានប្រគល់ឲ្យកូនស្រីឈ្មោះ ថេន រួចហើយនាពេលកន្លងមក ទោះជាយ៉ាងណាក្តីគាត់គួរតែបានខ្លះមកវិញ ។
ជុំវិញការចោទប្រកាន់នេះអ្នកស្រី យ៉េត ថេន អាយុ៥៣ឆ្នាំ គាត់បានឆ្លើយបដិសេធថាមិនបានជេរម្តាយនោះទេ ដោយរាល់ថ្ងៃនេះគឺម្តាយឈ្មោះ ណន រស់នៅលើផ្ទះឈើជាមួយនឹងគាត់ ដោយបានថែតាំងពីដើមរហូតមកដល់សព្វថ្ងៃ ។ ហើយគាត់ក៏មិនបានបណ្តេញម្តាយដែលកំពុងតែមានជំងឺចេញពីផ្ទះដែរ គឺសុខចិត្តមើលថែចិញ្ចឹមគាត់រហូតទាល់តែស្លាប់ មិនពិតដូចបងៗចោទប្រកាន់មកលើរូបគាត់ឡើយ ។
ប្រភពពីមន្ត្រីតុលាការមួយរូបបានឱ្យដឹងថា សវនាការចំពោះរឿងក្តីរវាងម្តាយនិងកូននេះប្រកាសលើកទៅថ្ងៃទី២៩ ខែកញ្ញា ២០១៥ ខាងមុខនេះ ៕
ចែករំលែកព័តមាននេះ