រាជធានីភ្នំពេញ ៖ យោងតាមការបង្ហោះលើផេករបស់សហព័ន្ធកីឡាបាល់ទាត់កម្ពុជា បានបង្ហាញថា នៅក្នុងខែកុម្ភៈ និងមីនា ឆ្នាំ២០២១នេះ គឺកីឡាករជម្រើសជាតិដូចបណ្ដាក់គ្នាដាក់ថ្ងៃខួបកំណើតតែម្ដង ខណៈដែលកីឡាករទាំងនោះក៏សុទ្ធតែជាកីឡាករឆ្នើម និងមានអ្នកគាំទ្រច្រើន ។ កីឡាករដែលមានថ្ងៃកំណើតបណ្ដាក់គ្នាទាំងនោះ ក៏បានបង្ហោះសារជូនពរខ្លួនឯង និងជូនពរអ្នកគាំទ្រនៅក្នុងអំឡុងនៃការរីករាលដាលដោយជំងឺកូវីដ-១៩នាពេលនេះផងដែរ។
កីឡាករដែលត្រូវបានប្រកាសថា មានថ្ងៃកំណើតនៅក្នុងអំឡុងខែកុម្ភៈ និងខែមីនា នោះរួមមានទាំងកីឡាករស៊េរីចាស់ និងស៊េរីថ្មី ដោយ
ពួកគេម្នាក់ៗ គឺមិនត្រឹមតែត្រូវបានផេកផ្លូវការរបស់សហព័ន្ធបង្ហោះជូនពរប៉ុណ្ណោះទេ តែក្រឡេកទៅមើលអាក់ខោនផ្ទាល់ខ្លួន ក៏មានអ្នកជូនពរជាហូរហែមិនដាច់ ស្ទើរដូចតារាល្បីម្នាក់ផងដែរ ។ តួលេខកីឡាករបាល់ទាត់ ជម្រើសជាតិដែលមានថ្ងៃកំណើតដូចដាក់ថ្ងៃគ្នាតាមលំដាប់លំដោយនេះ គឺជារឿងចៃដន្យប៉ុណ្ណោះ ប៉ុន្តែត្រូវគេមើលឃើញថា កើតថ្ងៃឡើងជាប់ៗគ្នា ដែលក្នុងក្រុមគឺស្ទើរតែអាចកំណត់ធ្វើក្នុងថ្ងៃណាមួយរួមគ្នាក្នុងពេលតែមួយបាន។
កីឡាករ ស៊ាន សុភ័ក្ត្រា ដែលជាកីឡាករជម្រើសជាតិនៅក្នុងឆ្នាំនេះ ត្រូវបានប្រកាសថា មានថ្ងៃកំណើត ថ្ងៃទី៥ កុម្ភៈ ដោយលោកនៅដើមឆ្នាំ២០២១នេះ គឺមានវ័យឈានចូល២០ឆ្នាំ។ កីឡាករ សឿត ណារ៉ា ដែលជាកីឡាករឆ្នើមវ័យក្មេងក្នុងក្រុមជម្រើសជាតិមួយរូបនៅក្នុងរដូវកាលថ្មីនេះ ក៏ត្រូវបានសហព័ន្ធប្រកាសផងដែរថា មានថ្ងៃកំណើត ថ្ងៃទី១៣ កុម្ភៈ។
លោកត្រូវបានប្រកាសថា មានអាយុឈានចូល២០ឆ្នាំហើយ បន្ទាប់ពីលោកក៏តស៊ូច្រើបដែរជាមួយវិស័យបាល់ទាត់ តាំងពីវ័យជាង១០ឆ្នាំ។ កីឡាកររៀមច្បងមួយរូប គឺ គួច សុកុម្ភៈ ដែលជាកីឡាករជម្រើសជាតិ និងមានស្នាដៃរាប់មិនអស់នៅក្នុងវិស័យបាល់ទាត់ ក៏ត្រូវបានប្រកាសផងដែរថា មានថ្ងៃកំណើតថ្ងៃទី១៥ កុម្ភៈ ដោយលោកគិតត្រឹមថ្ងៃដែលបានប្រកាសគឺមានវ័យឈានចូល៣៤ឆ្នាំហើយ ។ ការប្រកាសនេះ ក៏ធ្វើឱ្យហ្វេនៗដឹងច្បាស់ផងដែរថា ហេតុផលដែលលោកមានឈ្មោះថា កុម្ភៈ គឺដោយសារតែលោកកើតនៅក្នុងខែកុម្ភៈហ្នឹងឯង។ លោកគឺជាកីឡាករក្នុងក្រុមជម្រើសជាតិ ក្រោយការព្យាបាលរបួសជើង ទទួលបានភាពជោគជ័យ។ កីឡាករជម្រើសជាតិ លោក ម៉ៅ ពិសិដ្ឋ ក៏ត្រូវបានសហព័ន្ធប្រកាសថា មានថ្ងៃកំណើតថ្ងៃទី១៧ កុម្ភៈ ផងដែរ ។ លោកឈានចូលវ័យ២១ឆ្នាំ ដែលអាចចាត់ទុកថាគឺជាធនធាននៅក្មេងនៅក្នុងវិស័យបាល់ទាត់ ក្រោយពេលបានសាងភាពល្បីល្បាញ ក្នុងនាមជាកីឡាករជម្រើសជាតិ ។ កីឡាករជម្រើសជាតិវ័យក្មេង លោក ឆេង ម៉េង ដែលពាក់អាវលេខ១៩ ក៏ត្រូវបានប្រកាសថា មានថ្ងៃកំណើតថ្ងៃទី២៧ កុម្ភៈ ។ កីឡាកររូបនេះបានរួមស្នាដៃក្នុងក្រុមជម្រើសជាតិយូរក្រែលមកហើយ ដោយនៅដើមឆ្នាំ២០២១នេះ គឺលោកមានវ័យឈានចូល២១ឆ្នាំ។
កីឡាករ សាន គឹមហេង ដែលលេងឱ្យជម្រើសជាតិ U22 ក៏ត្រូវបានប្រកាសថា មានថ្ងៃកំណើតថ្ងៃទី២ មីនា ។ លោកត្រូវបានប្រកាសថា មានវ័យឈានចូល២១ឆ្នាំហើយដែលនៅក្នុងវ័យនេះ ក៏ចាត់ទុកថា គឺជាធនធានពេញកម្លាំងម្នាក់របស់ក្រុមជម្រើសជាតិ ។ កីឡាករ កែវ សុខផេង ដែលអ្នកគាំទ្រស្គាល់ច្បាស់ដូចថ្ងៃពាក់អាវលេខ១៤ ក៏ត្រូវបានសហព័ន្ធប្រកាសថា មានថ្ងៃកំណើតថ្ងៃទី៣ មីនា ហើយមកទល់ពេលនេះ គឺលោកមានវ័យ២៩ឆ្នាំហើយ ប្រហាក់ប្រហែលនឹងកីឡាករ ប្រាក់ មុន្នីឧត្តម ដែលជាមិត្តរួមអាជីព ។ កីឡាករ សារ៉េតគ្រីយ៉ា ក៏មានថ្ងៃកំណើតក្នុងខែមីនានេះដែរ។ លោកត្រូវបានប្រកាសថា កើតនៅថ្ងៃទី៣ មីនា ដូចគ្នានឹង កែវ សុខផេង ប៉ុន្តែនៅក្នុងឆ្នាំនេះ គឺលោកទើបតែមានវ័យ២៥ឆ្នាំប៉ុណ្ណោះ។ មិនខុសគ្នាដែរ កីឡាករជម្រើសជាតិ លោក អ៊ាន ពិសី ក៏មានថ្ងៃកំណើត ដូចបណ្ដាក់គ្នានឹងមិត្តរួមក្រុម។
នៅក្នុងឆ្នាំនេះ លោកត្រូវបានប្រកាសថា មានអាយុ១៨ឆ្នាំឈានចូល១៩ឆ្នាំ ដោយកីឡាករដែលមានលេខសម្គាល់លើអាវលេខ៧ដូចគ្នានឹងខ្សែប្រយុទ្ធប្រាក់ មុន្នីឧត្តម រូបនេះ ក៏បង្ហាញពីការរំភើបចិត្តមិនតិចដែរ ដែលខែដែលលោកចាប់កំណើត ស្រាប់តែមានកីឡាករជម្រើសជាតិរួមអាជីពជាមួយលោក កើតច្រើនដែរបែបនេះ។
ដោយឡែក កាលពីថ្ងៃទី១៥ មីនា ក្នុងឆ្នាំ២០២១ កន្លងទៅ កីឡាករមុខមាំ លោក អ៊ន ចាន់ប៉ូលីន ក៏ត្រូវបានសហព័ន្ធប្រកាសផងដែរថា គឺជាថ្ងៃកំណើតរបស់លោក ។ លោកមានវ័យ២២ឈានចូល២៣ឆ្នាំ និងជាកីឡាករដែលទទួលបានការចាប់អារម្មណ៍មិនចាញ់មិត្តរួមក្រុមប៉ុន្មានទេពាក់ព័ន្ធនឹងទម្រង់លេងលើតារាង។
លោកច្រើនពាក់អាវលេខ៨ ហើយនៅក្នុងវ័យ២២ឆ្នាំនេះ លោកក៏មិនបានធ្វើពិធីអបអរខួបកំណើតអ្វីជាការជួបជុំឱ្យគេបានឃើញនោះដែរ។វត្តមានកីឡាករជម្រើសជាតិច្រើនរូប ត្រូវបានប្រកាសថា មានថ្ងៃកំណើតត្រឹមតែនៅក្នុងខែកុម្ភៈ និងមីនា នេះ បានធ្វើឱ្យមានការចាប់អារម្មណ៍មិនតិចទេ ដោយអ្នកខ្លះយល់ថា ពួកគេមិនត្រឹមតែរួមសុខរួមទុក្ខក្នុងក្រុម ក្នុងនាមជាកីឡាករជម្រើសជាតិប៉ុណ្ណោះទេ តែភាគច្រើននៃពួកគេ ក៏មានថ្ងៃកំណើតក្នុងខែរួមគ្នា ដែលចាត់ទុកថា គឺជានិស្ស័យរួមគ្នាមួយផងដែរ៕
ចែករំលែកព័តមាននេះ