ខេត្តមណ្ឌលគិរី ៖ អតីតព្រះមេគណខេត្តមណ្ឌលគិរីព្រះនាម បេ ខេង គង់នៅក្នុងវត្តសែនមនោរម្យ ដែលត្រូវបានចោរលួចគាស់ហិបយកបច្ច័យដែលលោកសន្សំទុកកសាងព្រះចេតិយ និងសម្រាប់ប្រើប្រាស់ផ្ទាល់ព្រះអង្គនោះ នៅព្រឹកថ្ងៃទី១២ កញ្ញា បានទទួលថវិកាឧបត្ថមពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាចំនួន៥លានរៀល និងថវិកាឧបត្ថម្ភពីកាកបាទក្រហមកម្ពុជាចំនួន២សែនរៀល។
បច្ច័យទាំងនោះបាននាំទៅប្រគេនព្រះអង្គដោយគណៈកម្មការសាខាកាកបាទក្រហមកម្ពុជា ក្នុងនោះគណៈកម្មការសាខាកាកបាទក្រហមកម្ពុជាខេត្តមណ្ឌលគិរី ក៏បាននាំយកទឹកដោះគោចំនួន១០កំប៉ុង ស្ករសចំនួន២គីឡូក្រាម អង្ករចំនួន៥០គីឡូក្រាម ព្រមទាំងបច្ច័យ២០ម៉ឺនរៀល ប្រគេនលោកតាផងដែរ។
សូមបញ្ជាក់ថា កាលពីថ្ងៃទី១០ កញ្ញា ២០១៥ នៅកុដិរបស់លោកតាក្នុងវត្តសែនមនោរម្យភូមិដើមស្រស់ សង្កាត់មនោរម្យ ក្រុងសែនមនោរម្យ មានការភ្ញាក់ផ្អើលថាមានចោរលួចគាស់ហិបដាក់បច្ច័យដែលព្រះអង្គសន្សំទុកចំនួន៥លានរៀល សំរាប់កសាងចេតីយ ដែលថវិកានោះព្រះអង្គបានសន្សំអស់រយៈពេលជាង១០ឆ្នាំមកហើយ។
លោកតាព្រះនាម បេ ខេង អតីតព្រះចៅអធិការវត្ត និងជាអតីតព្រះមេគណខេត្តមណ្ឌលគិរី ។ បច្ចុប្បន្នលោកជាព្រះឧបជ្ឈាយ៍ខេត្ត លោកតាមានព្រះជន្ម៩៤ព្រះវស្សា៕
ចែករំលែកព័តមាននេះ