ខេត្តបន្ទាយមានជ័យ ៖ អ្នកស្រុកបានរិះគន់យ៉ាងខ្លាំងនៅឯកសារ១ច្បាប់ ដែលសង្ស័យចេញដោយអាជ្ញាធរឃុំអូរបីជាន់ សរសេរខុសអក្ខរាវិរុទ្ធច្រើន កាលពីថ្ងៃទី១៩ មីនា កន្លងទៅថ្មីៗ ។ ក្នុងឯកសារនោះ…
ខេត្តបន្ទាយមានជ័យ ៖ អ្នកស្រុកបានរិះគន់យ៉ាងខ្លាំងនៅឯកសារ១ច្បាប់ ដែលសង្ស័យចេញដោយអាជ្ញាធរឃុំអូរបីជាន់ សរសេរខុសអក្ខរាវិរុទ្ធច្រើន កាលពីថ្ងៃទី១៩ មីនា កន្លងទៅថ្មីៗ ។ ក្នុងឯកសារនោះ គឺជាសេចក្តីជូនដំណឹងស្តីពីផ្អាកការសាងសង់លោកហេង តឹង ។
តាមពិតពាក្យនៅក្នុងសេចក្តីជូនដំណឹងមួយឃ្លានេះ អ្នកស្រុកលើកឡើងថា ពួកគាត់មិនយល់ពីអត្ថន័យនោះទេ ហើយលើកជាសំណួរថា តើលោកហេង តឹង ជាវីរៈបុរស ឬជាឥស្សរជនឆ្នើមឬយ៉ាងណា ទើបត្រូវគេសាងសង់? ក្រៅពីនេះក្នុងសំណេរហាក់ខុសច្រើន និងខ្វះអត្ថន័យមួយចំនួនទៀតផង ។
តាមពិតឯកសាររបស់អាជ្ញាធរឃុំអូរបីជាន់១ច្បាប់នេះ តាមដឹងគឺអាជ្ញាធរចង់សំដៅឲ្យឈ្មោះហេង តឹង នៅភូមិសិលាខ្មែរផ្អាកការសាងសង់សំណង់លើដីដែលអាជ្ញាធរយល់ថា ជាដីចំណីផ្លូវរបស់រដ្ឋខណៈគ្រួសារឈ្មោះហេង តឹង ត្រឹមតែចាក់សាបលើដីដែលខ្លួនរស់នៅតាំងពី១៩៩៧ ដើម្បីលំអបរិស្ថានតែប៉ុណ្ណោះ ។
អ្នកស្រុកកំពុងងឿងឆ្ងល់ថា ហេតុអ្វីសំណង់រឹងមាំរបស់គ្រួសារមួយកំពុងសាងសង់ប៉ះពាល់ដីចំណីផ្លូវរបស់រដ្ឋ និងយកបង្គោលខ្សែភ្លើងរៀបឥដ្ឋធ្វើផ្ទះប្រឈម និងហានិភ័យខ្លាំងស្ថិតក្នុងភូមិខាងលើដែរ បែរជាអាជ្ញាធរមិនហាមឃាត់? ឬមួយអាជ្ញាធរមើលឃើញតែរឿងកំប៉ិកកំប៉ុក ឯសំណង់ធំៗមានផលប៉ះពាល់មើលមិនឃើញ?
លោកហេង តឹង ដែលទទួលបានឯកសារខាងលើប្រាប់តាមទូរសព្ទថា ឯកសារនេះ លោកទទួលបានពីប្រជាការពារភូមិម្នាក់នៅម៉ោងជាង៣រសៀលថ្ងៃទី២០ មីនា ២០២១ គេយកឱ្យដល់ផ្ទះ ។ ដោយឡែក ម្ចាស់សំណង់រឹងមាំដែលរងការិះគន់ថាកំពុងសាងសង់ប៉ះពាល់ដីចំណីផ្លូវរបស់រដ្ឋ និងយកបង្គោលខ្សែភ្លើងរៀបឥដ្ឋធ្វើផ្ទះ ឈ្មោះសឿម ចុន ប្រាប់តាមទូរសព្ទថា លោកមិនបានដឹងថា ការសាងសង់នេះខុសអ្វីទេ? ហើយតាំងពីពេលចាប់ផ្តើមសាងសង់មកទល់ពេលនេះ ក៏មិនដែលមានអាជ្ញាធរឬមន្ត្រីណាមកហាមឃាត់ឬសួរនាំឡើយ ។
ជុំវិញករណីនេះ លោកយ៉ឹម ពៅ មេភូមិសិលាខ្មែរចុចទូរសព្ទចូលតែគ្មានអ្នកទទួល ។ ពាក់ព័ន្ធនិងឯកសារដែលរងការរិះគន់ជុំទិស ហើយសង្ស័យថា មិនបានពិនិត្យត្រឹមត្រូវមុនចុះហត្ថលេខា និងប្រថាប់ត្រាលោកនិត វុទ្ធី ជាស្មៀនឃុំអូរបីជាន់ ប្រាប់កោះសន្តិភាពតាមទូរសព្ទថា ខាងលោកបានបញ្ជូនឯកសារ១ច្បាប់ជូនឈ្មោះហេង តឹង នៅភូមិសិលាខ្មែរមែន ប៉ុន្តែពេលសាកសួររឿងអក្ខរាវិរុទ្ធខុសច្រើន បែរជាលោកលើកឡើងថា ប្រហែលមានអ្នកយកទៅក្រឡៃទេដឹង? ពិតជាមិនគួរឱ្យជឿសោះ ។
ចែករំលែកព័តមាននេះ